மதுரை அதிமுகவுக்கு மீண்டும் தோல்வி.. மன்னன் விவகாரத்தில் கடைசி நேரத்தில் ட்விஸ்ட்.. என்ன நடந்தது?

Updated: Wednesday, February 18, 2026, 12:24 [IST]

Subscribe to Oneindia Tamil

மதுரை: மதுரையில் மு.க.அழகிரியின் மொத்த ஆதரவாளர்களையும் கூண்டோடு தூக்க அதிமுக எடுத்த முயற்சிகள் தோல்வியில் முடிந்துள்ளது. கடைசி நேரத்தில் முன்னாள் துணை மேயர் மன்னனை தவிர்த்து அத்தனை முக்கிய ஆதரவாளர்களும் எஸ்கேப் ஆகிவிட்டதாக தெரிய வந்துள்ளது. இதனால் அதிமுக தலைமையும் அப்செட்டாகி இருக்கிறது.

2014ஆம் ஆண்டுக்கு பின் மதுரையில் மு.க.அழகிரியின் அரசியல் வாழ்க்கை முடிவுக்கு வந்தது. இதனால் அழகிரியின் ஆதரவாளர்களும் கொஞ்சம் கொஞ்சமாக அடங்கினர். தொடர்ந்து திமுக மொத்தமாக ஸ்டாலினின் கைகளுக்குள் சென்ற பின்னர், மு.க.அழகிரியின் சில ஆதரவாளர்கள் ஸ்டாலின் பக்கம் சாய்ந்தனர். குறிப்பாக தளபதி, எஸ்ஸார் கோபி, ஜெயராம் ஆகியோர் ஸ்டாலின் பக்கம் சென்றனர்.

இருந்தாலும் மு.க.அழகிரியின் விஸ்வாசிகள் பலரும் அவருடன் இருந்து வந்தனர். எந்தவித அரசியல் செயல்பாடுகளும் இல்லாமல், திமுகவில் பணியாற்றும் வாய்ப்பு கிடைக்கும் என்று கருதினர். மன்னன், இசக்கிமுத்து, உதயகுமார், எம்எல் ராஜ், கோபிநாதன், முபாரக் மந்திரி, சின்னா உள்ளிட்ட பலரும் எந்தவித அரசியல் செயல்பாடுகளிலும் ஈடுபடாமல் இருந்தனர்.

அண்மையில் கூட ஸ்டாலின் திண்டுக்கல் வந்த போது மன்னன் அவரை சந்தித்து திமுகவில் பணியாற்ற வாய்ப்பு கோரி இருந்தார். ஆனால் ஏற்கனவே அமைச்சர் மூர்த்தி, பிடிஆர் பழனிவேல் தியாகராஜன் மற்றும் தளபதி என்று மூன்று முக்கிய நிர்வாகிகள் இருக்கிறார்கள். தற்போது அழகிரியின் ஆதரவாளர்களை சேர்த்தால், அது சிக்கலாகும் என்று ஸ்டாலின் கருதினார். இதனால் எந்த முடிவும் எடுக்கவில்லை.

இந்த நிலையில் அதிமுக முன்னாள் அமைச்சர் செல்லூர் ராஜு மூலமாக மன்னன் தரப்புடன் அதிமுக தலைமை பேச்சுவார்த்தையை நடத்தியது. மதுரையில் அதிமுக கொஞ்சம் கொஞ்சமாக சரிவை சந்தித்து வருவதால், அழகிரியின் ஆதரவாளர்களை கட்சியில் இணைக்க தீவிரம் காட்டினர். அதற்கேற்ப ஜெயலலிதாவின் பிறந்தநாள் விழாவான ஜனவரி 24ல் மதுரையில் மிகப்பெரிய விழா நடத்த திட்டமிடப்பட்டிருந்தது.

அதிமுக ரகசியமாக வைத்திருந்தாலும், திமுக கண்டறிந்தது. இதன்பின் மு.க.அழகிரியின் ஆதரவாளர்களுடன் பேச்சுவார்த்தை நடத்தப்பட்டிருக்கிறது. சட்டசபைத் தேர்தலுக்கு பின் பார்க்கலாம் என்று திமுக தரப்பில் சிக்னல் கொடுக்கப்பட, இந்த விவகாரம் அதிமுகவுக்கும் தெரிந்துவிட்டது. இதனால் அவசர அவசரமாக நேற்றே மன்னன் தரப்பை கட்சியில் இணைத்திருக்கின்றனர்.