யோகி ஆதித்யநாத் பதவியேற்பு விழா! ‛தி காஷ்மீர் பைல்ஸ்’ படக்குழுவுக்கு அழைப்பு

Published: Friday, March 25, 2022, 12:49 [IST]

Subscribe to Oneindia Tamil

லக்னோ: உத்தர பிரதேச முதல்வராக லக்னோவில் இன்று 2வது முறையாக யோகி ஆதித்யநாத் பதவியேற்க உள்ளார். இந்த விழாவில் பங்கேற்க, 'தி காஷ்மீர் பைல்ஸ்' திரைப்பட குழுவினருக்கு அழைப்பு விடுக்கப்பட்டுள்ளது.

மாலையில் பதவியேற்பு

இதற்கு முன்னோட்டமாக லக்னோவில் நேற்று நடந்த பாஜக எம்எல்ஏக்கள் கூட்டத்தில் யோகி ஆதித்யநாத், சட்டசபை பாஜக தலைவராக மீண்டும் தேர்வு செய்யப்பட்டார். இதையடுத்து இன்று காலை யோகி ஆதித்யநாத் பாஜக மற்றும் கூட்டணி கட்சி எம்எல்ஏக்ளுடன் தேநீர் விருந்து வழங்கினார். யோகி ஆதித்யநாத்தின் பதவியேற்பு விழா லக்னோவில் உள்ள அடல் பிஹாரி வாஜ்பாய் மைதானத்தில் இன்று மாலை 4:00 மணிக்கு நடைபெற உள்ளது.

பிரதமர் மோடி பங்கேற்பு

இதனால் அடல் பிஹாரி வாஜ்பாய் மைதானம் விழாக்கோலம் பூண்டுள்ளது. இதில் உத்தர பிரதேச முதல்வராக யோகி ஆதித்யநாத் 2வது முறையாக பதவியேற்க உள்ளார். இந்த விழாவில் பிரதமர் நரேந்திர மோடி, உள்துறை அமைச்சர் அமித்ஷா, பாஜக தேசிய தலைவர் ஜேபி நட்டா உள்பட மத்திய அமைச்சர்கள், பாஜக தலைவர்கள், கூட்டணி கட்சியினர், பிற மாநில முதல்வர்கள் பங்கேற்க உள்ளனர்.

தி காஷ்மீர் பைல்ஸ் படக்குழு

இந்நிலையில் தான் யோகி ஆதித்யநாத்தின் பதவியேற்பு விழாவுக்கு இதுதவிர பிரபல பாலிவுட் நடிகர் அமிதாப் பச்சனுக்கும் பதவியேற்பு விழாவுக்கான அழைப்பிதழ் வழங்கப்பட்டுள்ளது. இதேபோல் ‛தி காஷ்மீர் பைல்ஸ்' திரைப்படத்தின் குழுவுக்கு அழைப்பு விடுக்கப்பட்டுள்ளது. அதன்படி ‛தி காஷ்மீர் பைல்ஸ்' திரைப்பட இயக்குனர் விவேக் அக்னிகோத்ரி, நடிகர் அனுபம் கெர் உள்பட திரைப்பட குழுவினர் பங்கேற்க உள்ளனர்.

பாஜக ஆதரவு

இந்த ‛தி காஷ்மீர் பைல்ஸ்' என்ற திரைப்படம் மார்ச் 11ல் வெளியானது. இது 1990ல் காஷ்மீரில் இருந்து காஷ்மீரி பண்டித்கள் வெளியேறியதை அடிப்படையாக கொண்ட கதையம்சத்தை உள்ளடக்கி உள்ளது. இதற்கு பாஜகவின் ஆதரவு தெரிவித்து பல மாநிலங்களில் வரிவிலக்கு அளித்துள்ளனர். அதேநேரத்தில் காங்கிரஸ் உள்பட பிற எதிர்க்கட்சிகள் விமர்சனம் செய்துள்ளனர். இதற்கிடையே சமீபத்தில் பிரதமர் நரேந்திர மோடி நேரில் அழைத்து பாராட்டினார். இந்நிலையில் தான் யோகி ஆதித்யநாத்தின் பதவியேற்பு விழாவுக்கு படக்குழுவுக்கு அழைப்பு விடுக்கப்பட்டுள்ளது குறிப்பிடத்தக்கது.

Published On March 25, 2022