2011ல் தமிழ்நாட்டில் செய்த சொதப்பலை பீகாரில் ரிப்பீட் செய்த காங்கிரஸ்.. அனுபவிக்கும் தேஜஸ்வி யாதவ்!
பாட்னா: பீகார் சட்டசபைத் தேர்தலில் காங்கிரஸ் கட்சி 61 தொகுதிகளில் போட்டியிட்டு வெறும் 7 தொகுதிகளில் மட்டும் முன்னிலை வகிப்பது இந்தியா கூட்டணி ஆதரவாளர்கள் மத்தியிலும் அதிருப்தியை ஏற்படுத்தியுள்ளது. இது கிட்டத்தட்ட 2011ல் தமிழ்நாட்டில் 63 தொகுதிகளில் போட்டியிட்டு 7 தொகுதிகளில் மட்டுமே காங்கிரஸ் கட்சிக்கு வென்றதற்கு சமமாக உள்ளது. இதனால் தமிழ்நாட்டிலும் காங்கிரஸ் கட்சியை பலரும் விமர்சிக்க தொடங்கியுள்ளனர்.
பீகார் சட்டசபைத் தேர்தலில் பதிவான வாக்குகளை எண்ணும் பணிகள் விறுவிறுப்பாக நடந்து வருகிறது. என்டிஏ கூட்டணி 190 தொகுதிகளில் முன்னிலை பெற்றுள்ள நிலையில், மகாகட்பந்தன் கூட்டணி 49 தொகுதிகளில் மட்டுமே முன்னிலையில் உள்ளது. என்டிஏ கூட்டணி vs மகாகட்பந்தன் கூட்டணி என்று இருந்த போட்டி, தற்போது ஜேடியூ - பாஜக என்று மாறி இருக்கிறது.
இதில் மகாகட்பந்தன் கூட்டணி தரப்பில் ஆர்ஜேடி 35 தொகுதிகளிலும், காங்கிரஸ் கட்சி 7 தொகுதிகளிலும் முன்னிலையில் உள்ளன. இந்த தேர்தலில் காங்கிரஸ் கட்சி 61 தொகுதிகளில் போட்டியிட்ட நிலையில், வெறும் 7 தொகுதிகளில் மட்டும் முன்னிலையில் இருப்பது இந்தியா கூட்டணி ஆதரவாளர்களிடையே அதிருப்தியை ஏற்படுத்தி இருக்கிறது.
காங்கிரஸ் கட்சியின் ஸ்ட்ரைக் ரேட் மிகவும் குறைவான அளவில் இருப்பதாக அரசியல் விமர்சகர்கள் கருத்து தெரிவித்துள்ளார். காங்கிரஸ் கட்சியின் இந்த செயல்பாடுகள், 2011 தமிழக சட்டசபைத் தேர்தலை பலருக்கும் நினைவுப்படுத்தி இருக்கிறது. ஏனென்றால் 2011 சட்டசபைத் தேர்தலில் திமுக கூட்டணியில் 63 தொகுதிகளில் காங்கிரஸ் கட்சி போட்டியிட்டது.
அப்போது காங்கிரஸ் கட்சி வெறும் 7 தொகுதிகளில் மட்டுமே வென்றது. இதனால் திமுக கூட்டணியால் எதிர்க்கட்சி அந்தஸ்தை கூட பெற முடியவில்லை. இதற்கு தமிழ்நாட்டில் காங்கிரஸ் கட்சிக்கு அடிப்படை கட்டமைப்பு சிதைந்து கொண்டே வந்தது காரணமாக பார்க்கப்பட்டது. தற்போது பீகாரிலும் இப்படியான நிலையில் தான் காங்கிரஸ் கட்சி இருக்கிறது.
ஏற்கனவே மதம் மற்றும் சாதி ரீதியிலான அரசியலை பாஜக மற்றும் ஜேடியூ கட்சிகள் முன்னெடுத்த நிலையில், இந்தியா கூட்டணி தலைவர்கள் முன்னேற்றம், வேலைவாய்ப்பு என்ற திட்டத்தை கையில் எடுத்தனர். அதேபோல் பீகாரில் காங்கிரஸ் கட்சிக்கு போதுமான பூத் கமிட்டி உறுப்பினர்களே இல்லை என்றும் விவரம் அறிந்த சிலர் விமர்சிக்க தொடங்கியுள்ளனர்.
Click it and Unblock the Notifications
Sign in with Google