பக்க விளைவே இல்லை.. கோவாக்சினுக்கு 77.8% கொரோனா தடுப்பாற்றல்.. தி லான்செட் இதழ் அறிவிப்பு!

Updated: Friday, November 12, 2021, 11:45 [IST]

Subscribe to Oneindia Tamil

நியூயார்க்: கொரோனா வைரசுக்கு எதிராக கோவாக்சின் 77.8 சதவிகித தடுப்பாற்றல் கொண்டு இருப்பதாக தி லான்செட் மருத்துவ இதழின் ஆய்வு தெரிவித்துள்ளது.

கொரோனா வைரசுக்கு எதிராக இந்தியாவின் பாரத் பயோடெக் நிறுவனம் மூலம் கோவாக்சின் என்ற வேக்சின் உருவாக்கப்பட்டது. உலக சுகாதார மையம் இதற்கு கடந்த சில நாட்களுக்கு முன் அவசர அனுமதி அளித்தது.

பல கட்ட ஆலோசனைகளுக்கு பின், பலமுறை டேட்டாக்களை சோதனை செய்த பின் அனுமதி அளிக்கப்பட்டது. கிட்டத்தட்ட 8 மாத சோதனைகளுக்கு பின்தான் கோவாக்சினுக்கு உலக சுகாதார மையம் அவசர அனுமதி வழங்கியது.

அனுமதி

கோவாக்சினுக்கு அனுமதி அளிக்கப்பட்ட நிலையில் அமெரிக்காவும் கோவாக்சின் போட்ட பயணிகளுக்கு அனுமதி வழங்கியது. அதேபோல் யு.கே, ஆஸ்திரேலியா ஆகிய நாடுகளும் கோவாக்சின் போட்டவர்களுக்கு அனுமதி வழங்கியது. பல உலக நாடுகள் இதற்கு அனுமதி வழங்கி உள்ளது. இதுவரை நடத்தப்பட்ட மனித சோதனைகளில் கோவக்சினுக்கு 77.8% நோய் எதிர்ப்பு ஆற்றல் இருப்பதாகவும், டெல்டாவிற்கு எதிராக 65.2% எதிர்ப்பு ஆற்றல் இருப்பதாகவும் இந்திய சோதனைகளில் கண்டுபிடிக்கப்பட்டது குறிப்பிடத்தக்கது.

எப்படி

இந்த நிலையில்தான் கொரோனா வைரசுக்கு எதிராக கோவாக்சின் 77.8 சதவிகித தடுப்பாற்றல் கொண்டு இருப்பதாக தி லான்செட் மருத்துவ இதழின் ஆய்வும் தெரிவித்துள்ளது. மொத்தம் 130 பேரிடம் செய்யப்பட்ட சோதனையில் இந்த முடிவு அறிவிக்கப்பட்டுள்ளது. இதில் 24 பேருக்கு கோவாக்சின் வேக்சினும், 106 பேருக்கு சத்து மருந்தும் கொடுக்கப்பட்டுள்ளது. இதில் கோவாக்சின் 77.8 சதவிகித தடுப்பாற்றல் கொண்டதாக கண்டறியப்பட்டுள்ளது.

விளைவு

கொரோனா கோவாக்சின் டோஸ் போடப்பட்டு இரண்டு வாரம் கழித்து இது எதிர்ப்பு ஆற்றலை வழங்கியதாகவும் உடலில் ஆண்டிபாடி உருவானதாகவும் தி லான்செட் மருத்துவ இதழின் ஆய்வு தெரிவித்துள்ளது. இதே ஆய்வு கட்டுரையில் கோவாக்சின் மீது இந்தியாவில் நடத்தப்பட்ட சோதனை குறித்தும் விவரம் வெளியிடப்பட்டுள்ளது. இந்தியாவில் 18-97 வயது கொண்டவர்களில் 24419 பேரிடம் இந்த கோவாக்சின் 2020 நவம்பர் முதல் 2021 மே வரை சோதனை செய்யப்பட்டுள்ளது.

இல்லை

அதில் யாரிடமும் பெரிதாக பக்க விளைவுகள் இல்லை. அதேபோல் கோவாக்சின் போட்டவர்கள் பக்க விளைவு காரணமாக மரணிக்கவில்லை என்றும் தி லான்செட் மருத்துவ இதழின் ஆய்வு தெரிவித்துள்ளது. அறிகுறி இல்லாத கொரோனா கேஸ்களுக்கு எதிராக இது 63.6 சதவீத எதிர்ப்பு ஆற்றல் கொண்டு உள்ளதாகவும், மற்ற அனைத்து வகை உருமாறிய கொரோனாவிற்கும் எதிராக கோவாக்சின் சராசரியாக 70.8 சதவீத எதிர்ப்பு ஆற்றல் கொண்டு இருப்பதாகவும் தி லான்செட் மருத்துவ இதழின் ஆய்வு தெரிவித்துள்ளது.