“ஊட்டிக்கு சுற்றுலா பயணிகள் யாரும் வர வேண்டாம்”.. நீலகிரி மாவட்ட ஆட்சியர் வேண்டுகோள்!

நீலகிரி: தொடர் மழை காரணமாக இன்று முதல் அக்டோபர் 26 வரை சுற்றுலா பயணிகள் உதகை வருவதை தவிர்க்குமாறு நீலகிரி மாவட்ட ஆட்சியர் லட்சுமி பவ்யா தண்ணீரு வேண்டுகோள் விடுத்துள்ளார்.

வடகிழக்குப் பருவமழை தீவிரமடைந்துள்ள நிலையில் நீலகிரி மாவட்டம் உதகையில் நேற்றிரவு முழுவதும் பரவலாக கனமழை பெய்தது. அதிகபட்சமாக பர்லியாரில் 25 சென்டி மீட்டர் மழை பெய்த நிலையில், உதகை - மேட்டுப்பாளையம் சாலையில் 3 இடங்களில் நிலச்சரிவு ஏற்பட்டது. இதில் அரசு பேருந்து ஒன்று சிக்கிக் கொண்டது.

இடிபாடுகளில் சிக்கி பேருந்தின் ஓட்டுநர் பரிதாபமாக உயிரிழந்தார். படுகாயம் அடைந்த நடத்துநர் மருத்துவமனையில் அனுமதிக்கப்பட்டு சிகிச்சை பெற்று வருகிறார். அந்தப் பேருந்து, சம்பவம் நடப்பதற்கு சிறிது நேரத்துக்கு முன்பாக டயர் பஞ்சர் ஆனதால் பயணிகள் இறக்கிவிடப்பட்டுள்ளனர். இதன் காரணமாக பெரிய அளவில் உயிரிழப்பு ஏற்படாமல் தவிரக்கப்பட்டுள்ளது.

பர்லியார் பகுதியில் நிலச்சரிவால் பல இடங்களில் மரங்களும் முறிந்து விழுந்தன. இதனால், சாலை போக்குவரத்தும் உதகை மலை ரயில் சேவையும் பாதிக்கப்பட்டது. மலைப் பாதையில் ஏற்பட்டுள்ள மண்சரிவுகளை ஜேசிபிகள் உதவியுடன் அகற்றும் பணியும் தீவிரமாக நடைபெற்று வருகிறது. இந்நிலையில், குன்னூர் - மேட்டுப்பாளையம் மலைப்பாதையில் ஏற்பட்டுள்ள மண் சரிவுகளை மாவட்ட ஆட்சித் தலைவர் லட்சுமி பவ்யா டண்ணீரு நேரில் ஆய்வு செய்தார்.

இந்நிலையில், நீலகிரி மாவட்டத்தில் தொடர் கனமழை பெய்து வருவதால், 3 நாட்களுக்கு சுற்றுலாப் பயணிகள் உதகைக்கு வர வேண்டாம் என மாவட்ட ஆட்சியர் வேண்டுகோள் விடுத்துள்ளார். மேலும் மிக கனமழையால் சாலைகளில் மரங்கள் விழுந்தும் மண்சரிவுகள் ஏற்பட்டும் போக்குவரத்திற்கு இடையூறு இருப்பதால் பொதுமக்கள் தேவையின்றி வெளியே வர வேண்டாம் என்றும் அறிவுறுத்தியுள்ளார்.

இது தொடர்பாக நீலகிரி மாவட்ட ஆட்சியர் விடுத்துள்ள செய்திக் குறிப்பில், இந்திய வானிலை ஆய்வு மையம் மிக கனமழை எச்சரிக்கை விடுக்கப்பட்டதை தொடர்ந்து நேற்று (23.10.2026) இரவு முதல் நீலகிரி மாவட்டத்தில் மிக கனமழை பெய்துவருவதால் சாலைகளில் மரங்கள் விழுந்தும் மண்சரிவுகள் ஏற்பட்டும் போக்குவரத்திற்கு இடையூறாக உள்ளதால் நீலகிரி மாவட்டத்திற்கு வருகைபுரியும் சுற்றுலா பயணிகள் மற்றும் பொதுமக்கள் மிகுந்த எச்சரிக்கையுடன் இருக்குமாறும் அறிவுறுத்தப்படுகிறார்கள்.

மேலும், மிக கனமழை பெய்யும் என முன்னறிவிப்பு உள்ளதால் அடுத்த மூன்று நாட்களுக்கு வானிலை சீராகும்வரை நீலகிரி மாவட்டத்திற்கு வருகை புரிவதை தவிர்க்குமாறும் கேட்டுக் கொள்ளப்படுகிறது. மேலும், பின்வரும் பாதுகாப்பு முன்னெச்சரிக்கை நடவடிக்கைகளை பின்பற்றுமாறு அறிவுறுத்தப்படுகிறார்கள்.

* பல்வேறு இடங்களில் பெரும் நிலச்சரிவுகள் ஏற்பட்டுள்ளதால், மேட்டுப்பாளையத்திலிருந்து குன்னூர் மற்றும் கோத்தகிரி வழியாக உதகமண்டலம் செல்லும் பொதுமக்கள் மலைப்பாதைகளை தவிர்க்குமாறு அறிவுறுத்தப்படுகிறார்கள்.

* நீர்வீழ்ச்சிகள், ஆறுகள், ஓடைகள், அணைகள், ஏரிகள் மற்றும் பிற நீர்நிலைகளுக்கு செல்ல வேண்டாம்.

* வெள்ளம் சூழ்ந்த சாலைகள் பெருக்கெடுத்து ஓடும் ஓடைகள் மற்றும் தாழ்வான பகுதிகளில் இருந்து விலகி இருங்கள்.

* நிலச்சரிவுகள், மரங்கள் விழுதல், பாறைகள் சரிதல் மற்றும் திடீர் வெள்ளப்பெருக்கு ஏற்படும் அபாயம் குறித்து விழிப்புடன் இருங்கள்.

* மாவட்ட நிர்வாகம் மற்றும் உள்ளாட்சி அமைப்புகளால் வழங்கப்படும் அதிகாரப்பூர்வ அறிவுரைகளை பின்பற்றவும். மேலும், மாவட்ட நிர்வாகத்திற்கு ஒத்துழைப்பு வழங்குமாறு அறிவுறுத்தப்படுகிறது.

* அத்தியாவசிய தேவையை தவிர பொதுமக்கள் பொதுஇடங்களுக்கு மற்றும் சுற்றுலா தலங்களுக்கு செல்வதை தவிர்க்கவும்.

* இந்திய வானிலை ஆய்வு மையத்தால் மழை குறித்த தகவல்களை தெரிந்துகொண்டு விழிப்புடன் இருக்க வேண்டும்.

* பொதுமக்கள் மற்றும் சுற்றுலா பயணிகள் ஆற்றில் இறங்கவோ, குளிக்கவோ கூடாது.

* சுற்றுலா பயணிகள் மற்றும் பொதுமக்கள் வாகனங்களை மரத்தின் அடியில் நிறுத்தக்கூடாது.

* நிலச்சரிவு அபாயம் உள்ள பகுதிகளில் சுற்றுலா பயணிகள் கவனமுடன் இருக்க வேண்டும்.

* பொதுமக்கள் மழை பெய்யும்போது, மின்கம்பங்கள் மற்றும் மின்கம்பிகளை தொட வேண்டாம்.

* அடுத்த மூன்று நாட்களுக்கு அத்தியாவசிய மற்றும் அவசரகால வாகனங்களுக்கு விலக்கு அளிக்கப்பட்டு, TNSTC சேவைகள் உட்பட அனைத்து வாகனப் போக்குவரத்தும் மாலை 6 மணி முதல் காலை 7 மணி வரை நிறுத்தப்பட்டுள்ளது.

இது தவிர மழை மற்றும் இயற்கை இடர்பாடுகளால் பாதிப்பு ஏற்படும் போது பொதுமக்கள் தகவல் தெரிவிக்க மாவட்ட அவசரகால கட்டுப்பாட்டு மையத்தில் செயல்படும் கட்டணமில்லா தொலைபேசி எண் 1077 மற்றும் 0423-2450034, 2450035-க்கு தொடர்பு கொண்டு தகவல் தெரிவிக்கலாம். இவ்வாறே வருவாய் கோட்டாட்சியர் மற்றும் வட்டாட்சியர் அலுவலகங்களிலும் கட்டுப்பாட்டு மையங்கள் செயல்பட்டு வருகிறது.

உதகை கோட்டத்திற்கு 0423-24455772 குன்னூர் கோட்டத்திற்கு 0423-2206002 கூடலூர் கோட்டத்திற்கு 04262-261296 உதகை வட்டத்திற்கு 0423-2442433, குன்னூர் வட்டத்திற்கு 0423-2206102, கோத்தகிரி வட்டத்திற்கு 04266-271718, குந்தா வட்டத்திற்கு 0423-2508123, கூடலூர் வட்டத்திற்கு 04262-261252, பந்தலூர் வட்டத்திற்கு 04262-220734 ஆகிய எண்களில் தொடர்பு கொண்டும் தகவல் தெரிவிக்கலாம். இவ்வாறு பெறப்பட்ட தகவல்கள் மீது உடனுக்குடன் நடவடிக்கை எடுக்கப்படும். இந்தக் கட்டுப்பாட்டு மையம் 24 மணி நேரமும் செயல்பட்டு வருகிறது.

வடகிழக்குப் பருவமழையை எதிர்கொள்வதற்கு தேவையான அனைத்து முன்னெச்சரிக்கை நடவடிக்கைகளையும் மாவட்ட நிர்வாகம் மேற்கொண்டுள்ளது. எனவே, பொதுமக்கள் எவ்வித அச்சமும் அடைய வேண்டாம் என்று தெரிவிக்கப்பட்டுள்ளது.

English summary

Due to continuous rain, Nilgiris District Collector Lakshmi Bhavya Tanneeru has requested tourists to avoid visiting Ooty from today until October 26.