பாஜக அழிய ஆரம்பிச்சிருச்சு.. இத தெரிந்தும் தமிழிசை இப்படி பேசினால் எப்படி.. இளங்கோவன் கிண்டல்
தமிழக பாஜக தலைவர் தமிழிசையின் கருத்துக்கு இளங்கோவன் விமர்சனம்
மதுரை: தன் கட்சியையே காப்பாற்றி கொள்ள முடியாத பாஜக அரசு, அதிமுக அரசை எப்படி காப்பாற்றும் என்று முன்னாள் காங்கிரஸ் கமிட்டி தலைவர் ஈவிகேஎஸ் இளங்கோவன் கேள்வி எழுப்பி உள்ளார்.
மதுரையில் ஈவிகேஎஸ் இளங்கோவன் செய்தியாளர்களை சந்தித்து பேசினார். அப்போது அவர் சொன்னதாவது:
மத்தியில் ஆளும் மோடி தலைமையிலான அரசு அதிமுக அரசை காப்பாற்றும் என்று தமிழக முதல்வர் எடப்பாடி பழனிசாமி நம்பிக்கை கொண்டுள்ளார்.
வெற்றிகரமான தோல்வி
ஆனால் இப்போதைக்கு தன்னையே காப்பாற்றி கொள்ள முடியாத பாஜக எப்படி அதிமுக அரசையும் சேர்த்து காப்பாற்றும்? 5 மாநில தேர்தல் முடிவுகள் வெளிவந்த நிலையில், அது பாஜகவுக்கு வெற்றிகரமான தோல்வி என்று தமிழக பாஜக தலைவர் தமிழிசை சவுந்தராஜன் சொல்கிறார்.
அழிந்து வருகிறது
அவர் விரக்தியில்தான் இப்படி சொல்கிறார். உண்மையில் பாஜக கட்சி அழிந்து வருகிறது. இது தெரிந்தும்தான் தமிழிசை அவ்வாறு சொல்கிறார்.
வார்டில் ஜெயிக்கலாம்
அதனால் தமிழிசை, பாஜகவிலிருந்து விலகி வேறு கட்சியில் சேரலாம். அப்போதுதான் அவர் வார்டு அளவிலாவது ஜெயிக்க முடியும்.
கட்சி கரைகிறது
டிடிவி தினகரன் காங்கிரஸ் கட்சி மீது அக்கறை செலுத்துவதை விட்டு விட்டு, கரைந்து வரும் தன் கட்சியை காப்பாற்ற முயல வேண்டும். தமிழகத்தில் திமுக-காங்கிரஸ் தலைமையிலான கூட்டணி வலுவாக உள்ளது. தமிழகம், புதுச்சேரி உள்ளிட்ட 40 தொகுதிகளிலும் ஆட்சியை பிடிக்கும்" என்றார்.