17,000 FT உயரத்தில்.. விமானத்தை தாக்கிய 1 பில்லியன் வோல்ட் மின்னல்.. நூலிழையில் தப்பிய 110 பேர்
பாட்னா: பீகார் மாநில தலைநகர் பாட்னாவில் இருந்து உத்தரப் பிரதேச தலைநகர் லக்னோவை நோக்கிச் சென்ற இண்டிகோ ஏர்லைன்ஸ் விமானம், வானில் பறந்துகொண்டிருந்தபோது யாரும் எதிர்பாராத ஒரு கடுமையான வானிலை மாற்றத்தைச் சந்தித்தது. இந்த விமானத்தில் 104 பயணிகள் மற்றும் 6 விமானப் பணிக்குழுவினர் என மொத்தம் 110 பேர் பயணித்தனர்.
விமானம் தரை இறங்குவதற்காக லக்னோவை நெருங்கி, சுமார் 17,000 அடி உயரத்தில் பறந்து கொண்டிருந்தபோது, கடுமையான இடி-மின்னலுடன் கூடிய புயல் மேகங்களுக்குள் நுழைந்தது. அந்த நேரத்தில், சுமார் 100 கோடி வோல்ட் அளவுக்குக் கொடூர ஆற்றல் கொண்ட ஒரு ராட்சத மின்னல், விமானத்தின் முன்பகுதியை நேருக்கு நேராகத் தாக்கியது. மின்னலின் அதிபயங்கர வேகமும் வெப்பமும் தாக்கியதில், விமானத்தின் மூக்கு போன்ற முன்பகுதி பலத்த சேதமடைந்து சுக்குநூறாக நசுங்கியது.
விமானத்தின் முன்பகுதி நொறுங்கிய போதும், உள்ளே இருந்த பயணிகளுக்கு எந்தவித காயமும் ஏற்படவில்லை. லக்னோவில் உள்ள சவுத்ரி சரண் சிங் சர்வதேச விமான நிலையத்தில் விமானி எந்தவித பதற்றமும் இன்றி விமானத்தை மிகவும் பாதுகாப்பாகவும், திட்டமிட்ட நேரத்திற்கு முன்பாகவும் தரை இறக்கினார்.
விமானத்தின் மூக்கு பகுதி மட்டும் ஏன் நொறுங்கியது?
விமானத்தை பார்த்த பலருக்கும் எழுந்த மிகப்பெரிய கேள்வி: "விமானத்தின் மொத்த உடற்பகுதியும் நன்றாக இருக்கும்போது, முன்பகுதி மட்டும் ஏன் இப்படி நொறுங்கியது?" என்பதுதான்.
தொழில்நுட்ப ரீதியாக விமானத்தின் முன்பகுதிக்கு 'ரேடோம்' என்று பெயர். இதுதான் வானில் பறக்கும் விமானங்களின் மிக முக்கியமான உணர்வு பகுதி. விமானத்தின் இந்த மூக்குப் பகுதிக்குள் தான் 'வெதர் ரேடார்' எனப்படும் அதிநவீன கருவி பொருத்தப்பட்டிருக்கும். வானில் எதிரே புயல் மேகங்கள் இருக்கிறதா, மழை பெய்கிறதா என்பதை முன்கூட்டியே பார்த்து விமானிகளுக்கு எச்சரிக்கை செய்வது இந்த ரேடார்தான்.
இந்த ரேடார் சரியாக வேலை செய்ய வேண்டும் என்றால், அது அனுப்பும் அலைகள் எந்தத் தடையும் இன்றி வெளியே சென்று திரும்ப வேண்டும். எனவே, விமானத்தின் மற்ற பகுதிகளைப் போல இந்த மூக்குப் பகுதியை உலோகத்தாலோ அல்லது செம்பு வலைகளாலோ செய்ய முடியாது. உலோகத்தால் செய்தால் ரேடார் சிக்னல்கள் முற்றிலும் முடங்கிவிடும்; விமானிகளுக்கு எதிரே உள்ள மேகங்கள் தெரியாமல் போய்விடும்.
இதன் காரணமாகவே, மூக்குப் பகுதி மட்டும் பிரத்யேக ஃபைபர் கிளாஸ் போன்ற கடத்தாத கலவைப் பொருட்களால் செய்யப்படுகிறது. இதன் விளைவாக, மின்னல் தாக்கும்போது ஏற்படும் பயங்கர வெப்பத்தையும் அழுத்தத்தையும் அதனால் முழுமையாகத் தாங்க முடிவதில்லை. மின்சாரம் விமானத்தின் மற்ற பகுதிக்கு மாறும் முன், ஏற்படும் அந்தப் பயங்கர வெப்ப அதிர்ச்சியால் ரேடோம் பகுதி சுக்குநூறாக நசுங்கி விடுகிறது.
100 கோடி வோல்ட் மின்சாரம் தாக்கியும் பயணிகள் தப்பியது எப்படி?
கோடிக்கணக்கான வோல்ட் மின்சாரம் தாக்கும்போது ஒரு மரம் அல்லது கட்டடமே எரிந்து சாம்பலாகிவிடும். ஆனால், நடுவானில் பறந்த விமானத்தில் இருந்த பயணிகளுக்கு ஒரு சிறிய மின் அதிர்ச்சி கூட ஏற்படாதது எப்படி?
இதற்குப் பின்னால் இருப்பது உலகப் புகழ்பெற்ற விஞ்ஞானி மைக்கேல் ஃபாரடே கண்டுபிடித்த 'ஃபாரடே கூண்டு' என்ற அறிவியல் கோட்பாடுதான்.
மின்சாரத்தைக் கடத்தும் கவசம்: நவீன பயணிகள் விமானங்கள் அலுமினிய உலோகக் கலவைகள் மற்றும் செம்பு வலைக் கம்பிகளால் வடிவமைக்கப்படுகின்றன. இது விமானத்தைச் சுற்றி ஒரு தொடர்ச்சியான பாதுகாப்பு கூண்டு போல செயல்படுகிறது. மின்னல் விமானத்தைத் தாக்கும்போது, அந்த ராட்சத மின்சாரம் விமானத்தின் உட்பகுதிக்குள் செல்லாது. மாறாக, விமானத்தின் வெளிப்புற உலோகப் பரப்பின் வழியாக மட்டுமே பாய்ந்து சென்று, இறக்கைகளின் முனைகளில் உள்ள 'ஸ்டேடிக் டிஸ்சார்ஜர்' என்ற சிறிய கம்பிகள் வழியாக மீண்டும் வானிலேயே பாதுகாப்பாக வெளியேறிவிடும்.
மின்சாரம் முற்றிலும் வெளிப்புற தோல் பகுதியிலேயே பயணித்து வெளியேறி விடுவதால், விமானத்தின் உள்ளே இருக்கும் பயணிகளுக்கோ, நவீன கணினி கருவிகளுக்கோ, அல்லது இறக்கைகளில் நிரப்பப்பட்டுள்ள பல ஆயிரம் லிட்டர் எரிபொருளுக்கோ எந்தவித ஆபத்தும் ஏற்படுவதில்லை. இந்த எளிய அறிவியல் விதியும், தலைசிறந்த விமானப் பொறியியல் கட்டுமானமும்தான் அந்த 110 பேரின் உயிரையும் நடுவானில் காப்பாற்றியுள்ளது.
தரை இறங்கியதும் நடந்த அடுத்தகட்ட நடவடிக்கைகள்
விமானம் லக்னோ விமான நிலையத்தில் வெற்றிகரமாகத் தரை இறங்கிய பிறகே, தரைக்கட்டுப்பாட்டு ஊழியர்கள் விமானத்தின் மூக்குப் பகுதி சுக்குநூறாக நசுங்கி இருப்பதை நேரில் பார்த்தனர். இதனையடுத்து, விமானப் பாதுகாப்பு விதிகளின்படி அந்த விமானம் உடனே தற்காலிகமாகப் பறக்கத் தடை விதிக்கப்பட்டு நிறுத்தப்பட்டது.
விமானத்தில் இருந்த 104 பயணிகளுக்கும் எந்தப் பாதிப்பும் இல்லை என்பது உறுதி செய்யப்பட்ட பின்னர், அவர்கள் லக்னோவில் இருந்து ஆமதாபாத் செல்வதற்காக உடனடியாக மாற்று விமானம் ஏற்பாடு செய்யப்பட்டு, மாலை 6:22 மணிக்கு அனுப்பி வைக்கப்பட்டனர்.
தற்போது சேதமடைந்த விமானத்தின் உட்புற மின்சார அமைப்புகள், வயரிங் மற்றும் சென்சார்கள் குறித்து பொறியாளர்கள் முழுமையான ஆய்வு மேற்கொண்டு வருகின்றனர். இந்திய சிவில் விமானப் போக்குவரத்து இயக்குநரகம் (DGCA) இந்தச் சம்பவம் குறித்து விரிவான விசாரணை நடத்தி வருகிறது. தேவையான புதிய பாகங்கள் பொருத்தப்பட்டு, அனைத்துப் பாதுகாப்பு சோதனைகளும் முடிந்து, டிஜிசிஏ-வின் முறையான அனுமதி கிடைத்த பிறகே இந்த விமானம் மீண்டும் பயணிகள் சேவைக்கு அனுமதிக்கப்படும்.
Click it and Unblock the Notifications
Sign in with Google
