27 அடுக்கு மாடி.. நிலநடுக்கம் வந்தாலும் அசராத முகேஷ் அம்பானியின் வீடு.. அன்டீலியா என்றால் என்ன?

மும்பை: இந்தியாவின் பெரும் பணக்காரர்களில் ஒருவரான முகேஷ் அம்பானி தனது வீட்டிற்கு அன்டீலியா என ஏன் பெயர் வைத்துள்ளார் தெரியுமா?

இந்தியாவின் பெரும் பணக்காரர்களின் பட்டியலில் இருப்பவர் முகேஷ் அம்பானி. இவர் உலகிலேயே மிகப் பெரிய கட்டடத்தில் வசித்து வருகிறார். இந்த வீட்டில்தான் முகேஷ் தனது மனைவி, இரு மகன்கள், ஒரு மகளுடன் வசித்து வருகிறார்.

தந்தை திருபாய் அம்பானி உயிருடன் இருந்தவரை வேறு ஒரு வீட்டில் முகேஷ் அம்பானி குடும்பமும் அனில் அம்பானி குடும்பமும் ஒன்றாக வசித்து வந்தது. தந்தை மறைவுக்கு பிறகு இருவரும் தனித்தனியே வசித்து வருகிறார்.

அப்போது தனது மனைவிக்காக முகேஷ் பார்த்து பார்த்து கட்டியதுதான் இந்த அன்டீலியா வீடு. 27 அடுக்குமாடிகளை கொண்டது இந்த வீடு. இவர்கள் 2011 ஆம் ஆண்டு இந்த வீட்டிற்கு வந்தனர். இந்த வீட்டின் தற்போதைய மதிப்பு மட்டும் ரூ 25 ஆயிரம் கோடியாகும். விண்ணை முட்டும் அளவுக்கு மிகவும் உயரமான இந்த கட்டடம் 568 அடி அதாவது 173 மீட்டர் உயரம் கொண்டது.

இதன் மொத்த பரப்பளவு 4 லட்சம் சதுர அடியாகும். இங்கு 168 கார் ரிப்பேர் செய்யும் கடைகள் உள்ளன. வீட்டு விசேஷங்களை நடத்துவதற்கு ஒரு பெரிய ஹால் இருக்கிறது. 50 பேர் உட்கார்ந்து பார்க்கும் தியேட்டர், மாடி தோட்டங்கள், நீச்சல் குளம், ஸ்பா, மருத்துவமனை, கோயில் உள்ளிட்டவை இருக்கின்றன. அது போல் இங்கு பனி அறை உள்ளது. இந்த அறையில் சுவற்றில் இருந்து பனி உருகும் வகையில் அமைக்கப்பட்டுள்ளது.

ரிக்டர் அளவுகோலில் 8 அளவு நிலநடுக்கம் வந்தாலும் இந்த கட்டடம் உறுதித்தன்மையுடன் இருக்கும். உலகின் மிகவும் விலை மதிப்புள்ள கட்டடமாக இது கருதப்படுகிறது. இங்கு 9 அதிவேக லிப்ட்கள் உள்ளன. மேலும் இந்த கட்டடத்தில் பணியாற்றுவோருக்கென தனி அறைகள் உள்ளன. இந்த கட்டடத்திற்கு அன்டீலியா என ஏன் பெயர் வைத்தார்கள் தெரியுமா.

15 ஆம் நூற்றாண்டில் பல உலக வரைபடங்களில் இருந்த ஒரு தீவின் பெயர்தான் அன்டீலியா. பின்னாளில் இப்படி ஒரு தீவு இருப்பதே மறுக்கப்பட்டது. மேலும் இது நிலம் அளவிடுவோரின் தவறு என்றும் கூறப்பட்டது. இந்த அன்டீலியா தீவானது Isle of Seven Cities என அழைக்கப்படுகிறது. சூரியன், தாமரை மலரை முன்மாதிரியாக வைத்து இந்த வீடு அமைக்கப்பட்டுள்ளது.

அன்டீலியா என்பது ஒரு வகை தாவரத்தின் பெயர் என்கிறார்கள். ஆஸ்டெரேசி குடும்பத்தில் உள்ள பூக்கும் தாவரங்களின் ஒரு இனமாகும். தற்போது கியூபாவை பூர்வீகமாகக் கொண்ட அன்டீலியீ பிராச்சிசேட்டா என்ற ஒரு இனம் மட்டுமே உள்ளது. இதுதான் முகேஷ் அம்பானி தனது வீட்டிற்கு அன்டீலியா என பெயர் வைக்கக் காரணமாக இருக்கலாம் என சொல்லப்படுகிறது.

இந்த வீட்டில் இரு ஹெலிபேடுகள் உள்ளன. இந்த கட்டடத்தை வடிவமைத்தவர்கள் அமெரிக்க நாட்டு கட்டட் கலை நிபுணர்கள் ஆவர். இவர்கள் வடிவமைத்த நியூயார்க்கில் உள்ள மான்டரின் ஓரியண்டல் என்ற கட்டடத்தை பார்த்த நீடா அ்மபானி இம்பிரஸ் ஆனதால் இவர்களையே அன்டீலியாவை வடிவமைக்க நியமிக்கப்பட்டனர். 6 ஆண்டுகளாக கட்டி முடிக்கப்பட்ட இந்த கட்டடத்தில் 2010 ஆம் ஆண்டு கிரகபிரவேசம் நடந்துள்ளது.

ஆனால் அம்பானி உடனடியாக குடியேறவில்லை. கடந்த 2011 ஆம் ஆண்டு 50 பண்டிதர்களை வைத்து சிறப்பு யாகங்களை நடத்தி வாஸ்து பிரச்சினைகளை சரி பார்த்து அந்த ஆண்டு செப்டம்பரில்தான் குடிபெயர்ந்தனர். அன்றுமுதல் அந்த அன்டீலியாவில் இருந்து கொண்டுதான் மகன், மகள்களுக்கு திருமணத்தை நடத்தினார் முகேஷ் அம்பானி.

English summary

Why Antilia the name given to Mukesh Ambani's 27 storey building? What are the facilities in Ambani's house?