விஜய்க்காக சாப்பாடு, தண்ணீர் இல்லாமல் நிற்கிறோம்.. வரிசையில் நின்று ஓட்டுபோட மாட்டோமா! தவெக தொண்டர்

நாமக்கல்: ஒருநாள் முழுக்க தவெக தலைவர் விஜய்யை பார்க்க சாப்பாடு, தண்ணீர் இல்லாமல் அமர்ந்திருக்கும் நாங்கள், தேர்தலின் போது ஒரு மணி நேரம் வரிசையில் நின்று ஓட்டு போட மாட்டோம் என்று சிலர் தப்புக் கணக்கு போவதாக தவெக பெண் தொண்டர்கள் பேசியுள்ள வீடியோ சோசியல் மீடியாவில் ட்ரெண்டாகி வருகிறது.

தவெக தலைவர் விஜய் 3வது கட்டமாக நாமக்கல் மற்றும் கரூர் மாவட்டங்களில் சுற்றுப்பயணம் மேற்கொண்டு வருகிறார். ஏற்கனவே திருச்சி மற்றும் அரியலூர் மாவட்டங்களில் முதற்கட்ட சுற்றுப்பயணம் முடித்த நிலையில், அடுத்ததாக நாகை மற்றும் திருவாரூர் மாவட்டங்களில் சுற்றுப்பயணம் செய்தார்.

இந்த நிலையில் 3வது கட்ட சுற்றுப்பயணமாக நாமக்கல் மாவட்டத்திற்கு வருவதால், அங்கு தொண்டர்கள் குவிந்து வருகின்றனர். அதிகாலை முதலே நாமக்கல் மாவட்டத்தில் தவெக தொண்டர்களும், விஜய்யின் ரசிகர்கள் குவிந்து வருவதால், காவல்துறையினரால் கட்டுக்கடங்காத அளவிற்கு கூட்டம் அதிகரித்துள்ளது. வழக்கம்போல் விஜய்யை பார்ப்பதற்காக இளைஞர்களும், பெண்களும் அதிகளவில் திரண்டுள்ளனர்.

சென்னையில் இருந்து திருச்சிக்கு தனி விமானம் மூலம் வந்த விஜய், அடுத்ததாக காரில் நாமக்கல் பயணிக்க தொடங்கி இருக்கிறார். இந்த நிலையில் விஜய்யின் வருகை குறித்த தவெக பெண் தொண்டர் ஒருவர் பேசுகையில், நாமக்கல் மாவட்டம் தான் எங்களின் சொந்த ஊர். ஏற்கனவே திருச்சி விஜய் வந்த போது, அவரை பார்க்க சென்றோம். அப்போது விஜய் பேசும் போது, மைக்கில் சத்தம் வரவில்லை.

இம்முறை விஜய்யின் பேச்சை கேட்பதற்காகவே நாமக்கல் வந்துள்ளேன். இதற்காக நேற்றிரவே நாமக்கல் வந்துவிட்டேன். கூட்டம் எல்லாம் ஓட்டாக மாறாது என்று சொல்கிறார்கள்.. 2026 சட்டசபைத் தேர்தல் முடிவுளின் போது அனைவருக்கும் தெரியும்.. நாங்கள் சொல்வதை விட செயலில் காட்டுவோம். இங்கு உள்ளவர்கள் அனைவரும் விஜய்க்கு வாக்களிப்போம்.

நிரந்தரமாக சிம்மாசனமிட்டு முதல்வர் நாற்காலியில் அமர்வார். 2026ல் தவெகவுக்கு மட்டுமே வாக்களிப்போம். கொள்கை தெரியாமல் கொள்ளையடித்துவிட்டு போறக் கட்சியல்ல நாங்கள்.. சாப்பாடு, தண்ணீர் இல்லாமல் ஒருநாள் முழுக்க இங்கு விஜய்யை பார்க்க இவ்வளவு பேர் கூடி இருக்கிறோம்.. ஒரு மணி நேரம் வரிசையில் நின்று வாக்களிக்க மாட்டோமா.. இதெல்லாம் அரசியல் வாதிகளுக்கு புரியப்போவதில்லை.. கூட்டம் கூடினால் சில சேதாரங்கள் ஏற்படத்தான் செய்யும் என்று தெரிவித்துள்ளார்.

English summary

TVK Vijay: We are waiting to see Thalapathy Vijay without even food and Water says TVK women Cadre. A video of women supporters of Tamilaga Vetri Kazhagam (TVK) expressing their dedication to leader Vijay has gone viral.