குறைந்தது ரெப்போ விகிதம்! ரூ.50 லட்சம் வீட்டு லோன் எடுத்தவர்கள்..எவ்வளவு EMI கட்ட வேண்டும்? ட்விஸ்ட்

மும்பை: இந்திய ரிசர்வ் வங்கி (RBI) கடந்த வெள்ளிக்கிழமை ரெப்போ வட்டி விகிதத்தை 25 அடிப்படைப் புள்ளிகள் குறைத்ததைத் தொடர்ந்து, பல தேசியமயமாக்கப்பட்ட வங்கிகள் சில்லறை கடன்களின் வட்டி விகிதங்களை 25 அடிப்படைப் புள்ளிகள் குறைத்துள்ளன. வீட்டுக் கடன், வாகனக் கடன், கல்விக்கடன் மற்றும் பிற ரெப்போ லிங்க்ட் லெண்டிங் ரேட் (RLLR) வகைக் கடன்களுக்கான இந்த அறிவிப்புகள் கடந்த இரு நாட்களில் வெளியாகியுள்ளன.

ரெப்போ வட்டி விகிதம்

பஞ்சாப் நேஷனல் வங்கி, பேங்க் ஆஃப் மகாராஷ்டிரா (BoM), பேங்க் ஆஃப் இந்தியா, இந்தியன் வங்கி மற்றும் பேங்க் ஆஃப் பரோடா ஆகியவை தங்கள் RLLR-ஐ 25 அடிப்படைப் புள்ளிகள் குறைத்துள்ளன. மற்ற வங்கிகளும் இந்த வரிசையில் வட்டி குறைக்கக்கூடும் என்று எதிர்பார்க்கப்படுகிறது. முன்னணி தனியார் வங்கிகள் ஜனவரி 15க்குப் பிறகு வட்டி குறைப்பு குறித்த அறிவிப்பை வெளியிட வாய்ப்புள்ளது. ஒரு அடிப்படைப் புள்ளி என்பது ஒரு சதவீதப் புள்ளியின் நூறில் ஒரு பங்காகும்.

இருப்பினும், தங்கள் லாப வரம்புகளைப் பாதுகாக்கும் நோக்கில், வங்கிகள் மார்க்கினல் காஸ்ட் ஆஃப் லெண்டிங் ரேட் (MCLR) எனப்படும் கடன் விகிதத்தைக் குறைக்கவில்லை. MCLR கடன்கள் பெரும்பாலும் பெரு நிறுவனங்களுக்கு வழங்கப்பட்டு வருகின்றன.

எந்தெந்த வங்கிகள் வட்டியை குறைத்தன?

பேங்க் ஆஃப் மகாராஷ்டிரா ஞாயிற்றுக்கிழமை வெளியிட்ட அறிவிப்பில், அதன் வீட்டுக் கடன்கள் இனி 7.10 சதவீதத்தில் தொடங்கும் என்றும், வாகனக் கடன்கள் சனிக்கிழமை முதல் 7.45 சதவீதத்தில் தொடங்கும் என்றும் தெரிவித்துள்ளது. இந்தியன் வங்கி, அதன் RLLR-ஐ 8.20 சதவீதத்திலிருந்து 7.95 சதவீதமாகக் குறைத்துள்ளதாக அறிவித்துள்ளது. பஞ்சாப் நேஷனல் வங்கி, தனது RLLR-ஐ 8.35 சதவீதத்திலிருந்து 8.10 சதவீதமாக உடனடியாக அமலுக்கு வரும்படி திருத்தியுள்ளது. பேங்க் ஆஃப் பரோடா தனது RLLR-ஐ தற்போதுள்ள 8.15 சதவீதத்திலிருந்து 7.90 சதவீதமாகக் குறைத்துள்ளது.

பொதுத்துறை வங்கிகள் ரெப்போ விகிதக் குறைப்பை உடனடியாக வாடிக்கையாளர்களுக்கு மாற்றுகின்றன என்பது குறிப்பிடத்தக்கது. ஆனால், சில கடன் வழங்குநர்கள் மாதாந்திர மறுசீரமைப்பு கொள்கையைப் பின்பற்றுகின்றனர் என்பதால், இந்தக் குறைப்பின் தாக்கம் அடுத்த மாதம் 5ஆம் தேதிக்கும் 15ஆம் தேதிக்கும் இடையில் உணரப்படும். பெரும்பாலான தனியார் மற்றும் வெளிநாட்டு வங்கிகள் காலாண்டு மறுசீரமைப்பு கொள்கையைக் கொண்டிருப்பதால், அதன் தாக்கம் அடுத்த காலாண்டில்தான் முழுமையாகப் பிரதிபலிக்கும்.

எவ்வளவு வட்டி குறையும்?

2025 நவம்பரில் ரெப்போ வட்டி விகிதத்துடன் இணைக்கப்பட்ட ரூ. 50 லட்சம் வீட்டுக் கடனை 25 வருட காலத்திற்கு (300 சம மாதத் தவணைகள்) 7.5 சதவீத வட்டி விகிதத்தில் எடுத்துக்கொண்ட ஒருவர், மாதந்தோறும் ரூ. 36,950 EMI செலுத்துவார்.

RBI-யின் 25 அடிப்படைப் புள்ளி ரெப்போ விகிதக் குறைப்புக்குப் பிறகு, அவர் கடன் காலத்தை மாற்றாமல் EMI-ஐ குறைக்கத் தேர்வு செய்தால், அவருடைய புதிய EMI ரூ. 36,140 ஆகக் குறையும். இதன் மூலம் கடன் காலம் முழுவதும் ரூ. 2.42 லட்சம் மொத்த வட்டிச் சேமிப்பு கிடைக்கும். ஒருவேளை அவர் EMI-ஐ மாற்றாமல் கடன் காலத்தைக் குறைக்கத் தேர்வு செய்தால், மொத்த EMI-கள் 18 மாதங்கள் குறையும் (300 இலிருந்து 282 ஆக). இதன் விளைவாக ரூ. 6.48 லட்சம் வட்டிச் சேமிப்பு கிடைக்கும். எனவே, EMI-ஐ மாற்றாமல் கடன் காலத்தைக் குறைப்பதைத் தேர்ந்தெடுப்பது அதிக வட்டிச் சேமிப்பிற்கு வழிவகுத்து, உங்கள் கடனை விரைவாக முடிக்க உதவும்.

English summary

How much EMI you have to pay for the Rs.50 lakhs home loan after the Repo Rate cut?