மதுரையில் அதிமுகவை கொத்தாக வளைக்கும் தவெக.. உட்கட்சிப் பூசலால் நிர்மல் குமாருக்கு புதிய தலைவலி?
மதுரை: உள்ளாட்சித் தேர்தல் நெருங்கி வரும் சூழலில், மதுரையில் அதிமுகவின் கவுல்சிலர்கள் மற்றும் மாவட்ட அளவிலான நிர்வாகிகள் பலரும் தவெக பக்கம் சாயத் தொடங்கி இருக்கின்றனர். இவர்களை கொத்தாக தவெகவில் இணைக்க அமைச்சர் சிடிஆர் நிர்மல் குமார் தீவிரமாக களமிறங்கி இருக்கிறார். இதனால் மதுரையில் தவெகவிலேயே கோஷ்டி பூசல் தொடங்கி இருக்கிறது.
தமிழகத்தில் உள்ளாட்சித் தேர்தல் நெருங்கி வரும் சூழலில், தென் மாவட்டங்களின் அரசியல் மையமான மதுரையில் மிக முக்கிய அரசியல் திருப்பங்கள் அரங்கேறத் தொடங்கியுள்ளன. நாடாளுமன்ற மற்றும் சட்டமன்றத் தேர்தல்களைத் தொடர்ந்து, உள்ளாட்சித் தேர்தலிலும் தங்களது பலத்தைக் காட்ட அனைத்து கட்சிகளும் வியூகம் வகுத்து வருகின்றன.
மதுரையில் அதிமுகவின் முக்கியப் புள்ளிகள் தவெக நோக்கி படையெடுக்கத் தொடங்கியுள்ளனர். மதுரை மாநகராட்சி மற்றும் மாவட்ட அளவில் உள்ள அதிமுகவின் முன்னாள், இந்நாள் கவுன்சிலர்கள் மற்றும் மாவட்ட அளவிலான நிர்வாகிகள் பலரும் தவெக பக்கம் சாயத் தொடங்கி இருக்கின்றனர். அதிமுக நிர்வாகிகளை வளைக்க அமைச்சர் சி.டி.ஆர். நிர்மல் குமார் தீவிரமாக களத்தில் இறங்கியுள்ளார்.
உள்ளாட்சித் தேர்தலில் மதுரையை முழுமையாகக் கைப்பற்ற வேண்டும் என்ற இலக்குடன், அதிமுக நிர்வாகிகளை 'கொத்தாக' இழுத்து தவெக-வில் இணைக்கும் அசைன்மென்ட்டை அவர் கையில் எடுத்துள்ளார். இதற்காக ரகசிய பேச்சுவார்த்தைகளை அமைச்சர் நிர்மல் குமார் மதுரையில் முகாமிட்டு காய் நகர்த்தி வருகிறார்.
அதிமுகவினர் பெருமளவில் தவெக-வில் இணையத் தொடங்கியுள்ளது கட்சிக்கு ஒருபுறம் பல சேர்க்கிறது என்றாலும், மறுபுறம் தவெக-வுக்குள்ளேயே மிகப்பெரிய சலசலப்பை ஏற்படுத்தியுள்ளது. ஆரம்பம் முதலே கட்சிக்காக உழைத்த தவெக-வின் மூத்த மற்றும் உள்ளூர் நிர்வாகிகள், மாற்றுக்கட்சியிலிருந்து கொத்தாக வருபவர்களுக்கு முக்கியத்துவம் தரப்படுவதைக் கண்டு கடும் அதிர்ச்சியடைந்துள்ளனர்.
உள்ளாட்சித் தேர்தலில் தங்களுக்கு கிடைக்க வேண்டிய கவுன்சிலர் மற்றும் முக்கியப் பதவிகளுக்கான வாய்ப்புகளை இந்த புதிய வரவுகள் தட்டிப்பறித்து விடுவார்களோ என்ற அச்சம் பழைய நிர்வாகிகளிடம் எழுந்துள்ளது. அதற்கேற்ப மாவட்டச் செயலாளர்களும் கவுன்சிலர் சீட்டுக்கு ரூ.15 லட்சம் என்ற அளவில் இப்போதே கல்லா கட்ட தொடங்கி இருக்கின்றனர்.
அதிமுகவினரின் இந்த அதிரடித் தாவலால், மதுரையில் தவெக-விற்குள்ளேயே தற்போது புதிய கோஷ்டி பூசல் மற்றும் உட்கட்சிப் பூசல் பகிரங்கமாக வெடிக்கத் தொடங்கியுள்ளது. இதனிடையே அதிமுக முன்னாள் அமைச்சர் விஜயபாஸ்கர் 24 ஒன்றியச் செயலாளர்கள், 8 நகரச் செயலாளர்கள், மாவட்ட அளவிலான 40 நிர்வாகிகளுடன் தவெகவில் இணைய இருக்கிறார்.
இதேபோல் மதுரையைச் சேர்ந்த முக்கிய அதிமுக புள்ளி ஒருவரும் பெரும் தொண்டர் பலத்துடன் தவெக பக்கம் வரப் போகிறார் என்ற பேச்சுகள் எழுந்துள்ளன. ஏற்கனவே அழகிரியின் மகள் கயல்விழி தவெகவில் இணைய காய் நகர்த்தி வருகிறார். இதனால் அதிமுகவின் மன்னன், எஸ்ஸார் கோபி உள்ளிட்டோர் தவெக பக்கம் வருவார்கள் என்ற பேச்சுகள் எழுந்துள்ளன.
Click it and Unblock the Notifications
Sign in with Google