ஜனநாயக கட்சியுடன் இணக்கம்.. சொந்த கட்சியினரால் தூக்கியெறியப்பட்ட அமெரிக்க நாடாளுமன்ற சபாநாயகர்!

நியூயார்க்: அமெரிக்காவில் அடுத்த ஆண்டு அதிபர் தேர்தல் நடைபெற உள்ள நிலையில், தற்போது அந்நாட்டு நாடாளுமன்றத்தின் சபாநாயகர் கெவின் மெக்கார்த்தி அப்பதவியிலிருந்து நீக்கப்பட்டிருக்கிறார்.

அமெரிக்காவில் தற்போது ஜனநாயக கட்சி ஆட்சியில் இருக்கிறது. இந்நிலையில் அடுத்த ஆண்டு அதிபர் தேர்தல் நடைபெற இருப்பதால், குடியரசு கட்சி சார்பில் டொனால்ட் டிரம்ப் அதிபர் பதவிக்கு போட்டியிட இருக்கிறார். ஆனால் அவர் மீது ஏராளமான குற்றச்சாட்டுகள் இருக்கின்றன. பாலியல் குற்றாட்டு தொடங்கி அதிபர் மாளிகையின் ரகசிய ஆவணங்களை வீட்டிற்கு எடுத்து சென்றது வரை பல்வேறு புகார்களுக்கு ஆளாகி நீதிமன்ற படிகளை டிரம்ப் ஏறி வருகிறார்.

கடந்த முறை தேர்தலில் தோல்வியுற்றபோது அவரது ஆதரவாளர்கள் பெரும் கிளர்ச்சியை உருவாக்கினர். வெள்ளை மாளிகையை முற்றுகையிட்டு வன்முறையில் ஈடுபட்டனர். அமெரிக்க வரலாற்றில் அதுபோன்ற ஒரு போராட்டத்தை நாடு இதற்கு முன்னர் சந்திக்காத வகையில் டிரம்ப் ஆதரவாளர்கள் அராஜகத்தில் ஈடுபட்டனர். இப்படி இருக்கையில், அமெரிக்க நாடாளுமன்ற சபாநாயகர் கெவின் மெக்கார்த்தி தொடர்ந்து ஜனநாயக கட்சியுடன் இணக்கமாக செல்வதாக குற்றச்சாட்டுகள் எழுந்தன.

மெக்கார்த்தி குடியரசு கட்சியை சேர்ந்தவராவார். இப்படி இருக்கையில் இதை இப்படியே விட்டால் வேலைக்கு ஆகாது என தீர்மானித்த குடியரசு கட்சி எம்பிக்கள் மெக்கார்த்திக்கு எதிராக தீர்மானத்தை கொண்டு வந்து அவரை தற்போது பதவி நீக்கம் செய்துள்ளனர். கடந்த 234 ஆண்டுக்கால வரலாற்றில் முதன்முறையாக, அமெரிக்க நாடாளுமன்ற சபாநாயகர் பதவி நீக்கம் செய்யப்பட்டுள்ளார். அதவும் சொந்தக் கட்சியினரே சபாநாயகருக்கு எதிராக வாக்களித்து அவரை வெளியேற்றியிருப்பது அரசியல் தளத்தில் சலசலப்பை ஏற்படுத்தியுள்ளது.

மெக்கார்த்தி பதவி நீக்கம் செய்யப்பட்ட பின்னர் அவர் நாடாளுமன்றத்தை விட்டு வெளியேறினார். வெளியேறும்போது எந்த கருத்துக்களையும் அவர் கூறவில்லை. அவரை யாரும் நம்பாததே இந்த முடிவுக்கு காரணம் என்று குடியரசு கட்சியினர் கூறியுள்ளனர். ஏற்கெனவே அவரது நடவடிக்கைகள் குறிதது பலமுறை எச்சரிக்கப்பட்டதாகவும், ஆனால் அதை அவர் ஒரு பொருட்டாக எடுத்துக்கொள்ளாது அவர் மீதான பதவிநீக்க தீர்மானத்திற்கு முக்கியமான காரணம் எனவும் அவர்கள் கூறியுள்ளனர்.

English summary

With next year's presidential election in the United States, the Speaker of the House of Representatives, Kevin McCarthy, has been removed from office.