டபுள் ஷாக்! சின்ன வெங்காயம்.. பெரிய விலை - ரூ.200 ஐ தாண்டிருச்சாம்.. தக்காளிக்கே டஃப் கொடுக்குதே
மதுரை: தக்காளி விலை கடுமையாக உயர்ந்து வரும் நிலையில் தமிழ்நாட்டில் சின்ன வெங்காயத்தின் விலையும் 200 ரூபாயை தாண்டி இருப்பதால் பொதுமக்கள் அதிர்ச்சியடைந்து உள்ளனர்.
சமையலுக்கு அத்தியாவசியமாக பயன்படுத்தப்படும் காய்கறிகளின் விலை நாடு முழுவதும் கடந்த ஒரு வாரமாகவே அதிகரித்து வருகிறது. குறிப்பாக தக்காளி விலை ரூ.100 ஐ தாண்டி விற்பனை செய்யப்பட்டு வருகிறது. தக்காளி விலை தொடர்ந்து அதிகரித்து வருவதால் சாமானிய மக்கள் அவதிக்கு உள்ளாகி வருகிறார்கள்.
முந்தைய நாட்களை ஒப்பிடுகையில் சென்னை கோயம்பேட்டில் தக்காளி விலை ஓரளவு குறைந்து ரூ.80 முதல் ரூ.100 க்கு விற்கப்படுகிறது. ஆனால், டபுள் ஷாக்காக சின்ன வெங்காயத்தின் விலை கடுமையாக உயர்ந்து வருகிறது. சென்னை கோயம்பேட்டில் ஒரு கிலோ சின்ன வெங்காயத்தின் விலை இன்று மேலும் அதிகரித்து ரூ.160 முதல் ரூ.200 க்கு மொத்த விற்பனையில் விலை நிர்ணயம் செய்யப்பட்டு வருகிறது.
சில்லரை விலையில் ஒரு கிலோ ரூ.220 க்கும் அதிகமாக விற்பனை செய்யப்படும் என்று அஞ்சப்படுகிறது. சின்ன வெங்காயத்தின் விலை தக்காளியை போன்றே கடந்த சில நாட்களாக ஏற்றத்துடன் காணப்பட்ட நிலையில் ஒரே நாளில் ரூ.20 வரை அதிகரித்து உள்ளது மக்களை அதிர்ச்சியடைய செய்துள்ளது.
நேற்று ரூ.120 முதல் ரூ.140 வரை விற்பனை செய்யப்பட்டு வந்த சின்ன வெங்காயம், தற்போது ரூ.200 ஐ தாண்டி இருப்பதாக பொதுமக்கள் வேதனை தெரிவித்து உள்ளார்கள். வரத்து குறைந்துள்ளதன் காரணமாகவே சின்ன வெங்காயத்தின் விலை இப்படி உயர்ந்து உள்ளதாக வியாபாரிகள் தெரிவித்து உள்ளார்கள்.
இன்று காலை சென்னை கோயம்பேடு காய்கறி சந்தைக்கு சென்ற மக்கள் சின்ன வெங்காயத்தின் விலையை கேட்டு ஆடிப்போய் உள்ளனர். அத்தியாவசிய காய்கறிகளான வெங்காயம், தக்காளி உள்ளிட்டவற்றின் விலை பன்மடங்கும் அதிகரித்து இருப்பது சாமானிய மக்களை கடுமையாக பாதித்து உள்ளது.
Click it and Unblock the Notifications
Sign in with Google