Mumbai election: மும்பையின் ‘டான்’ ஆகப் போவது யார்? பரபரப்பாக நடந்த உள்ளாட்சி தேர்தல்! EXIT POLL-ல் முந்தும் பாஜக..

மும்பை: மஹாராஷ்டிராவில் 29 மாநகராட்சிகளுக்கான உள்ளாட்சி தேர்தல் இன்று நடந்தது. மும்பை, புனே உள்ளிட்ட நகரங்களில் வாக்குப்பதிவு நடைபெற்றது. இந்த தேர்தலில் அதிக முக்கியத்துவம் பெற்ற மாநகராட்சியாக மும்பை மாநகராட்சி (பிரிஹன் மும்பை மாநகராட்சி - BMC) விளங்கும் நிலையில், வெளியான எக்ஸிட் போல் முடிவுகள் பாஜக தலைமையிலான மகாயுதி கூட்டணிக்கு சாதகமாக இருப்பதாக தெரிவிக்கின்றன.

மகாராஷ்டிர மாநிலத்தில் 29 மாநகராட்சிகளுக்கான உள்ளாட்சி தேர்தல் இன்று நடைபெற்றது. மும்பை, புனே, நாக்பூர், நாசிக், சோலாப்பூர், தானே உள்ளிட்ட முக்கிய நகரங்களில் வாக்குப்பதிவு அமைதியான முறையில் நடந்தது.

இந்த தேர்தலில் மொத்தமாக 893 வார்டுகளுக்கு வாக்குகள் பதிவான நிலையில், 3 கோடியே 48 லட்சம் வாக்காளர்கள் தங்களின் ஜனநாயக உரிமையை பயன்படுத்தினர். 15,931 வேட்பாளர்கள் இந்த தேர்தலில் களமிறங்கியுள்ளனர். நாளை, 16ஆம் தேதி வாக்குகள் எண்ணப்பட்டு முடிவுகள் அறிவிக்கப்படவுள்ளன.

மும்பை மாநகராட்சி தேர்தல்

கடந்த மாதம் நகராட்சிகள் மற்றும் பேரூராட்சிகளுக்கு தேர்தல் முடிந்த நிலையில், தற்போது மாநகராட்சிகளுக்கான தேர்தல் நடைபெற்றுள்ளது அரசியல் ரீதியாக முக்கியத்துவம் பெற்றதாக பார்க்கப்படுகிறது. இதில் அதிக கவனம் பெற்ற மாநகராட்சியாக மும்பை மாநகராட்சி, அதாவது பிரிஹன் மும்பை மாநகராட்சி (BMC), விளங்குகிறது. இந்தியாவிலேயே மிகப் பெரிய உள்ளாட்சி அமைப்பாகக் கருதப்படும் இந்த மாநகராட்சியின் ஆண்டு பட்ஜெட் ரூ.74,400 கோடியைத் தாண்டுகிறது.

சிவசேனா கூட்டணி

நான்கு ஆண்டுகளுக்குப் பிறகு நடைபெறும் இந்த தேர்தலில், 227 இடங்களுக்கு சுமார் 1,700 வேட்பாளர்கள் போட்டியிடுகின்றனர். மும்பை மாநகராட்சி தேர்தலில் அரசியல் போட்டி மிகக் கடுமையாக உள்ளது. பாஜக மற்றும் முதல்வர் ஏக்நாத் ஷிண்டே தலைமையிலான சிவசேனா கூட்டணி ஒருபுறம் களமிறங்கியுள்ள நிலையில், உத்தவ் தாக்கரே தலைமையிலான சிவசேனா, ராஜ் தாக்கரேயின் எம்என்எஸ் மற்றும் சரத் பவாரின் தேசியவாத காங்கிரஸ் ஆகிய கட்சிகள் இணைந்த கூட்டணி மறுபுறம் போட்டியிடுகிறது.

மும்பை உள்ளாட்சி தேர்தல்

காங்கிரஸ் கட்சி, அம்பேத்கரின் பேரன் பிரகாஷ் அம்பேத்கரின் கட்சியுடன் கூட்டணி அமைத்து தேர்தலை சந்திக்கிறது. அஜித் பவார் தலைமையிலான தேசியவாத காங்கிரஸ் கட்சி தனித்துப் போட்டியிடுகிறது. புனே மாநகராட்சியில் அரசியல் களம் இன்னும் சிக்கலானதாக உள்ளது. இங்கு பாஜக மற்றும் ஏக்நாத் ஷிண்டே சிவசேனா தனித்தனியாக போட்டியிடுகின்றன. உத்தவ் சிவசேனா மற்றும் எம்என்எஸ் கட்சிகள் கூட்டணி அமைத்துள்ளன. காங்கிரஸ் தனித்து களமிறங்க, தேசியவாத காங்கிரஸின் இரு பிரிவுகளும் ஒன்றிணைந்து போட்டியிடுகின்றன.

தாக்கரே சகோதரர்கள்

மும்பை தேர்தல் அரசியல் ரீதியாக மிகவும் முக்கியமானதாக பார்க்கப்படுவதற்கான முக்கிய காரணம், சுமார் 20 ஆண்டுகளுக்குப் பிறகு தாக்கரே சகோதரர்கள் ஒன்றிணைந்து அரசியல் களத்தில் நிற்கும் சூழல் உருவாகியிருப்பதே. தங்களின் பழைய அரசியல் அடையாளத்தையும் செல்வாக்கையும் மீட்டெடுக்க அவர்கள் முயற்சி செய்து வரும் நிலையில், பாஜக தலைமையிலான மகாயுதி கூட்டணி அவர்களை நேரடியாக எதிர்கொண்டு களமிறங்கியுள்ளது. இதனால், மும்பை மாநகராட்சி தேர்தல் ஒரு சாதாரண உள்ளாட்சி தேர்தலைத் தாண்டி, பெரிய அரசியல் போர்க்களமாக மாறியுள்ளது.

பாஜக மகாயுதி முன்னிலை

இந்த நிலையில் வெளியான எக்ஸிட் போல் முடிவுகள் பாஜக தலைமையிலான மகாயுதி கூட்டணிக்கு சாதகமாக இருப்பதாக தெரிவிக்கின்றன. ஆக்சிஸ் மை இந்தியா வெளியிட்ட கணிப்பின் படி, மகாயுதி கூட்டணி 131 முதல் 151 இடங்கள் வரை வெற்றி பெறக்கூடும் என கூறப்பட்டுள்ளது. JVC நிறுவனம் நடத்திய எக்ஸிட் போல் கணிப்பிலும், மகாயுதி கூட்டணி சுமார் 138 இடங்களை கைப்பற்றும் என தெரிவிக்கப்பட்டுள்ளது.

மகாராஷ்டிரா

இந்த கணிப்புகள் உண்மையாக்கப்படுமானால், மும்பை மாநகராட்சியில் பாஜக தலைமையிலான கூட்டணி ஆதிக்கம் செலுத்தும் நிலை உருவாகும். அதே நேரத்தில், தாக்கரே சகோதரர்களின் அரசியல் மறுபிரவேச முயற்சிக்கு இது பெரிய பின்னடைவாக அமையக்கூடும். மொத்தத்தில், மகாராஷ்டிராவின் உள்ளாட்சி அரசியல் எதிர்கால திசையை தீர்மானிக்கும் முக்கிய தேர்தலாக இந்த மாநகராட்சி தேர்தல் அமைந்துள்ளது.

English summary

Mumbai civic elections have turned into a high-stakes political battle as exit polls indicate a clear edge for the BJP-led Mahayuti alliance, raising questions over the future of Thackeray brothers and opposition unity.