ஐடி பணிக்கு குட்பை! லட்ச ரூபாய் ஊதியத்தை விட்டுவிட்டு கவுன்சிலருக்கு போட்டியிடும் இளம் பொறியாளர்!
நீலகிரி: நீலகிரி மாவட்டம் குன்னூரில் ஒர்க் பிரம் ஹோம் மூலம் ஐடி நிறுவனத்தில் பணியாற்றி வந்த இளைஞர் ஒருவர் பணியை ராஜினாமா செய்துவிட்டு கவுன்சிலர் பதவிக்கு போட்டியிடுகிறார்.
பெங்களூரில் இயங்கி வரும் பிரபல ஐடி நிறுவனத்தில் மாதம் லட்ச ரூபாய் ஊதியத்தில் பணியாற்றி வந்த அவருக்கு, திடீரென அரசியல் ஆசை துளிர் விட்டிருக்கிறது.
இதையடுத்து முழு நேர அரசியலில் குதித்ததோடு தற்போது அதிமுக சார்பில் குன்னூர் 7-வது வார்டில் கவுன்சிலர் பதவிக்கு போட்டியிடுகிறார் அந்த இளைஞர்.
நகர்ப்புற உள்ளாட்சி
நகர்ப்புற உள்ளாட்சித் தேர்தலில் தமிழகம் இதுவரை கண்டிராத வகையில் பல புதிய முகங்களுக்கு திமுகவும் அதிமுகவும் தேர்தலில் போட்டியிட வாய்ப்பு வழங்கியுள்ளன. 22 வயது முதல் 25 வயதிற்குள் நூற்றுக்கணக்கான வேட்பாளர்கள் இந்த முறை அரசியல் கட்சிகள் சார்பிலும் சுயேச்சையாகவும் களமிறங்கியுள்ளனர். அந்த வகையில் நீலகிரி மாவட்டம் குன்னூரில் ஐடி பணியை துறந்துவிட்டு அதிமுக சார்பில் வார்டு கவுன்சிலர் பதவிக்கு போட்டியிடுகிறார் மென் பொறியாளர் விக்னேஷ்வரன்.
பணி ராஜினாமா
குன்னூர் நகராட்சியில் மொத்தம் 30 வார்டுகள் உள்ள நிலையில் அதில் 7-வது வார்டில் போட்டியிடுகிறார் விக்னேஷ்வரன். இவரது தந்தை அதிமுகவில் இருந்தாலும் இதுவரை எந்தவொரு முக்கியப் பதவியிலும் அமர்ந்ததில்லை. இந்நிலையில் ஒயிட் காலர் பணியான ஐடி பணியை ராஜினாமா செய்துவிட்டு அரசியல் என்ட்ரி கொடுத்து பலப்பரீட்சையில் இறங்கியிருக்கிறார் விக்னேஷ்வரன்.
பல இடங்கள்
குன்னூரை போலவே தமிழகத்தின் பல இடங்களில் இளைஞர்களையும், இளம்பெண்களையும் நகர்ப்புற உள்ளாட்சித் தேர்தலில் களமிறக்கியிருக்கிறது அதிமுக. தஞ்சை மாவட்ட கும்பகோனத்திலும் 22 வயது இளம் பட்டதாரி பெண் ஒருவர் அதிமுக சார்பில் கவுன்சிலர் பதவிக்கு போட்டியிடுகிறார். வெற்றிபெற்றாலும் கூட ஆளுங்கட்சிக்கு செல்லாத வகையில் நகர்மன்றம் மற்றும் மாநகராட்சிகளில் இவர்கள் போன்ற நபர்கள் தான் சிறப்பாக செயல்படுவார்கள் என்பது அதிமுக தலைமையின் கணிப்பாகும்.
கடும் போட்டி
குன்னூர் நகராட்சியை பொறுத்தவரை தமிழகத்தின் முக்கிய நகராட்சியாக கருதப்படுகிறது. தமிழகம் மட்டுமின்றி வெளிமாநிலங்கள் மற்றும் வெளிநாட்டவர்களும் வந்து செல்லக் கூடிய சுற்றுலா தலமாக குன்னூர் நகராட்சி திகழ்கிறது. இதனால் இந்த நகராட்சியை கைப்பற்ற திமுக, அதிமுக இடையே கடும் போட்டி உருவாகியுள்ளது குறிப்பிடத்தக்கது.
Click it and Unblock the Notifications
Sign in with Google