விவேகானந்தரின் விஜயமே.. நல்லாட்சி தருக.. மதுரையில் அதகளப்படும் விஜய் ரசிகர்களின் போஸ்டர்கள்
மதுரை: விவேகானந்தரின் விஜயமே, நல்லாட்சி தருக என மதுரையில் நடிகர் விஜய்க்கு அவரது ரசிகர்கள் போஸ்டர் ஒட்டியுள்ளது பரபரப்பை ஏற்படுத்தியுள்ளது. ஏற்கெனவே விஜய் திருமண நாளின் போது விஜயை எம்ஜிஆராகவும் அவரது மனைவி சங்கீதாவை ஜெயலலிதாவாகவும் சித்தரித்து போஸ்டர் ஒட்டப்பட்டது குறிப்பிடத்தக்கது.
நடிகர்கள் அரசியலுக்கு வருவது இந்த உலகிற்கு புதிதல்ல. அரசியலில் பெட்டிக் கடைக்காரர் முதல் ஹாலிவுட் ஆர்டிஸ்ட் வரை ஏராளமானோர் அரசியலில் ஜொலிக்கிறார்கள். அந்த வகையில் தமிழகத்தில் அண்ணா, எம்ஜிஆர், கருணாநிதி, ஜெயலலிதா என சினிமாவிலும் நாடகத்திலும் நடித்தவர்கள் அரசியலில் தங்களுக்கென ஒரு முத்திரை பதித்தனர்.
அது போல் ரஜினிகாந்தை 25 ஆண்டுகளுக்கும் மேலாக அவரது ரசிகர்கள் அரசியலுக்கு அழைத்து வருகிறார்கள். நடிகர் விஜயையும் சிம்புவையும் சூர்யாவையும் அரசியலுக்கு அழைத்து வருவது தொடர்கதையாகியுள்ளது.
ரெய்டு
இந்த நிலையில் நடிகர் விஜயின் சர்கார் திரைப்படம், அண்மையில் நடந்த ரெய்டு ஆகியவற்றிற்கு விஜய்க்கு அவரது ரசிகர்கள் ஆதரவு அளித்துள்ளனர். கடந்த வாரம் விஜய்- சங்கீதாவுக்கு 20-ஆம் ஆண்டு திருமண விழாவையொட்டி மதுரையில் வினோதமான போஸ்டரை ஒட்டியிருந்தனர்.
சங்கீதாவுக்கு அழைப்பு
அதில் புரட்சித் தலைவியே- புரட்சித் தலைவரே என சங்கீதாவையும் விஜயையும் அழைத்த ரசிகர்கள், அவர்களை ஜெயலலிதாவாகவும் எம்ஜிஆராகவும் சித்தரித்திருந்தனர். இதன் மூலம் விஜய்யை போல் அவரது மனைவியையும் ரசிகர்கள் அரசியலுக்கு அழைக்கிறார்களா என்ற கேள்வி எழுந்தது.
போஸ்டரில் ரசிகர்கள்
இந்த நிலையில் விவேகானந்தர் படத்தை போஸ்டரில் போட்டுள்ள ரசிகர்கள் விஜய்யும் காவி உடை அணிந்திருக்கும் புகைப்படத்தை அச்சிட்டுள்ளனர். மேலும் நாடு நலம் பெற 100 இளைஞர்கள் வேண்டும் என்றார் விவேகானந்தர். தளபதியே உன்னிடம் இருப்பதோ பல்லாயிரக்கணக்கான இளைஞர்கள் என குறிப்பிட்டுள்ளனர்.
நல்லாட்சி தருக
மேலும் விவேகானந்தரின் விஜயமே வருக.. நல்லாட்சி தருக.. என போஸ்டரில் குறிப்பிட்டு அது வைரலாகி வருகிறது. ஏற்கெனவே எம்ஜிஆர், ஜெயலலிதாவாக சித்தரித்து ஒட்டப்பட்ட போஸ்டர் குறித்து அதிமுகவினர் கூறுகையில், சின்னப்பசங்க ஏதோ புரியாமல் ஒட்டிவிட்டனர் என்றது குறிப்பிடத்தக்கது.
Click it and Unblock the Notifications
Sign in with Google