அமைச்சர் ஐ.பெரியசாமிக்கு என்னாச்சு? தென் மாவட்ட முதல்வர் நிகழ்ச்சியில் ஆப்சென்ட்! பின்னணி இது தான்!

மதுரை: முதலமைச்சர் முக ஸ்டாலின் கலந்துகொண்ட தென் மாவட்ட நிகழ்ச்சிகளில் ஊரக வளர்ச்சித்துறை அமைச்சர் ஐ.பெரியசாமி கலந்து கொள்ளாதது கட்சியினர் மத்தியில் பேசு பொருளாக அமைந்துள்ளது.

அமைச்சர் ஐ.பெரியசாமி: பசும்பொன் முத்துராமலிங்க தேவர் குருபூஜையில் பங்கேற்பதற்காக நேற்று முன் தினம் மதுரை சென்ற முதலமைச்சர் ஸ்டாலினை அமைச்சர் ஐ.பெரியசாமி விமான நிலையத்தில் வரவேற்றார். அதன் பிறகு முதல்வர் கான்வாயில் பயணித்து அவருடன் தென் மாவட்ட நிகழ்ச்சிகளில் கலந்துகொள்வார் என எதிர்பார்க்கப்பட்ட நிலையில் அமைச்சர் ஐ.பெரியசாமியின் கார் திண்டுக்கல்லை நோக்கி சீறியது.

முதல்வர் நிகழ்ச்சிகள்: திண்டுக்கல்லில் உள்ள வீட்டில் இரவு ஓய்வெடுத்துவிட்டு காலை மதுரை வந்துவிடுவார் என லோக்கல் நிர்வாகிகள் நினைத்தனர். ஆனால் கோரிப்பாளையத்தில் உள்ள தேவர் சிலைக்கு மாலை அணிவித்து மரியாதை செலுத்தும் நிகழ்வு, மருதிருவர்கள் சிலைக்கு மாலை அணிவித்து மரியாதை செலுத்தும் நிகழ்வு, பசும்பொன் தேவர் குருபூஜை, என முதல்வர் ஸ்டாலின் நேற்று பரபரப்பாக பங்கேற்ற எல்லா நிகழ்ச்சிகளிலும் அமைச்சர் ஐ.பெரியசாமி ஆப்செண்ட்.

தென் மாவட்ட திமுக: தென் மாவட்ட திமுகவின் முக்கிய முகமாக திகழும் அமைச்சர் ஐ.பெரியசாமி முதலமைச்சர் நிகழ்ச்சிகளில் கலந்துகொள்ளாதது கட்சியினர் மத்தியில் விவாதப் பொருளானது. இதனிடையே நாம் இது பற்றி விசாரித்ததில் அமைச்சர் ஐ.பெரியசாமியின் உடல்நலம் சரியில்லாதது காரணம் என தகவல் கிடைத்தது. அடிக்கடி லோ பிரஷர் வந்துவிடுவதால் அதிகமாக அவரால் பயணங்கள் செய்ய முடிவதில்லை எனத் தெரிவிக்கப்பட்டது. குறிப்பாக அவர் எடுத்துக்கொள்ளும் மாத்திரைகள் சிலவற்றால் வயிறு உபாதைகள் ஏற்படுவதாக கூறப்பட்டது.

பயணங்களை தவிருங்கள்: இதனால் தான் அமைச்சர் ஐ.பெரியசாமியால் பயணங்கள் மேற்கொள்ள முடிவதில்லை என்றும் அவரது உடல்நலனை பற்றி அறிந்த முதல்வர் ஸ்டாலினும் தன்னுடன் பசும்பொன் வராவிட்டாலும் பரவாயில்லை ஓய்வெடுத்துக் கொள்ளுங்கள் எனக் கூறியதாலேயே அவர் திண்டுக்கல் வந்தார் எனவும் தெரிவிக்கப்பட்டது. இதனிடையே அமைச்சர் ஐ.பெரியசாமியின் இடத்தில் அமைச்சர்கள் மூர்த்தி, தங்கம் தென்னரசு, டி.ஆர்.பி.ராஜா, உள்ளிட்ட முக்குலத்தோர் சமுதாயத்தை சேர்ந்த அமைச்சர்கள் முதல்வருடன் எல்லா நிகழ்வுகளிலும் கலந்துக்கொண்டனர்.

English summary

Rural Development Minister I.Periyasamy non-participation in the South District programme attended by Chief Minister Stalin has become a talking point among the party members.