மதுரை காந்தி அருங்காட்சியகத்தில் ₹20 கட்டணம்.. மக்கள் ஏமாற்றம், இலவச அனுமதி கோரி வலுக்கும் குரல்!
மதுரை: மதுரையில் உள்ள வரலாற்றுச் சிறப்புமிக்க காந்தி நினைவு அருங்காட்சியகம், பல ஆண்டுகளாக பொதுமக்கள் மற்றும் சுற்றுலாப் பயணிகள் இலவசமாகப் பார்வையிடும் இடமாகவே இருந்து வந்தது. மகாத்மா காந்தியின் வாழ்க்கை வரலாறு மற்றும் அவரது நினைவுகளை அனைவரும் அறிந்துகொள்ள வேண்டும் என்ற உயரிய நோக்கில், இங்கு எப்போதுமே நுழைவுக் கட்டணம் வசூலிக்கப்பட்டதில்லை.
சமீபத்தில் சுமார் ரூ. 10.25 கோடி அரசு நிதியில் புதுப்பிக்கப்பட்ட இந்த அருங்காட்சியகம் பொதுமக்கள் பயன்பாட்டுக்காகத் திறந்து வைக்கப்பட்டது. ஆனால், திறக்கப்பட்ட சில நாட்களிலேயே இங்கு வருபவர்களிடம் நுழைவுக் கட்டணமாக ரூ. 20 வசூலிக்கப்படுவதாகப் புகார்கள் எழுந்துள்ளன. இதற்கு எழுத்தாளர்களும் சமூக ஆர்வலர்களும் கடும் எதிர்ப்பு தெரிவித்து வருகின்றனர்.
தேசப்பிதா காந்தியடிகளின் வரலாற்றுச் சுவடுகளை உள்ளூர் மக்களும், வெளியூர் மற்றும் வெளிநாட்டுப் பயணிகளும் தடையின்றிப் பார்த்துச் செல்ல வேண்டும் என்பதே இந்த அருங்காட்சியகத்தின் முக்கிய நோக்கம். ஆனால் தற்போது வசூலிக்கப்படும் இந்த 20 ரூபாய் கட்டணம் எளிய மற்றும் ஏழை மக்களைப் பெரிதும் பாதித்துள்ளது. குடும்பத்தோடு ஆசையாக அருங்காட்சியகத்தைக் காண வரும் அடித்தட்டு மக்கள், கையில் பணமில்லாமல் வாசலிலேயே நின்று ஏமாற்றத்துடன் திரும்பிச் செல்லும் நிலை ஏற்பட்டுள்ளது.
இது குறித்து கவிஞர் இரா. இரவி உள்ளிட்ட சமூக ஆர்வலர்கள் கூறுகையில், "பல தலைமுறைகளாக இலவசமாக இருந்த ஒரு வரலாற்று நினைவிடத்தில் திடீரெனக் கட்டணம் வசூலிப்பது ஏற்புடையதல்ல. இது ஏழை எளிய மக்களின் வரலாற்று அறிவைப் பறிக்கும் செயல். எனவே அரசு உடனடியாகத் தலையிட்டு, பழையபடி முழுமையான இலவச அனுமதியை வழங்க உத்தரவிட வேண்டும்" என வலியுறுத்தியுள்ளனர்.
இதற்கிடையே, இது நுழைவுக் கட்டணம் அல்ல என்றும், காந்தி வரலாற்று வழிகாட்டி கையேட்டிற்கான விருப்பக் கட்டணம் மட்டுமே என்றும் நிர்வாகத் தரப்பில் கூறப்பட்டாலும், நுழைவாயிலில் எளிய மக்களிடம் கட்டணம் வசூலிக்கப்படுவதைத் தடுத்து, அருங்காட்சியகத்தை மீண்டும் முழுமையாக இலவசமாகத் திறக்க வேண்டும் என்ற கோரிக்கை மதுரையில் வலுத்து வருகிறது.
Click it and Unblock the Notifications
Sign in with Google
