B-1B ஜெட்களை இறக்கிய டிரம்ப்! அவசரமாகப் புறப்பட்ட அமெரிக்க குண்டுவீச்சு விமானம்.. அணு அட்டாக்?
நியூயார்க்: மத்திய கிழக்கு நாடுகளில் அமெரிக்காவுக்கும் ஈரானுக்கும் இடையே நீடித்து வரும் மோதல் தற்போது மிகவும் முக்கியமான ஒரு கட்டத்தை எட்டியுள்ளது. ஒருபுறம் போரை நிறுத்துவதற்கு ஈரான் மூன்று முக்கிய நிபந்தனைகளை முன்வைத்து அமெரிக்க அதிபர் டொனால்ட் டிரம்பின் பதிலுக்காகக் காத்துக் கொண்டிருக்கிறது. மற்றொருபுறம் பிரிட்டனில் உள்ள விமானப் படைத் தளத்தில் இருந்து அமெரிக்காவின் அதிபயங்கர பி-1பி (B-1B Lancer) குண்டுவீச்சு விமானம் ஒன்று திடீரென வானில் சீறிப்பாய்ந்து புறப்பட்டுள்ளது.
இந்த விமானப் புறப்பாடு சாதாரணப் பயிற்சியின் ஒரு பகுதியா அல்லது ஈரானுக்கு அமெரிக்கா விடுக்கும் நேரடி எச்சரிக்கையா என்ற கேள்வி சர்வதேச அளவில் பெரும் விவாதத்தைக் கிளப்பியுள்ளது. அதே நேரத்தில் அமெரிக்க அதிபர் டிரம்ப் தனது கேம்ப் டேவிட் பயணத்தை பாதியிலேயே முடித்துக் கொண்டு அவசரமாக வாஷிங்டன் திரும்பியிருப்பது போர்ப் பதற்றத்தை மேலும் அதிகரித்துள்ளது.
பிரிட்டன் தளத்தில் இருந்து கிளம்பிய பி-1பி விமானம்
பிரிட்டனில் உள்ள ஆர்.ஏ.எஃப் ஃபேர்ஃபோர்ட் என்ற விமானப் படைத் தளத்தில் இருந்து அமெரிக்காவின் நீண்ட தூரம் சென்று தாக்கக்கூடிய பி-1பி குண்டுவீச்சு விமானம் ஒன்று வானை நோக்கிப் பறக்கும் காட்சிகள் வெளியாகியுள்ளன. இந்த விமானம் ஆபரேஷன் எபிக் பியூரி (தாக்குதல் திட்டத்தின் கீழ் கடந்த மார்ச் மாதத்தில் இருந்தே ஈரானிய இலக்குகளைக் கண்காணிக்கவும் தாக்கவும் அங்கு நிலைநிறுத்தப்பட்டிருந்தது.
விமானம் புறப்பட்ட போது அதன் எஞ்சினில் இருந்து 'ஆஃப்டர்பர்னர்' எனப்படும் தீப்பிழம்பு சீறிப் பாய்ந்தது. பொதுவாக போர் விமானங்கள் முழுமையான ஆயுதங்கள் மற்றும் வெடிகுண்டுகளைச் சுமந்து கொண்டு அதிக எடையுடன் கிளம்பும்போது மட்டுமே இத்தகைய கூடுதல் விசையைப் பயன்படுத்தும். இதனால் இந்த விமானம் ஏதேனும் நேரடித் தாக்குதலுக்குச் செல்கிறதா என்ற சந்தேகம் வலுத்துள்ளது. எனினும், வழக்கமான பயிற்சிப் பறத்தலின் போதும் கூட இதுபோன்று நிகழ வாய்ப்புள்ளதால், இதன் உண்மையான இலக்கு இன்னும் அதிகாரப்பூர்வமாகத் தெரியவில்லை. பிரிட்டனில் உள்ள இந்தத் தளத்தில் இருந்து சுமார் 6 முதல் 8 மணி நேரத்திற்குள் ஈரான் வான் எல்லைக்கு இந்த விமானத்தால் சென்றுவிட முடியும்.
போரை முடிக்க ஈரான் விதித்துள்ள 3 முக்கிய நிபந்தனைகள்
போர்ப் பதற்றம் ஒருபுறம் இருக்க, அமைதிப் பேச்சுவார்த்தைக்கான கதவுகளையும் ஈரான் திறந்து வைத்துள்ளது. கத்தார் மற்றும் பாகிஸ்தான் நாடுகளின் தூதர்கள் மூலமாக ஈரான் தனது நிபந்தனைகளை அமெரிக்காவுக்கு முறைப்படி அனுப்பியுள்ளது.
ஈரானின் உச்ச தேசியப் பாதுகாப்பு கவுன்சிலின் தலைவர் மொஹ்சன் ரெசாயி இதுபற்றி விரிவாகப் பேசியுள்ளார். அமைதிப் பேச்சுவார்த்தை தொடங்க வேண்டும் என்றால் அமெரிக்கா மூன்று விஷயங்களை உடனடியாக ஏற்க வேண்டும் என்று அவர் திட்டவட்டமாகக் கூறியுள்ளார்:
முழுமையான போர் நிறுத்தம்: அனைத்துப் பகுதிகளிலும் நடந்து வரும் போர் மற்றும் தாக்குதல்களை அமெரிக்கா உடனடியாக முற்றிலுமாக நிறுத்த வேண்டும்.
முடக்கப்பட்ட சொத்துக்களை விடுவித்தல்: சர்வதேச அளவில் அமெரிக்காவால் முடக்கி வைக்கப்பட்டுள்ள ஈரானின் அனைத்துப் பணத்தையும் சொத்துக்களையும் விடுவிக்க வேண்டும்.
கடல்வழி முற்றுகையை விலக்குதல்: ஈரானிய கப்பல்கள் மற்றும் சரக்கு போக்குவரத்துக்கு எதிராக விதிக்கப்பட்டுள்ள கடல்வழித் தடைகளை அமெரிக்கா முழுமையாக நீக்க வேண்டும்.
இந்தக் கோரிக்கைகளை கத்தார் தூதர் மூலமாக வாஷிங்டனுக்கு அனுப்பியுள்ளதாகவும், அமெரிக்க அதிபர் டொனால்ட் டிரம்பின் பதிலுக்காகத் தாங்கள் காத்திருப்பதாகவும் ஈரான் தெரிவித்துள்ளது.
டிரம்பின் அவசர முடிவு மற்றும் பாதுகாப்பு எச்சரிக்கை
ஈரான் அமைதி நிபந்தனைகளை முன்வைத்த அதே நேரத்தில், அமெரிக்கத் தரப்பிலும் சில அசாதாரண நகர்வுகள் நடந்துள்ளன. வார இறுதி ஓய்வுக்காக கேம்ப் டேவிட் சென்றிருந்த அதிபர் டொனால்ட் டிரம்ப், தனது பயணத்தை அவசரமாகப் பாதியிலேயே முடித்துக் கொண்டு வெள்ளை மாளிகைக்குத் திரும்பியுள்ளார்.
அதேபோல, மத்திய கிழக்கில் உள்ள சவுதி அரேபியா உள்ளிட்ட ஆறு நாடுகளில் வசிக்கும் அமெரிக்க குடிமக்களுக்கு அமெரிக்க வெளியுறவுத்துறை தீவிர பாதுகாப்பு எச்சரிக்கையை விடுத்துள்ளது. டிரம்பின் திடீர் வெள்ளை மாளிகை வருகை, பாதுகாப்பு எச்சரிக்கைகள் மற்றும் பிரிட்டனில் இருந்து புறப்பட்ட குண்டுவீச்சு விமானம் என அனைத்தும் ஒரே நேரத்தில் நிகழ்வது உலக நாடுகளிடையே கலக்கத்தை ஏற்படுத்தியுள்ளது.
போருக்கு நாங்கள் தயார்.. ஈரான் விடுத்த எச்சரிக்கை
அமைதிப் பேச்சுவார்த்தைக்கு அழைப்பு விடுத்தாலும், அமெரிக்காவுக்குப் பணிய மாட்டோம் என்பதில் ஈரான் மிகவும் உறுதியாக உள்ளது. இது குறித்துப் பேசிய மொஹ்சன் ரெசாயி, "அமெரிக்காவின் அச்சுறுத்தல்கள் எங்களை ஒன்றும் செய்ய முடியாது. அமெரிக்க ராணுவத்தின் பலவீனங்கள் எங்களுக்கு நன்றாகவே தெரியும். ஒருவேளை எங்கள் நிபந்தனைகளை நிராகரித்துவிட்டு அமெரிக்கா மீண்டும் தாக்க நினைத்தால், ஒரு தீர்க்கமான போரை எதிர்கொள்ள நாங்கள் முழு பலத்துடன் தயாராக இருக்கிறோம்" என்று எச்சரித்துள்ளார்.
மேலும், வளைகுடா மற்றும் அரபிக்கடல் பகுதிகளில் இருக்கும் அமெரிக்க போர்க்கப்பல்களைக் குறிவைத்துத் தங்களின் ராணுவத் திட்டங்கள் மாற்றி அமைக்கப்பட்டுள்ளதாகவும் ஈரான் தெரிவித்துள்ளது. ஈரானின் ஆயுதப் படைகள் தற்போது உச்சகட்ட போர்த் தயார் நிலையில் வைக்கப்பட்டுள்ளதாகத் தகவல்கள் தெரிவிக்கின்றன.
உலகம் உற்றுநோக்கும் டிரம்பின் அடுத்த கட்ட முடிவு
தற்போது பந்து அமெரிக்காவின் கையில் உள்ளது. ஈரானின் மூன்று நிபந்தனைகளை ஏற்றுக்கொண்டு பேச்சுவார்த்தை மூலம் போருக்கு டிரம்ப் முற்றுப்புள்ளி வைப்பாரா, அல்லது புறப்பட்ட பி-1பி போர் விமானங்கள் மூலம் கடுமையான ராணுவத் தாக்குதலை முன்னெடுப்பாரா என்பதுதான் சர்வதேச சமூகத்தின் மிகப்பெரிய எதிர்பார்ப்பாக உள்ளது. டிரம்ப் அளிக்கப்போகும் பதில் உலக அமைதியையும், கச்சா எண்ணெய் சந்தையையும் தீர்மானிக்கும் மிக முக்கிய காரணியாக மாறவுள்ளது.
Click it and Unblock the Notifications
Sign in with Google
