பூமராங் ஆன கிண்டல்! பைனாகுலரோடு வந்த மதுரை அதிமுக வேட்பாளர் சரவணன்.. லென்ஸ் மூடியை கழட்டவே இல்லையே!

மதுரை: மதுரை லோக்சபா தொகுதியில் போட்டியிடும் அதிமுக வேட்பாளர் டாக்டர் சரவணன், பைனாகுலரோடு தேர்தல் பிரச்சாரத்திற்கு வந்துள்ளார். சு.வெங்கடேசனை கிண்டல் செய்ய முயன்ற சரவணன், லென்ஸ் மூடியை கழற்றாமல் பார்த்துக் கொண்டிருந்ததால் நெட்டிசன்களின் கிண்டலுக்கு உள்ளாகி வருகிறார்.

மக்களவைத் தேர்தலில் மதுரை லோக்சபா தொகுதியில் திமுக கூட்டணியில் மார்க்சிஸ்ட் கம்யூனிஸ்ட் கட்சியின் சார்பில் சிட்டிங் எம்.பி. சு.வெங்கடேசன், அதிமுக சார்பில் டாக்டர் சரவணன், பாஜக சார்பில் ராம சீனிவாசன், நாம் தமிழர் கட்சியின் சார்பில் சத்தியதேவி ஆகியோர் போட்டியிடுகின்றனர்.

நான்கு முனைப் போட்டி நிலவும் மதுரை லோக்சபா தொகுதியில் அரசியல் கட்சிகளின் பிரச்சாரம் தீவிரமடைந்துள்ளது. இந்நிலையில் திமுக கூட்டணி வேட்பாளர் சு.வெங்கடேசன், அதிமுக வேட்பாளர் சரவணன் ஆகிய இருவரும் தீவிர தேர்தல் பிரச்சாரம் செய்து வருகின்றனர்.

இந்நிலையில், மதுரை தொகுதி அதிமுக வேட்பாளர் சரவணன் பைனாகுலருடன் தேர்தல் பிரச்சார மேடையேறி வருகிறார். பைனாகுலரை வைத்து, மதுரை எம்.பி சு.வெங்கடேசன் செய்த திட்டங்களை பார்ப்பதாக கூறி கிண்டலாக பேசி வருகிறார் டாக்டர் சரவணன்.

சரவணன் பேசுகையில், "மதுரையில் நாடாளுமன்ற உறுப்பினரை சு.வெ என்பார்கள். சும்மாவே இருந்தாரு.. சும்மாவே இருக்கப்போறார் என தெரிந்ததால அவருக்கு அப்படி பெயர் வைத்தார்களா என்று தெரியவில்லை. அவர் ஒரு ட்விட்டர் அரசியல்வாதி. ஆன்லைனில் மட்டும் தான் இருப்பார், மக்களை நேரில் சந்தித்ததே கிடையாது. அவர் கதை எழுதிக் கொண்டிருந்தார். இப்போது கதை விட்டுக்கொண்டிருக்கிறார். இதை செய்தேன், அதை செய்தேன் என கதை விடுகிறார்.

மதுரை எம்.பி சு.வெங்கடேசன் இங்கு செய்த திட்டங்கள், பணிகள் கண்ணில் தென்படுகிறதா என்று பார்க்க பைனாகுலர் கொண்டு வந்தேன். எங்கேயாவது ஏதாவது அவர் செய்த திட்டங்கள் தென்படுகிறதா என பார்க்கிறேன். ஆனால் அவர் செய்த எதுவுமே என் கண்களுக்கு தெரியவில்லை." என்று கேலியாக பேசினார்.

ஆனால், அதிமுக வேட்பாளர் டாக்டர் சரவணன் பார்த்துக் கொண்டிருந்த பைனாகுலரின் லென்ஸ் மூடியை அவர் கழற்றவில்லை. இதனைச் சுட்டிக்காட்டி, எதிர்க்கட்சியினர், நெட்டிசன்கள் சமூக வலைதளங்களில் சரவணனை கிண்டல் செய்து வருகின்றனர். சு.வெங்கடேசனை கிண்டல் செய்ய பைனாகுலர் ஆயுதம் எடுத்த டாக்டர் சரவணன், கிண்டலுக்கு உள்ளாகியுள்ளார்.

English summary

AIADMK candidate Dr. Saravanan, who is contesting from the Madurai Lok Sabha constituency, has come to the election campaign with binocular to see Su venkatesan's achievements.