பாஜக அரசின் நலத்திட்டங்களே ராமராஜ்ஜியத்தின் அடித்தளம்! உ.பி முதல்வர் யோகி ஆதித்யநாத் பெருமிதம்

லக்னோ: பாரதிய ஜனதா அரசின் நலத்திட்டங்களே ராமராஜ்ஜியத்தின் அடித்தளம் என உத்தரப் பிரதேச முதலமைச்சர் யோகி ஆதித்யநாத் கூறியுள்ளார்.

உத்தரப் பிரதேசத்தில் யோகி ஆதித்யநாத் தலைமையில் பாஜக ஆட்சி நடைபெற்று வருகிறது. இந்த மாநிலத்தில் இதற்கு முன்னர் யாரும் தொடர்ச்சியாக 6 ஆண்டுகள் முதலமைச்சராக நீடித்தது கிடையாது. ஆனால் இந்த சாதனையை கடந்த சட்டமன்ற தேர்தலில் யோகி ஆதித்யநாத் முறியடித்துள்ளார். மக்களின் இந்த ஆதரவை நாடாளுமன்ற தேர்தலுக்கும் நீடிக்க வேண்டும் என்பதற்காக ஏராளமான புதிய திட்டங்களை அவர் தொடர்ந்து அறிவித்து வருகிறார். இந்நிலையில் இது குறித்து பேசிய அவர், "நலத்திட்டங்களே ராமராஜ்ஜியத்தின் அடித்தளம்" என்று கூறியுள்ளார்.

நேற்று நடைபெற்ற தசரா நிகழ்ச்சியில் பங்கேற்று பேசிய அவர், "ஆயிரக்கணக்கான ஆண்டுகளுக்கு முன்னர் ராமர் பொய்யையும், அநீதியையும் தோற்கடித்து ராமராஜ்ஜியத்தை உருவாக்கினார். அதே ராமரின் லட்சியங்களை பின்பற்றி, பிரதமர் நரேந்திர மோடி தலைமையில் லட்சக்கணக்கான உணவு, உடை, இருப்பிடம் ஆகியவற்றை இந்த மாநில அரசு உறுதி செய்திருக்கிறது. சனாதன தர்மத்தை எதிர்ப்பவர்கள் சமூகத்தை பிளவுபடுத்த முயல்கிறார்கள். அவர்கள் சாதி அடிப்படையிலான பாகுபாடுகள் மூலம் சமூக மற்றும் தேசிய ஒற்றுமையை குலைக்கவும் செய்கிறார்கள்.

500 ஆண்டுகளுக்கு பின்னர் தற்போது பிரமாண்டமான ராமர் கோயிலில் ராமர் பிரதிஷ்டை செய்யப்பட இருக்கிறார். அந்த வகையில் இந்த தலைமுறையினர் கொடுத்து வைத்தவர்கள். ராமர் கோயிலை கட்டுவதற்கு ஏராளமானோர் உயிர் தியாகம் செய்திருக்கின்றனர். இனி உத்தரப் பிரதேசம் ராமர் ஆட்சியின் கீழ் மேலும் செழிப்பாக வளரும்" என்று கூறியுள்ளார்.

English summary

Uttar Pradesh Chief Minister Yogi Adityanath has said that the Bharatiya Janata government's welfare schemes are the foundation of Rama Rajya.