மேலூரில் மீண்டும் இறங்கும் மாணிக்கம் தாகூர் மாமனார்? சீட்டை பெற போராடும் கதர்கள்.. என்ன நடக்கிறது?

Updated: Sunday, April 5, 2026, 10:45 [IST]

Subscribe to Oneindia Tamil

மதுரை: மேலூர் தொகுதிக்கான காங்கிரஸ் கட்சியின் வேட்பாளர் இதுவரை அறிவிக்கப்படவில்லை. வேட்புமனு தாக்கலுக்கு இன்னும் ஒருநாள் மட்டுமே இருக்கும் நிலையில், மேலூர் தொகுதியில் சீட் பெற்றுவிட வேண்டும் என்பதில் கதர்கள் பலரும் ஆர்வம் காட்டி வருகின்றனர். அதற்கான ரேஸில் யார் இருக்கிறார்கள் என்பதை பார்க்கலாம்.

சட்டசபைத் தேர்தலில் திமுக கூட்டணியில் காங்கிரஸ் கட்சிக்கு 28 தொகுதிகள் ஒதுக்கப்பட்டுள்ளது. திமுக - காங்கிரஸ் இடையில் 28 தொகுதிகள் என்று தொகுதி பங்கீடு செய்யப்பட்டு ஒப்பந்தம் கையெழுத்தான பின், வேட்பாளர்கள் அறிவிப்புக்கு கால தாமதம் ஏற்பட்டது. ஒருவழியாக நேற்று முன்தினம் காங்கிரஸ் கட்சியின் வேட்பாளர்கள் பட்டியல் வெளியிடப்பட்டது.

27 தொகுதிகளுக்கான வேட்பாளர்கள் அறிவிக்கப்பட்டனர். ஆனால் மதுரை மாவட்டத்தின் மேலூர் தொகுதிக்கான வேட்பாளர் மட்டும் அறிவிக்கப்படவில்லை. நேற்று காலையே மேலூர் தொகுதிக்கான வேட்பாளர் அறிவிக்கப்படுவார் என்று சொல்லப்பட்ட நிலையில், இதுவரை எந்த அறிவிப்பும் வெளியாகவில்லை. இதன் பின்னணியில் காங்கிரஸ் எம்பி மாணிக்கம் தாகூர் இருப்பதாக சொல்லப்படுகிறது.

தனது மாமனார் ராஜேந்திரனுக்காக மேலூர் தொகுதியை மாணிக்கம் தாகூர் கேட்டு வருவதாக கூறப்படுகிறது. 2021 சட்டசபைத் தேர்தலில் மேலூர் தொகுதியில் ராஜேந்திரன் போட்டியிட்ட போது படுதோல்வியை சந்தித்தார். அதிமுக தரப்பில் மீண்டும் பெரியபுள்ளானுக்கு சீட் கொடுக்கப்பட்டுள்ளது. இதனால் மீண்டும் ராஜேந்திரனுக்கு சீட் கொடுக்கப்படுமா என்ற கேள்வி எழுந்துள்ளது.

இதனால் காங்கிரஸ் கட்சியின் மனித உரிமை கழக மாநில தலைவர் மகாத்மா சீனிவாசன், ஓபிசி பிரிவு நிர்வாகி நித்யபிரியா, சிவகங்கை நிர்வாகி சிஆர் சுந்தரராஜன், முன்னாள் இளைஞரணி நிர்வாகி மேலூர் ராம்சுந்தர் ஆகியோர் சீட் கேட்டு வருகின்றனர். இவருக்கு சிவகங்கை எம்பி கார்த்தி சிதம்பரம் ஆதரவாக இருப்பதாக கூறுகின்றனர்.

இருந்தாலும் கடந்த சில நாட்களாக மாணிக்கம் தாகூர் பல்வேறு பதவிகளில் இருந்து விலகி இருக்கிறார். அதேபோல் அடுத்த காங்கிரஸ் தலைவருக்கான ரேஸில் மாணிக்கம் தாகூர் இருப்பதால், மீண்டும் ராஜேந்திரனுக்கு சீட் அளிக்கப்படும் என்று பார்க்கப்படுகிறது. இந்த அறிவிப்பு இன்று மாலை வெளியாகும் என்றும் எதிர்பார்க்கப்படுகிறது.