மீண்டும் சிக்கிய டிடிஎஃப் வாசன்: பயங்கர வேகம்.. நிற்காமல் பறந்த பைக்- மடக்கிப் பிடித்த இன்னொரு டீம்!
நீலகிரி: நீலகிரி மாவட்டம் உதகையில் பிரபல யூடியூபர் டிடிஎஃப் வாசன் அதிவேகமான பைக்கில் சென்றபோது போலீசார் அவரை நிறுத்த முயன்றும் நிற்காமல் சென்றுள்ளார். மற்ற போலிசாருக்கு தகவல் கொடுத்து டிடிஎஃப் வாசனை மடக்கிப் பிடித்து அபராத விதித்தனர்.
கோவையை சேர்ந்த யூடியூபர் டிடிஎப் வாசன். ட்வின் த்ரோட்லர்ஸ் என்ற பெயரில் யூடியூப் சேனலை நடத்தி வருகிறார். இவர் தன்னுடைய அதிவேக பைக்கில் படுபயங்கரமான வேகத்தில் மேல் சென்று, அதை வீடியோவாக தனது யூடியூப் சேனலில் பதிவிடுவது வழக்கம். டிடிஎஃப் வாசனுக்கு 2கே கிட்ஸ் மத்தியில் ஏராளமான ரசிகர்கள் உள்ளனர்.
டிடிஎஃப் வாசன் நெடுஞ்சாலைகளில் அனுமதிக்கப்பட்ட அளவை விட அதிவேகமாக பைக்குகளை இயக்குகிறார் என ஏற்கனவே பல்வேறு புகார்கள் உள்ளன. போக்குவரத்து விதிகளில் புதிய சட்ட திருத்தங்களை கொண்டு வந்து அபராத தொகையை பலமடங்காக அதிகரித்து பல ஆயிரம் அபராதம் விதிக்கப்பட்டு வந்தாலும் அதில் இருந்தெல்லாம் எஸ்கேப் ஆகி, அதிவேக பயணம் மேற்கொண்டு வீடியோ பதிவிடுவதை வழக்கமாகவே வைத்துள்ளார் வாசன்.
டிடிஎஃப் வாசன், அனுமதியின்றி கூட்டம் சேர்த்தது, ஹெல்மெட் போடாமல் வண்டி ஓட்டியது, அதிவேக பயணம் என ஏற்கனவே பல்வேறு சர்ச்சைகளில் சிக்கியுள்ள நிலையில் தற்போது மீண்டும் ஒரு சர்ச்சையில் சிக்கியுள்ளார். அதன்படி, உதகையில் பிரபல யூடியூபர் டிடிஎஃப் வாசனுக்கு ஆயிரம் ரூபாய் அபராத விதித்து புதுமந்து காவல்துறையினர் நடவடிக்கை எடுத்துள்ளனர்.
நீலகிரி மாவட்டம் ஊட்டி மலைப்பாதையில் குறிப்பிட்ட அளவை விட அதிவேகமாக தனது பைக்கில் சென்றுள்ளார் டிடிஎஃப் வாசன். அப்போது அங்கு பணியில் இருந்த போக்குவரத்துக் காவலர்கள் அவரை நிறுத்த முற்பட்டுள்ளனர். அப்போது நிற்காமல் சென்றுள்ளார் வாசன்.
இதையடுத்து அவர்கள் ரோந்து பணியில் இருந்த புதுமந்து காவல் துறையினருக்கு இருசக்கர வாகனம் ஒன்று வேகமாக வருவதாக தகவல் தெரிவித்துள்ளனர். இதையடுத்து டிடிஎப் வாசனை மடக்கிப் பிடித்த புதுமந்து போலீசார் அதிவேகமாகவும் அஜாக்கிரதையாகவும் வாகனத்தை இயக்கியதாக வழக்கு பதிவு செய்து ஆயிரம் ரூபாய் அபராதம் விதித்து எச்சரித்து அனுப்பி வைத்துள்ளனர்.
Click it and Unblock the Notifications
Sign in with Google