அல் கொய்தா, ISIS வரிசையில் இஸ்ரேல் பெயர்! ஐ.நா எடுத்த அதிரடி முடிவு.. பின்னால் இருக்கும் ஷாக் காரணம்

நியூயார்க்: பாலஸ்தீன போர் மூலம் 14 ஆயிரம் குழந்தைகளின் மரணத்திற்கு காரணமாக இருந்த இஸ்ரேலை, அல் கொய்தா, ஐஎஸ்ஐஎஸ் வரிசையில் சேர்க்க ஐநா முடிவெடுத்திருக்கிறது.

பாலஸ்தீனத்தை இஸ்ரேலின் ஆதிக்கத்திலிருந்து விடுவிக்க பல்வேறு ஆயுதம் ஏந்திய குழுக்கள் செயல்பட்டு வருகின்றன. இதில் ஒன்றுதான் ஹமாஸ். இந்த ஹமாஸை இஸ்ரேல், அமெரிக்கா உள்ளிட்ட நாடுகள் தீவிரவாத அமைப்பாக பட்டியலிட்டிருக்கிறது. இந்த அமைப்பு கடந்த ஆண்டு இஸ்ரேல் மீது ஏவுகணைகளை வீசி தாக்குதல் நடத்தியது.

இதற்கு பதிலடி கொடுப்பதாக கூறி 200 நாட்களுக்கும் மேலாக இஸ்ரேல் ராணுவம், காசாவில் உள்ள பாலஸ்தீன மக்கள் மீது தாக்குதலை தொடுத்து வருகிறது. இதில் 36 ஆயிரத்திற்கும் அதிகமான மக்கள் உயிரிழந்துள்ளனர். இதில் பாதிக்கும் மேற்பட்டவர்கள் பெண்கள். 75% பேர் குழந்தைகள் என பாலஸ்தீன சுகாதாரத்துறை தெரிவித்திருக்கிறது.

காசா மீது இஸ்ரேல் நடத்தி வரும் தாக்குதல் சமீபத்தில் உச்சத்தைத் தொட்டிருக்கிறது. சில நாட்களுக்கு முன்னர் ஐ நா பணியாளர்களை ஏற்றிச் சென்ற வாகனம் மீது இஸ்ரேல் வான்வழி தாக்குதலை நடத்தியது. இதில் 7 பேர் கொல்லப்பட்டனர். எனவே உடனடியாக போர் நிறுத்தத்தை கொண்டு வரவேண்டும் என்று உலக நாடுகள் தீவிரமாக வலியுறுத்த தொடங்கின. இது நாள் வரை இஸ்ரேலுக்கு ஆதரவாக நின்ற அமெரிக்கா கூட, உடனடியாக போரை நிறுத்த வேண்டும் என்று கேட்டுக்கொண்டது.

போர் காரணமாக காசாவுக்குள் நிவாரண பொருட்கள் எதுவும் வரவில்லை. இதனால் உணவுக்கும், குடிநீருக்கும் பஞ்சம் ஏற்பட்டிருக்கிறது. நோயாளிகள், கர்ப்பிணிகள், முதியவர்கள் உணவு கிடைக்காமல் அடுத்தடுத்து உயிரிழந்தனர். தொற்று நோய் பாதிப்புகளும் தீவிரமடைந்துள்ளன.

மறுபுறம் இந்த போரை எதிர்த்தும், போரில் இஸ்ரேலுக்கு ஆதரவான அமெரிக்காவின் நிலைப்பாட்டை எதிர்த்தும் அமெரிக்க பல்கலைக்கழகங்களில் போராட்டங்கள் சூடுபிடித்துள்ளன. அமெரிக்காவில் மட்டும் 50க்கும் அதிகமான பல்கலைக்கழகங்களில் மாணவர்கள் இந்த போராட்டத்தை நடத்தி வருகின்றனர். போராடும் மாணவர்கள் மற்றும் பேராசிரியர்களை அந்நாட்டு காவல்துறை கைது செய்து வருகிறது. தற்போது வரை 900க்கும் அதிகமானோர் கைதாகியுள்ளனர்.

மாணவர் போராட்டம் லண்டன், பாரிஸ் என ஐரோப்பிய நாடுகளுக்கும் பரவ தொடங்கியுள்ளது. சூழல் இப்படி இருக்கையில் 'சர்வதேச குற்றவியல் நீதிமன்றத்தால்' (ICC) போர் குற்றத்திற்காக இஸ்ரேல் பிரதமர் நெதன்யாகு விரைவில் கைது செய்யப்படுவார் என்று தகவல்கள் வெளியாகியுள்ளன.

இப்படியாக உலகம் முழுவதும் போருக்கு எதிரான குரல்கள் எழுந்த போதும், போரிலிருந்து இஸ்ரேல் பின்வாங்க தயாராக இல்லை. எனவே இஸ்ரேலின் பெயரை ஐஎஸ்ஐஎஸ், அல் கொய்தா வரிசையில் சேர்க்க ஐநா முடிவெடுத்துள்ளது. குழந்தைகளுக்கு எதிரான தொடர் வன்முறையில் ஈடுபட்டு வருபவர்களை பிளாக் லிஸ்ட் பட்டியலில் சேர்ப்பதை ஐ.நா ஒவ்வொரு வருடமும் செய்து வருகிறது.

அந்த வகையில் இந்த வருடம் பாலஸ்தீன போர் மூலம் 14 ஆயிரம் குழந்தைகளை கொலை செய்த‌ இஸ்ரேல் மீது நடவடிக்கை எடுக்கும் வண்ணம் ஐநா பொதுச் செயலாளர் அன்டோனியோ குட்டரெஸ் இந்த முடிவை எடுத்திருக்கிறார். இந்த தகவலை நேற்று இஸ்ரேல் இராணுவத்திற்கு அனுப்பியும் வைத்திருக்கிறார். வரும் 26 ஐ.நா மனித உரிமைகள் நாளில் இது நடைமுறைக்கு வரும் என்றும் சொல்லப்பட்டிருக்கிறது.

பிளாக் லிஸ்ட்டிலிருந்த இஸ்ரேல் பெயரை நீக்க அந்நாட்டின் அதிகாரிகள் முயற்சிகளை மேற்கொண்டிருக்கிறார்கள். இருப்பினும், 26ம் தேதி வெளியிடப்படும் லிஸ்ட்டில் இஸ்ரேலின் பெயர் நிச்சயம் இருக்கும் என ஐநா வட்டாரங்கள் தெரிவித்துள்ளன. அப்படி வந்துவிட்டால், உலக நாடுகள் இஸ்ரேல் மீது ஆயுத தடையை விதிக்கக்கூடும். இது இஸ்ரேலுக்கு மட்டுமல்லாது அமெரிக்காவுக்கும் தலைவலியை ஏற்படுத்தும்.

English summary

The United Nations has decided to include Israel in the ranks of Al Qaeda and ISIS, which has caused the death of 14,000 children through the Palestinian war.