மதுரை பாஜக நிர்வாகி கெத்துக்காட்ட நினைத்து எப்போதோ வெளியிட்ட வீடியோ.. இப்போது என்னாச்சு பாருங்க

மதுரை: ஆயுதங்களை இடுப்பில் மறைத்துவைத்து வெளியில் எடுப்பது போல் வீடியோ எடுத்து, கெத்துக்காக வீடியோ வெளியிட்ட பாஜக இளைஞரணி மதுரை மாநகர் மாவட்ட செயலாளர் ஸ்ரீகாந்த் கைது செய்யப்பட்டு சிறையில் அடைக்கப்பட்டுள்ளார்.

ஆயுதங்களை காட்டி அச்சுறுத்தும் வகையில் வீடியோ வெளியிடுவது குற்றமாகும். ஆயுதங்களை காட்டி அச்சுறுத்தும் வகையில் நடந்து கொண்டால் நடவடிக்கை எடுப்பது போல், வீடியோ வெளியிடுவோர் மீதும் நடவடிக்கை எடுக்கப்படுகிறது.

அதன்படி தான் பிறந்த நாள் கேக்கை வாள்களில் வெட்டிய பல ரவுடிகள் அதற்காக தனியே சிறையில் கம்பி எண்ணினார்கள். இதேபோல் விளையாட்டிற்காக கேக்கை அரிவாளால் அல்லது வாளால் வெட்டியவர்களும் சிறையில் கம்பி எண்ணும் நிலையும் ஏற்பட்டது. போலீசார் கைது நடவடிக்கைகள் தொடர்ந்ததால் ஆயுதங்களை காட்டி வீடியோ வெளியிடுவது சமூக வலைதளங்களில் குறைந்து போனது.

இந்நிலையில் ஆயுதங்களை இடுப்பில் மறைத்து வைத்து வெளியில் எடுப்பது போன்று வீடியோ வெளியிட்ட பாஜக இளைஞரணி மதுரை மாவட்ட செயலாளர் ஸ்ரீகாந்த் கைது செய்யப்பட்டுள்ளார். இதில் முக்கியமான விஷயம் என்னவென்றால், இந்த வீடியோ இப்போது எடுக்கப்பட்டது அல்ல..

ஒன்றரை ஆண்டுகளுக்கு முன்பு கோவையில் எடுக்கப்பட்ட இந்த வீடியோ இப்போது வேகமாக பரவிய நிலையில், மதுரை தல்லாகுளம் காவல் நிலையத்தில் வழக்கு பதிவு செய்யப்பட்டது. அதன்பின்னர் தான் பாஜக இளைஞரணி மதுரை மாவட்ட செயலாளர் ஸ்ரீகாந்த் கைது செய்யப்பட்டார். அதன்பின்னர் நீதிமன்ற காவலில் சிறையில் அடைக்கப்பட்டுள்ளார்.

இதனிடையே அபாயகரமான ஆயுதங்களுடன் புகைப்படங்கள் / வீடியோக்களை பதிவிடும் நபர்கள், கோரமான ஆயுதங்களைக் கொண்டு விழாக்களில் கேக் வெட்டும் நபர்கள், அச்சுறுத்தும் தொனியில் ஆயுதங்களுடன் BGM கொண்ட வீடியோக்கள் பதிவிடும் நபர்களின் விவரங்களை 94874 64651 என்ற எண்ணிற்கு தெரிவிக்கலாம் என திருச்சி மாவட்ட காவல் கண்காணிப்பாளர் வருண் குமார் அறிவித்துள்ளார்.

அதேபோல் இளைஞர்கள் கவனிக்க வேண்டிய விஷயம்.. வீலிங் செய்து இன்ஸ்டாகிராமில் அல்லது பேஸ்புக்கில் வீடியோ வெளியிட்டாலும் சிக்கலில் சிக்க வாய்ப்பு உள்ளது. யாராவது உங்கள் பதிவை டேக் செய்து புகார் அளித்தால் கண்டிப்பாக நடவடிக்கை எடுப்பார்கள். அபாயகரமான வகையில் சாலையில் அசுர வேகத்தில் சென்று வீலிங் செய்தவர்கள் வீடியோ இன்ஸ்டாகிராமில் கெத்துக்காக பதிவிட்டிருப்பார்கள். அப்படி பதிவிட்டவர்கள் சிக்கலில் சிக்கும் வாய்ப்பு உண்டு.

English summary

Madurai BJP Municipal District youth Secretary Srikanth arrested by thallakulam police for posting video with weapons. see the full details in news.