ஆட்டத்திலேயே இல்லாத பாஜக.. சு வெங்கடேசன் VS சரவணன்.. மதுரையில் வெல்வது யார்? தந்தி டிவி சர்வே முடிவு

மதுரை: மதுரை லோக்சபா தொகுதியில் பாஜக ஆட்டத்திலேயே இல்லை எனவும், போட்டி என்பது திமுக கூட்டணியின் மார்க்சிஸ்ட் வேட்பாளர் சு வெங்கடேசன், அதிமுக வேட்பாளர் சரவணன் இடையே தான் உள்ளதாகவும், இதில் யாருக்கு வெற்றி வாய்ப்பு அதிகம்? என்பது பற்றி தந்தி டிவி கருத்து கணிப்பில் தெரிவிக்கப்பட்டுள்ளது.

தமிழ்நாடு மற்றும் புதுச்சேரியில் ஒரே கட்டமாக 40 தொகுதிகளுக்கும் லோக்சபா தேர்தல் நடைபெற உள்ளது. வரும் 19ம் தேதி ஓட்டுப்பதிவு நடைபெற உள்ளது. வேட்பாளர்கள், தலைவர்கள் தீவிர பிரசாரம் மேற்கொண்டு வருகின்றனர்.

இந்நிலையில் தான் நாளையுடன் பிரசாரம் ஓய்கிறது. இந்நிலையில் தான் தமிழக லோக்சபா தேர்தல் தொடர்பாக தந்தி டிவி சார்பில் மார்ச் 20 முதல் ஏப்ரல் 14 வரை கருத்து கணிப்பு மேற்கொள்ளப்பட்டது. . இதன் முடிவுகள் இன்று வெளியிடப்பட்டன.

அதன்படி மதுரை தொகுதி நிலவரம் என்ன? என்பதை இங்கு பார்ப்போம். மதுரை தொகுதியில் தற்போது மார்க்சிஸ்ட் கம்யூனிஸ்ட் கட்சியின் சு வெங்கடேசன் எம்பியாக உள்ளார். கடந்த தேர்தலில் திமுக கூட்டணியில் போட்டியிட்டு இவர் வெற்றி பெற்றார். இந்த முறையும் திமுக கூட்டணியில் மார்க்சிஸ்ட் கம்யூனிஸ்ட் கட்சி சார்பில் மதுரை தொகுதியில் சு வெங்கடேசன் போட்டியிட்டுள்ளார். அவரை எதிர்த்து அதிமுக சார்பில் சரவணன், பாஜகவில் ராம சீனிவாசன், நாம் தமிழர் சார்பில் சத்யா தேவி ஆகியோர் போட்டியிடுகின்றனர்.

அதன்படி இந்த தேர்தலில் மீண்டும் சு வெங்கடேசன் வெற்றி பெறுவார் என தந்தி டிவி கருத்து கணிப்பில் தெரிவிக்கப்பட்டுள்ளது. சு வெங்கடேசனுக்கு திமுக கூட்டணியில் இருப்பது பெரிய பிளஸ் பாயிண்டாக உள்ளது. இதனால் மார்க்சிஸ்ட் கம்யூனிஸ்ட் கட்சி 40 முதல் 46 சதவீத ஓட்டுகளை பெற்று சு வெங்கடேஷன் வெற்றி பெறுவார் என தெரிவிக்கப்பட்டுள்ளது.

இந்த தொகுதியில் 2வது இடத்தை அதிமுக வேட்பாளர் சரவணன் பெறுவார் என தெரிவிக்கப்பட்டுள்ளது. அதன்படி அதிமுக வேட்பாளர் சரவணன் 34 முதல் 40 சதவீத ஓட்டுகளை பெறுவார் என கூறப்பட்டுள்ளது. மேலும் அதிகம் எதிர்பார்க்கப்பட்ட பாஜக மதுரையில் 3வது இடத்தை தான் பிடிக்கும் என கூறப்பட்டுள்ளது. அதாவது பாஜக வேட்பாளர் ராம சீனிவாசன் 12 முதல் 18 சதவீத ஓட்டுகளை மட்டுமே அறுவடை செய்வார் என தந்திடிவி கருத்து கணிப்பில் கூறப்பட்டுள்ளது.

மேலும் நாம் தமிழர் கட்சியின் வேட்பாளர் சத்யா தேவி 4 முதல் 7 சதவீத ஓட்டுகளை பெறுவார் எனவும் கூறப்பட்டுள்ளது. மற்றவர்கள் 1 முதல் 3 சதவீதம் வரை பெறும் என தந்தி டிவி கருத்து கணிப்பில் தெரிவிக்கப்பட்டுள்ளது.

English summary

In Madurai Lok Sabha constituency, BJP is not in the game and the contest is between Su Venkatesan, the Marxist candidate of the DMK alliance, and Saravanan, the AIADMK candidate, who has more chances to win? It has been reported in a Thanthi TV opinion polls.