வருங்கால முதலமைச்சர் உதயகுமார்... ஆர்வமிகுதியில் வாழ்த்துக் கோஷம் எழுப்பிய ஆதரவாளர்கள்..!

மதுரை: அமைச்சர் உதயகுமாரை அவரது ஆதரவாளர்கள் வருங்கால முதலமைச்சரே என வாழ்த்துக் கோஷம் எழுப்பியது அதிமுகவில் பரபரப்பை ஏற்படுத்தியுள்ளது.

மதுரை மாவட்டம் திருமங்கலத்திற்கு சாலை திட்டப்பணிகளை தொடங்கி வைப்பதற்காக வருவாய்த் துறை அமைச்சர் ஆர்.பி. உதயகுமார் இன்று சென்றிருந்தார்.

சாலை திட்டப்பணிகளை தொடங்கி வைத்த பின்னர் உள்ளூர் அதிமுகவினரை சந்தித்துப் பேசிக்கொண்டிருந்த போது அவரது ஆதரவாளர்கள் திடீரென வருங்கால முதலமைச்சர் அண்ணன் உதயகுமார் என முழக்கம் எழுப்பினர்.

இந்தக் கோஷத்தை செவிமடுக்காததைப் போல் இருந்த உதயகுமார் புன்னகை பூத்த முகத்துடன் அங்கிருந்து சற்று நேரத்தில் கிளம்பினார். இதனிடையே இது ஏதேச்சையாக நடைபெற்ற நிகழ்வு என்றும் ஆர்வமிகுதியில் ஆதரவாளர்கள் இதுபோல் முழக்கம் எழுப்புவது வழக்கமான ஒன்று தான் எனவும் திருமங்கலம் அதிமுகவினர் தெரிவிக்கின்றனர்.

அதிமுகவில் முதலமைச்சர் வேட்பாளர் யார் என்ற விவகாரத்தில் இப்போது தான் பஞ்சாயத்து முடிந்து நிலைமை ஓரளவு சீராகி வருகிறது. அதற்குள் அமைச்சர் உதயகுமாரை முதலமைச்சர் என அவரது ஆதரவாளர்கள் முழக்கமிட்டிருப்பது அதிமுகவின் அனைத்து மட்ட நிர்வாகிகளின் கவனத்திற்கும் சென்றிருக்கிறது.

என் புருஷன் குழந்தைமாதிரி திரைப்படத்தில் நடிகர் லிவிங்ஸ்டனை வருங்கால ஜனாதிபதி முருகேசன் என ஒருவர் கூவும் காட்சி இடம்பெற்றிருக்கும். இந்நிலையில் அந்தக் காட்சியுடன் ஒப்பிட்டு சமூக வலைதளங்களில் இது குறித்து திமுகவினர் விமர்சித்து வருகின்றனர்.

English summary

Minister Udhayakumar Supporters rised Slogan as Next CM