மீனாட்சியை பார்க்க முடியல! நிர்மல்குமாரை விட்டு விளாசிய பொதுமக்கள்! மதுரை கும்பாபிஷேகத்தில் குளறுபடி

மதுரை: உலகப் புகழ்பெற்ற மதுரை மீனாட்சி சுந்தரேஸ்வரர் திருக்கோவிலில் 17 ஆண்டுகளுக்குப் பிறகு இன்று மிக விமரிசையாக மகா கும்பாபிஷேகம் நடைபெற்றது. இந்த வரலாற்றுச் சிறப்புமிக்க ஆன்மிக நிகழ்வைக் காண தமிழகம் முழுவதிலும் இருந்தும், வெளிமாநிலங்களில் இருந்தும் லட்சக்கணக்கான பக்தர்கள் மதுரையில் குவிந்தனர். ஆனால், தமிழக வெற்றி கழக அரசு செய்த மிக மோசமான முன்னேற்பாடுகள் மற்றும் அதிகாரிகளின் அலட்சியத்தால் ஒட்டுமொத்த விழாவும் பெருங்குழப்பத்தில் முடிந்துள்ளது.

கடும் வெயிலிலும் கூட்ட நெரிசலிலும் மணிக்கணக்கில் காத்திருந்த ஏழை, எளிய பொதுமக்களுக்கு அம்மனைத் தரிசிக்க அனுமதி மறுக்கப்பட்டு, செல்வாக்கு படைத்த அரசியல் பிரமுகர்களுக்கும் விஐபிகளுக்கும் மட்டுமே சிறப்பு டோக்கன்கள் வாரி வழங்கப்பட்டதாகக் கூறி மதுரை மண்ணில் பக்தர்கள் கொந்தளித்துள்ளனர்.

ஏமாற்றத்தில் ஆழ்ந்த பொதுமக்கள்

இன்று அதிகாலை 7:40 மணி முதல் 8:10 மணிக்குள் கோபுர கலசங்களுக்கும் மூலஸ்தான தங்க விமானங்களுக்கும் புனித நீர் ஊற்றப்பட்டு கும்பாபிஷேகம் நடைபெற்றது. இதற்காக நேற்று இரவிலிருந்தே ஆயிரக்கணக்கான தாய்மார்கள், முதியவர்கள், குழந்தைகள் சித்திரை வீதிகளிலும் ஆவணி மூல வீதிகளிலும் கண்விழித்துக் காத்திருந்தனர்.

ஆனால், கும்பாபிஷேகம் தொடங்குவதற்கு முன்பே முக்கிய நுழைவு வாயில்கள் அனைத்தும் அதிரடியாக அடைக்கப்பட்டன. சாமானிய மக்கள் எவரும் உள்ளே நுழைய முடியாதபடி கடுமையான தடுப்புகள் அமைக்கப்பட்டன. நேரில் நின்று மீனாட்சி அம்மனின் அருளைப் பெறலாம் என்று பல மைல் தூரம் பயணித்து வந்த கிராமத்து மக்களுக்கு மிஞ்சியது ஏமாற்றமும் அலைக்கழிப்பும்தான்.

விஐபிகளுக்கு சிவப்புக் கம்பளம்: சாமானியர்களுக்குத் தடியடியா?

பொதுமக்கள் ஒருபுறம் உள்ளே செல்ல வழியின்றி தவித்துக் கொண்டிருக்க, மறுபுறம் ஆளும் கட்சிப் பிரமுகர்கள், அரசு உயரதிகாரிகள் மற்றும் முக்கிய விஐபிகள் மட்டும் தாராளமாக உள்ளே அனுமதிக்கப்பட்டனர். அவர்களுக்குச் சிறப்பு டோக்கன்களும் விஐபி பாஸ்களும் எளிதாக வழங்கப்பட்டிருந்தன.

சுமார் 17 ஆண்டுகள் தவமிருந்து அம்மனைப் பார்க்க வந்த தாய்மார்கள், "எங்களுக்கு எட்டாத கடவுளாக மீனாட்சி மாறிவிட்டாளா? விஐபிகளுக்கு மட்டும்தான் அம்மனா? நாங்கள் வரிசையில் நின்று உயிரைக் கொடுக்க வேண்டுமா?" என்று கண்ணீருடன் கேள்வி எழுப்பினர். கூட்டத்தைக் கட்டுப்படுத்துகிறோம் என்ற பெயரில் காவல்துறையினர் பக்தர்களைத் தள்ளிவிட்டதும், முதியவர்கள் கூடக் கீழே விழுந்து தவித்ததும் அங்கிருந்தோரை மேலும் ஆத்திரமடையச் செய்தது. அடிப்படை வசதிகளான குடிநீர், தற்காலிக கழிப்பறை வசதிகள் கூடப் போதிய அளவில் செய்யப்படவில்லை எனப் பக்தர்கள் குற்றம் சாட்டினர்.

அமைச்சர் நிர்மல் குமாரை முற்றுகையிட்ட பெண்கள்

நிகழ்விடத்தில் ஆய்வு செய்ய வந்த அமைச்சர் நிர்மல் குமாரை, அங்கு நின்றுகொண்டிருந்த பொதுமக்கள் மற்றும் பெண்கள் கூட்டம் திடீரென முற்றுகையிட்டது. உள்ளே செல்ல அனுமதிக்கப்படாததால் ஆத்திரத்தின் உச்சிக்கே சென்ற தாய்மார்கள், அமைச்சரை நேருக்கு நேர் நிறுத்தி சரமாரியாகக் கேள்விகள் எழுப்பினர்.

"அதிகாரத்தில் இருப்பவர்களுக்கு மட்டும் எப்படி டோக்கன் கிடைத்தது? நள்ளிரவில் இருந்து பச்சைக் குழந்தையோடு வழியில் கிடக்கிறோமே, எங்களுக்கு என்ன பதில் சொல்லப் போகிறீர்கள்?" என்று பெண்கள் கூச்சலிட்டனர்.

இதுளா சும்மா Sample தான் கண்ணா போக போக தான் இருக்கு ..!! pic.twitter.com/JP0TQkJ8ED

— சிலுவை (@SiluvaM_) September 17, 2026

திடீர் முற்றுகையால் திணறிப்போன அமைச்சர் நிர்மல் குமார், பொதுமக்களின் கோபத்தைத் தணிக்க முடியாமலும், உடனடித் தீர்வு எதையும் சொல்ல முடியாமலும் மௌனமாக நின்றார். மக்களின் ஆக்ரோஷம் அதிகமானதால், காவல்துறையினர் விரைந்து வந்து அமைச்சரைச் சுற்றி பாதுகாப்பு வளையம் அமைத்து அங்கிருந்து அவரை அப்புறப்படுத்த வேண்டிய நிலை ஏற்பட்டது. அமைச்சரின் இந்த மௌனமும் அலட்சியமும் அங்கு நின்ற மக்களை மேலும் ஆத்திரமடைய வைத்தது.

அரசு நிர்வாகத்தின் தோல்வி

பல மாதங்களுக்கு முன்பே திட்டமிடப்பட்ட ஒரு சர்வதேச அளவிலான திருவிழாவை, ஒரு சிறிய அளவிலான உள்ளூர் கூட்டம் போல அரசு கையாண்ட விதம் பெரும் விமர்சனத்திற்கு உள்ளாகியுள்ளது. லட்சக்கணக்கான பக்தர்கள் வருவார்கள் என்று தெரிந்தும் போதிய இடவசதி, நேரடி வரிசை மேலாண்மை, வெளிப்படையான பாஸ் விநியோகம் போன்ற எதையுமே அரசு சரியாகச் செய்யவில்லை.

முழுக்க முழுக்க அரசியல் பிரமுகர்களைத் திருப்திப்படுத்துவதிலேயே அரசு கவனம் செலுத்தியதாகவும், அதன் விளைவாக சாமானியப் பொதுமக்களின் ஆன்மிக உணர்வு காலில் போட்டு மிதிக்கப்பட்டுவிட்டதாகவும் மக்கள் சாடுகின்றனர்.

மதுரையின் வரலாற்றில் பொன் எழுத்துக்களால் பொறிக்கப்பட வேண்டிய இந்தத் திருக்குட நன்னீராட்டு விழா, அரசின் நிர்வாகச் சீர்கேட்டாலும், விஐபி கலாச்சாரத்தாலும் சாதாரண பக்தர்களுக்குக் கசப்பான அனுபவமாகவே மாறிப்போனது பெரும் சோகம்.

English summary

Chaos at Madurai Meenakshi Temple Kumbabishekam: Public vs Minister Nirmal Kumar