ஷாக்! பெண் மீது மளமளவென விழுந்த அரிசி மூட்டைகள்! ஜெட் வேகத்தில் செயல்பட்டு மீட்ட ஊழியர்கள்.. வீடியோ

மும்பை: மகாராஷ்டிரா மாநிலத்தில் உள்ள ஒரு சூப்பர் மார்க்கெட்டில் அடுக்கி வைக்கப்பட்டிருந்த அரிசி மூட்டைகள் சரிந்து பெண் ஊழியர் மீது விழுந்தது. சுமார் 30 - 40 அரிசி மூட்டைகள் பெண் மீது விழுந்த நிலையில், அங்குள்ள ஊழியர்கள் அந்த அரிசி மூட்டைகளை ஜெட் வேகத்தில் சில நொடிகளில் தூக்கி வீசி பெண்ணை மீட்டனர். இந்த வீடியோ தற்போது இணையத்தில் டிரெண்ட் ஆகி வருகிறது.

சூப்பர் மார்க்கெட் ஒன்றில் அடுக்கி வைக்கப்பட்டு இருந்த அரிசி மூட்டைகள், பெண் ஊழியர் மீது சரிந்து விழும் பதைபதைக்க வைக்கும் வீடியோ ஒன்று வெளியாகி அதிர்ச்சியை ஏற்படுத்தியுள்ளது. துரிதமாக செயல்பட்டு அந்த பெண்ணை சூப்பர் மார்க்கெட் ஊழியர்கள் மீட்டுள்ளனர். இது குறித்த விவரங்களை பார்க்கலாம்.

மகாராஷ்டிரா மாநிலம் நவி மும்பையில் உள்ள வஷி பகுதியில் வேளாண் விளைபொருள் சந்தைக் குழு (APMC) வளாகத்தில் மார்க்கெட் ஒன்று உள்ளது. இந்த மார்க்கெட்டில் நூற்றுக்கணக்கான அரிசி மூட்டைகள் சுமார் 10 அடி உயரத்திற்கு அடுக்கி வைக்கப்பட்டு இருந்தது. ஒரு ஆள் மட்டுமே செல்லக்கூடிய அளவுக்கு இடைவெளி விடப்பட்டு வரிசையாக அரிசி மூட்டைகள் அடுக்கி வைக்கப்பட்டு இருந்தன.

மூட்டைகளுக்கு அடியில் சிக்கிய பெண்: அந்த மார்க்கெட்டில் பணியாற்றும் பெண் ஊழியர் ஒருவர், சுத்தம் செய்யும் பணியில் ஈடுபட்டு இருந்தார். வழக்கம் போல சுத்தம் செய்து கொண்டு இருந்தபோது திடீரென்று அரிசி மூட்டைகள் அசைந்தன. இதைக் கவனித்து அந்த பெண் சுதாரிப்பதற்குள் மூட்டைகள் நொடிப்பொழுதில் பெண் மீது விழுந்தது. பல மூட்டைகள் விழுந்ததில், மூட்டைகளுக்கு கீழே பெண் சிக்கிக் கொண்டார்.

துரிதமாக செயல்பட்ட ஊழியர்கள்: உயிருக்கு போராடிக்கொண்டு இருந்த அந்த பெண்ணை மீட்க சூப்பர் மார்க்கெட் ஊழியர்கள் வேகவேகமாக வந்து அரிசி மூட்டைகளை ஜெட் வேகத்தில் தூக்கி வீசினர். 30 - 40 அரிசி மூட்டைகளை சில நொடிகளில் தூக்கி வீசி பெண்ணை மீட்டனர். காயம் அடைந்த பெண்ணை மீட்டு அருகில் உள்ள மருத்துவமனையில் அனுமதித்துள்ளனர்.

நெட்டிசன்கள் பாராட்டு: லேசான காயமே அந்த பெண்ணுக்கு ஏற்பட்டுள்ளதாகவும் மருத்துவர்கள் தெரிவித்துள்ளனர். பெண்ணின் உயிரை காப்பாற்ற சமயோசிதமாக செயல்பட்டு ஊழியர்கள் ராக்கெட் வேகத்தில் செயல்பட்ட வீடியோ இணையத்தில் வேகமாக பரவி வருகிறது. நெட்டிசன்கள் பலரும் பெண்ணை காப்பற்ற விரைந்து செயல்பட்ட விதத்தை பாராட்டி வருகிறார்கள்.

English summary

Stacked bags of rice at a supermarket in Maharashtra collapsed and fell on a female employee. Around 30-40 bags of rice fell on the woman, the staff there acted quickly and threw the rice bags at jet speed in a few seconds and rescued the woman. This video is currently trending on the internet.