நடிகர் தர்மேந்திரா உடல்நிலை எப்படி இருக்கு? குடும்பத்தினர் கொடுத்த விளக்கம்!

Updated: Tuesday, November 11, 2025, 7:26 [IST]

Subscribe to Oneindia Tamil

மும்பை: முதுபெரும் பாலிவுட் நடிகர் தர்மேந்திரா (89) மருத்துவமனையில் அனுமதிக்கப்பட்டு சிகிச்சை பெற்று வரும் நிலையில், அவர் உடல்நிலை குறித்து தவறான வதந்திகளைப் பரப்ப வேண்டாம் என அவரது குடும்பத்தினர் கேட்டுக்கொண்டுள்ளனர். தர்மேந்திரா உடல்நிலை சீராக உள்ளது என விளக்கம் அளிக்கப்பட்டுள்ளது.

முதுபெரும் பாலிவுட் நடிகர் தர்மேந்திரா (89) சமீபத்தில் மும்பையின் பிரீச் கேண்டி மருத்துவமனையில் அனுமதிக்கப்பட்டார். இது அவரது உடல்நிலை குறித்து பல்வேறு யூகங்களைக் கிளப்பிவிட்டது. தர்மேந்திரா, மூச்சு திணறல் ஏற்பட்டு, வென்டிலேட்டர் உதவியுடன் ஐசியுவில் இருப்பதாக தகவல்கள் வெளியாகின. அதேசமயம், தர்மேந்திரா விரைவில் தமது 90வது பிறந்தநாளை கொண்டாட உள்ள சூழலில் இது ஒரு வழக்கமான பரிசோதனை என்றும் கூறப்பட்டது.

Veteran Actor Dharmendra Hospitalized in Mumbai Family Seeks Prayers for His Recovery

இந்நிலையில், நடிகர் தர்மேந்திராவின் மனைவியும் பழம்பெரும் நடிகையுமான ஹேமா மாலினி விளக்கம் அளித்தார். "அவர் விரைவில் குணமடைவார் என்று நாங்கள் நம்புகிறோம்" என்று தெரிவித்தார். நடிகர் தர்மேந்திராவின் மகனும் நடிகருமான சன்னி தியோலும் மருத்துவமனைக்கு வருகை தந்தார். தர்மேந்திரா வென்டிலேட்டரில் இருப்பதாக வெளியான வதந்திகளை அவரது குழுவினர் நிராகரித்தனர்.

"தர்மேந்திரா உடல்நிலை சீராக உள்ளது. அவர் மருத்துவக் கண்காணிப்பில் உள்ளார். அவரது உடல்நிலை தொடர்பான அப்டேட் கிடைக்கும்போது பகிரப்படும். தயவுசெய்து அவரது உடல்நிலை குறித்து தவறான வதந்திகளைப் பரப்ப வேண்டாம். அவரது குடும்பத்தின் தனி உரிமையை மதிக்கவும் அவர் விரைவில் குணமடைய அனைவரும் பிரார்த்தனை செய்யுமாறும் கேட்டுக்கொள்கிறேன்." என சன்னி தியோல் தரப்பில் இருந்து விளக்கம் அளிக்கப்பட்டுள்ளது.

பாலிவுட் ஸ்டார் ஷாருக்கான் தனது குடும்பத்தினருடன், ப்ரீச் கேண்டி மருத்துவமனைக்கு வந்து தர்மேந்திராவைச் சந்தித்து, உடல் நலன் பற்றி விசாரித்தார். அதேபோல சல்மான் கானும் தர்மேந்திராவை மருத்துவமனையில் சந்தித்தார். தர்மேந்திரா விரைவாக குணமடைய நடிகர் ரித்தேஷ் தேஷ்முக் பிரார்த்தனை செய்துள்ளார்.

சுமார் 60 வருடங்களாக பாலிவுட் திரையுலகில் வலம் வந்தவர் தர்மேந்திரா. தர்மேந்திராவின் மனைவி ஹேமாமாலினி. தர்மேந்திராவின் மகன்கள் சன்னி தியோல், பாபி தியோல், மகள் ஈஷா தியோல் ஆகியோர் திரை உலகில் பிரபலமாக இருக்கின்றனர்.