நீட்: மாணவர்களிடம் தவறான கருத்தை பரப்பாதீங்க.. தவெக விஜய்க்கு மாணவர் அமைப்பினர் கடும் கண்டனம்
மதுரை: பள்ளி மாணவர்கள் மத்தியில் தனது செல்வாக்கை உயர்த்துவதற்காக அறிவுரை வழங்குவதாகக் கூறி, தவறான கருத்துகளை த.வெ.க. தலைவர் விஜய் பரப்பி வருகிறார். இது கடும் கண்டனத்திற்குரியது என்று அகில பாரதிய வித்யார்த்தி பரிஷத் மாணவர் அமைப்பு தெரிவித்துள்ளது.
நடிகரும், தவெக தலைவருமான விஜய் ஒவ்வொரு வருடமும் 10 மற்றும் 12 ஆம் வகுப்பு பொதுத் தேர்வில் அதிக மதிப்பெண் பெற்ற மாணவ, மாணவிகளுக்கு கல்வி விருது வழங்கி வருகிறார். தொகுதி வாரியாக முதல் 3 மதிப்பெண் எடுத்தவர்களுக்கு ஊக்கத்தொகை, பாராட்டு சான்றிதழ் வழங்கி வருகிறார். அந்த வகையில் இந்த வருடம் 10 மற்றும் 12 ஆம் வகுப்பில் வெற்றி பெற்றவர்களுக்கு கல்வி விருது வழங்கும் நிகழ்ச்சி மாமல்லபுரம் பகுதியில் நடைபெற்றது.
இந்த நிகழ்ச்சியில் பேசிய விஜய், "நீட் தேர்வு மட்டும் தான் உலகமா. நீட்டை தாண்டியும் உலகம் இருக்கு. அது ரொம்ப பெரிது. அதுல நீங்க சாதிக்க நிறைய இருக்கு. குறிப்பிட்ட ஒரு பாடத்துல மட்டும் அதிக மதிப்பெண் எடுத்து சாதிக்கணும்னு நீங்க எந்த அழுத்தத்தையும் ஏத்திக்க வேண்டாம்." என்று கூறியிருந்தார்.
விஜய்யின் இந்தக் கருத்து அரசியல் ரீதியாக பெரும் சர்ச்சையைக் கிளப்பியுள்ளது. அவரின் கருத்தை ஒரு சிலர் ஆதரித்தாலும், திமுக உள்ளிட்ட கட்சிகள் கடுமையாக எதிர்த்து வருகின்றன. மாணவர்களின் உரிமை பறிக்கப்படும் நிலையில், விஜய்யின் இந்த கருத்து பாஜகவுக்கு ஆதரவாக உள்ளது என்று திமுக நிர்வாகிகள் கடுமையாக விமர்சித்து வருகிறார்கள்.
இந்நிலையில், பள்ளி மாணவர்கள் மத்தியில் தன்னுடைய செல்வாக்கை உயர்த்துவதற்காக அறிவுரை வழங்குவதாகக் கூறி, தவறான கருத்துகளை த.வெ.க. தலைவர் விஜய் பரப்பி வருவது கடும் கண்டனத்திற்குரியது என்று அகில பாரதிய வித்யார்த்தி பரிஷத் மாணவர் அமைப்பு தெரிவித்துள்ளது.
இதுகுறித்து, மாணவர் அமைப்பின் மாநில இணைச் செயலாளர் விஜயராகவன் கூறியதாவது: மாணவர்கள் மத்தியில் தன் செல்வாக்கை உயர்த்துவதற்காக தவறான கருத்தைப் பரப்பி வருகிறார். அரசியல் சூழ்ச்சிகள் தெரியாதவர்கள் பள்ளி மாணவர்கள். அவர்களிடம் நீட் தேர்வு குறித்து எதிர்மறை எண்ணங்கள் புகுத்தி, அரசியல் பேசி மாணவர்கள் இடையே வன்முறையை நடிகர் விஜய் துாண்டுகிறார்.
நீட் தேர்வால் தமிழகத்தில் தொடர்ச்சியாக அரசுப் பள்ளி மாணவர்கள் நல்ல முன்னேற்றம் அடைந்து வருகின்றனர். அதிகளவிலான மாணவர்கள் மருத்துவ படிப்பிற்குத் தேர்வாகி வருகின்றனர். இந்நிலையில், அரசியல் காரணங்களுக்காக நீட் தேர்வை எதிர்க்கும் அரசியல் கட்சிகளுடன் விஜய் சேர்ந்து, அரசியல் செய்வதைக் கண்டிக்கிறோம்.
மாணவர்களிடம் தனது திரைப்பட கவர்ச்சியால் உண்மைக்குப் புறம்பான செய்திகளைத் தெரிவித்து மாணவர்களை தவறாக திசை திருப்புகிறார். மாணவர்களிடையே அரசியல் செய்வதை விஜய் தவிர்க்க வேண்டும் என்று தெரிவித்துள்ளார்.
Click it and Unblock the Notifications
Sign in with Google