48 ஆண்டுகளுக்கு பின்.. மதுரையில் திமுக பொதுக்குழு கூட்டம்.. முக்கிய தீர்மானங்கள் நிறைவேற்றம்!

மதுரை: 48 ஆண்டுகளுக்கு பின் மதுரையில் இன்று திமுகவின் பொதுக்குழு கூட்டம் நடக்கவுள்ளது. முதல்வர் ஸ்டாலின் தலைமையிலான கூட்டத்தில் சுமார் 10 ஆயிரம் திமுகவினர் பங்கேற்க உள்ளனர். இந்த பொதுக்குழு கூட்டத்தில் அரசியல் முக்கியத்துவம் வாய்ந்த தீர்மானங்கள் நிறைவேற்றப்பட உள்ளதாக தகவல் கிடைத்துள்ளது.

மதுரையில் 48 ஆண்டுகளுக்கு பின் திமுகவின் பொதுக்குழு கூட்டம் இன்று நடக்கிறது. திமுகவின் பொதுக்குழு கூட்டத்திற்கு உத்தங்குடியில் சுமார் 20 ஏக்கர் பரப்பளவில் பிரம்மாண்டமான அரங்குகள் அமைக்கப்பட்டுள்ளன. அண்ணா அறிவாலயம் போன்று செட் அமைக்கப்பட்டு, முழுக்க முழுக்க குளிரூட்டப்பட்ட அரங்களுகள் அமைக்கப்பட்டுள்ளன.

10 ஆயிரம் பேர் பங்கேற்பு

முதல்வரும், திமுக தலைவருமான மு.க.ஸ்டாலின் தலைமையில் நடக்கும் இந்த கூட்டத்தில் சுமார் 10 ஆயிரம் பேர் பங்கேற்க உள்ளனர். பொதுச்செயலாளர் துரைமுருகன், துணைப் பொதுச்செயலாளர்கள், அமைச்சர்கள், எம்பி-க்கள், மாநில நிர்வாகிகள், மாவட்ட நிர்வாகிகள், பொதுக்குழு உறுப்பினர்கள், பார்வையாளர்கள் என்று ஏராளமானோர் பங்கேற்கின்றனர்.

கொடி ஏற்றி வைக்கும் ஸ்டாலின்

அதேபோல் கட்சி அமைப்பு ரீதியாக பிரிக்கப்பட்ட 8 மண்டலங்களில் உள்ள 76 மாவட்டங்களுக்கும் அரங்கத்தில் தனித்தனி இடங்கள் ஒதுக்கீடு செய்யப்பட்டுள்ளன. காலை 9 மணியளவில் இந்த திமுக பொதுக்குழு கூட்டம் தொடங்க உள்ளது. இதன் முதல் நிகழ்வாக பிரம்மாண்ட அரங்கிற்கு முன் அமைக்கப்பட்டுள்ள 100 அடி உயர கம்பத்தில் முதல்வர் மு.க.ஸ்டாலின் கட்சிக் கொடியை ஏற்றி வைக்கிறார்.

பொதுக்குழு

இதனைத் தொடர்ந்து புதிய நிர்வாகிகள் நியமனம், பொறுப்பாளர்கள் நியமனம், தேர்தல் பணி உள்ளிட்டவை குறித்து புதிய முடிவுகள் எடுக்கப்படலாம் என்று கூறப்படுகிறது. சட்டமன்றத் தேர்தலில் தென் மாவட்டத்தில் கூடுதல் இடங்களை வெல்ல வேண்டும் என்பதையும், நிர்வாகிகளையும் உற்சாகமாக வைக்கவும் இந்த பொதுக்குழு கூட்டம் மதுரையில் நடத்தப்படுவதாக பார்க்கப்படுகிறது.

சைவ, அசைவ விருந்து

இதற்காக நேற்றே மதுரை வந்த மு.க.ஸ்டாலின், சுமார் 25 கிமீ தூரத்திற்கு மிகப்பெரிய ரோடு ஷோ ஒன்றை நடத்தினார். அவருக்கு பொதுமக்கள் மத்தியில் மிகப்பெரிய வரவேற்பு அளிக்கப்பட்டது. இதன்பின் இரவில் சகோதரர் மு.க.அழகிரியை சந்தித்த மு.க.ஸ்டாலின், இன்று திமுகவின் பொதுக்குழு கூட்டத்தில் பங்கேற்க உள்ளார். இந்த கூட்டத்தில் பங்கேற்கும் திமுகவினருக்கு பிரம்மாண்ட சைவ, அசைவ விருந்தும் ஏற்பாடு செய்யப்பட்டுள்ளது.

English summary

DMK held its General Council meeting in Madurai on June 1, 2025, after a 48-year gap, marking a significant step toward the 2026 Tamil Nadu Assembly elections. Chaired by Chief Minister M.K. Stalin, the meeting passed key resolutions on state autonomy, linguistic rights, secularism, social justice, and criticism of the Governor’s office while unveiling a comprehensive election work plan.