ப்ளீஸ் விட்ருங்க.. அடிக்க பாய்ந்த கும்பலிடம் கெஞ்சிய பிரபல நடிகை ரவீணா டாண்டன்.. பரவும் வீடியோ

மும்பை: மும்பையை சேர்ந்த பிரபல நடிகை ரவீணா டாண்டனின் கார் இடித்ததில் பெண்கள் சிலர் காயம் அடைந்ததாக கூறி அவரை கும்பல் ஒன்று சூழ்ந்து கொண்டு அடிக்க பாயும் காட்சிகள் அடங்கிய வீடியோ சமூக வலைத்தளங்களில் வேகமாக பரவி வருகிறது.

மும்பையை சேர்ந்தவர் பிரபல நடிகை ரவீணா டாண்டன். 52 வயதான இவர் பல்வேறு பாலிவுட் படங்களில் நடித்துள்ளார். இந்தி திரையுலகில் பிரபலமான நடிகையாக வலம் வரும் ரவீணா டாண்டன் மும்பையில் தாறுமாறாக காரில் வந்ததாக சர்ச்சையில் சிக்கியுள்ளார்.

ரவீணா டாண்டனையும் அவரது கார் டிரைவரையும் கும்பல் ஒன்று சூழ்ந்து கொண்டு அடிக்க பாயும் காட்சிகள் அடங்கிய வீடியோ சமூக வலைத்தளங்களில் வைரலாகி வருகிறது. இது குறித்த விவரம் வருமாறு:-

மும்பை பாந்திரா கார்டர் ரோடு பகுதியில் நடிகை ரவீணா டாண்டன் நேற்று இரவு காரில் சென்றுள்ளார். அப்போது ரவீணா டாண்டனின் காரை ஒரு கட்டிடம் அருகே டிரைவர் பின்னோக்கி எடுத்துள்ளார். அப்போது அங்கு நின்று கொண்டிருந்த பெண்கள் சிலர் மீது கார் இடித்ததாக சொல்லப்படுகிறது. இதனால் ஆத்திரம் அடைந்த அப்பகுதி மக்கள் ரவீணா டாண்டனையும் அவரது டிரைவரிடம் வாக்கு வாதத்தில் ஈடுபட்டுள்ளனர்.

ஆனால் டிரைவர் யார் மீதும் காரை இடிக்கவில்லை என ரவீணா டாண்டனின் கார் டிரைவர் கூறியிருக்கிறார். இதன் காரணமாக அங்கு இருந்தவர்களுக்கும் டிரைவருக்கும் இடையே வாக்குவாதம் ஏற்பட்டது. தொடர்ந்து கார் டிரைவரை அந்த கும்பல் தாக்கியதாக தெரிகிறது. இதனால் காரை விட்டு இறங்கிய ரவீணா டாண்டன், கும்பலை சாமாதனப்படுத்த முயன்று உள்ளார்.

அப்போது ரவீணா டாண்டனை அந்த கும்பல் தள்ளிவிட்டு தாக்கியதாக கூறப்படுகிறது. இதுதொடர்பாக வீடியோ சமூகவலைதளங்களில் பரவி வருகிறது. அதில், ப்ளீஸ் அடிக்க வேண்டாம் என ரவீணா டாண்டன் கூறுகிறார். மேலும் வீடியோ எடுக்க வேண்டாம் என்றும் ரவீணா டாண்டன் சொல்லும் காட்சிகள் அடங்கியிருக்கின்றன. இந்த வீடியோ தற்போது சமூக வலைத்தளங்களில் வேகமாக பரவி வருகிறது.

வீடியோவில் பேசும் பெண் ஒருவர், கார் இடித்ததில் எனது மூக்கில் இருந்து ரத்தம் கொட்டுகிறது. போலீசாரை அழைக்க போகிறேன். இன்று இரவு ஜெயிலில் தான் இருக்க போகிறீர்கள்.." என்று கூறுகிறார். அதே வீடியோவில் ஒருவர், நடிகையின் கார் டிரைவர் அவரது அம்மா மீது மோதிவிட்டதாகவும், அதுகுறித்து கேட்டபோது தனது அம்மாவை ரவீணா டாண்டனின் கார் டிரைவர் தாக்கியதாக கூறுகிறார்.

சமூக வலைத்தளங்களில் இந்த காட்சிகள் அடங்கிய வீடியோ வைரலாகி வருகிறது. தற்போது ரவீணா டாண்டன் விவகாரம் குறித்து மும்பை போலீசார் விசாரித்து வருகின்றனர். இதற்கிடையே சம்பவத்தின் போது ரவீணா டாண்டன் கார் யார் மீதும் இடிக்காமல் செல்வது போன்ற வீடியோ காட்சியும் எக்ஸ் தளத்தில் பரவி வருகிறது. ரவீணா டாண்டன் இந்த விவகாரம் குறித்து தற்போது வரை கருத்து எதையும் தெரிவிக்கவில்லை.

English summary

A video of Mumbai-based actress Raveena Dandan being beaten up by a group of women claiming that some of them were injured when her car crashed is going viral on social media.