டிசம்பர் 7.. மதுரைக்கு வரப்போகும் பிரம்மாண்ட அறிவிப்பு.. சஸ்பென்ஸ் வைத்த டிஆர்பி ராஜா!

Updated: Tuesday, November 25, 2025, 16:38 [IST]

Subscribe to Oneindia Tamil

மதுரை: டிசம்பர் 7ஆம் தேதி மதுரை மாவட்ட தொழில் வளர்ச்சி குறித்த முக்கிய அறிவிப்பு வெளியாக உள்ளதாக அமைச்சர் டிஆர்பி ராஜா தெரிவித்துள்ளார். கோவையில் முதலீட்டாளர்கள் மாநாட்டில் பல்வேறு ஒப்பந்தங்கள் மேற்கொள்ளப்பட்டு வரும் நிலையில், மதுரை குறித்த அப்டேட் ஒன்றையும் கொடுத்துள்ளார்.

2021ஆம் ஆண்டு தமிழ்நாட்டில் திமுக ஆட்சி அமைந்த பின் ஜல்லிக்கட்டு மைதானம், கீழடி அருங்காட்சியகம், டைடல் பார்க் உள்ளிட்ட பிரம்மாண்ட அறிவிப்புகள் வெளியாகியது. இதில் டைடல் பார்க் கட்டுமான பணிகள் தொடங்கப்பட்டு விரைவாக நடந்து வருகிறது. இருந்தாலும் சென்னை, காஞ்சிபுரம், செங்கல்பட்டு, ஒசூர், கோவை உள்ளிட்ட மாவட்டங்கள் அளவிற்கு மதுரை தொழில் வளர்ச்சி அறிவிப்புகள் வெளியாகவில்லை.

தென் மாவட்டங்களுக்கான நுழைவு வாயிலாக மதுரை இருந்த போதும், தொழில்சாலைகளுக்கான எந்த அறிவிப்பும் இல்லாதது மதுரை மக்களிடையே சோகத்தை ஏற்படுத்தி இருக்கிறது. இந்த நிலையில் கோவையில் இன்று 3வது முதலீட்டாளர்கள் மாநாடு நடைபெற்று வருகிறது. இந்த மாநாட்டில் தமிழக அரசு தரப்பில் கோவை தொழில் வளர்ச்சிக்காக ஏராளமான ஒப்பந்தங்கள் கையெழுத்தாகி வருகிறது.

ஜான்சன் எலெக்ட்ரிக், ஹூண்டாய் வியா, டெல்த் ஹெல்த்கேர் உள்ளிட்ட நிறுவனங்களும், எஸ்டிடி டேட்டா சேவை மையமும் முதலீடு செய்ய உள்ளதாக கூறப்படுகிறது. சுமார் ரூ.4,200 கோடிக்கும் அதிகமன முதலீடுகள் ஈர்க்கப்பட்டுள்ளன. இந்த நிலையில் மதுரை மாவட்டத்தைச் சேர்ந்த ஒருவர் மதுரைக்கு ஏதெனும் முதலீடுகள் ஈர்க்கப்பட்டதா என்று எக்ஸ் தளத்தில் கேள்வி எழுப்பினார்.

அதற்கு டிஆர்பி ராஜா, டிசம்பர் 7ஆம் தேதி வரை காத்திருங்கள் என்று பதில் அளித்துள்ளார். மதுரையில் கட்டப்பட்டு வரும் அப்போலோ மருத்துவமனை மேம்பாலம் பணிகள் முழுமையாக நிறைவடைந்துவிட்ட நிலையில், அதனை டிசம்பர் 7ஆம் தேதி முதல்வர் ஸ்டாலின் நேரில் வந்து திறந்து வைக்க உள்ளார்.

அப்போது மதுரை மாவட்ட தொழில் வளர்ச்சிக்கு வித்திடும் வகையில் புதிய அறிவிப்பு வெளியாகும் என்று எதிர்பார்க்கப்படுகிறது. ஏற்கனவே மதுரை மெட்ரோ திட்டம் நிராகரிக்கப்பட்டுள்ளது. அதேபோல் மதுரை எய்ம்ஸ் மருத்துவமனை 9 ஆண்டுகளாக கட்டப்பட்டு வருகிறது. சட்டசபைத் தேர்தல் நெருங்கியுள்ள சூழலில், மதுரைக்கு ஏதேனும் ஸ்பெஷல் அறிவிப்பு வெளியாகும் என்று எதிர்பார்க்கப்படுகிறது.