“எங்களை உள்ளே விடுங்க”.. புதுச்சேரி எல்லையில் போலீசாருடன் பாஸ் இல்லாத தவெக தொண்டர்கள் வாக்குவாதம்!

Updated: Tuesday, December 9, 2025, 8:59 [IST]

Subscribe to Oneindia Tamil

புதுச்சேரி: தவெக தலைவர் விஜய் இன்று புதுச்சேரியில் நடத்தும் பிரச்சாரக் கூட்டத்திற்கு தமிழ்நாட்டைச் சேர்ந்தவர்களுக்கு அனுமதி கிடையாது. எல்லையில் தீவிர கண்காணிப்பில் புதுச்சேரி போலீசார் ஈடுபட்டு வருகின்றனர். இந்நிலையில், தங்களை அனுமதிக்க வேண்டும் என எல்லையில் போலீசார் உடன் தவெகவினர் வாக்குவாதம் செய்ததால் பரபரப்பு ஏற்பட்டுள்ளது.

புதுச்சேரியில் விஜய் பங்கேற்கும் தவெக பொதுக்கூட்டம் இன்று காலை 10.30 மணிக்கு தொடங்கும் நிலையில், தவெக தொண்டர்கள் இன்று அதிகாலை முதலே குவியத் தொடங்கினர். பொதுக்கூட்டம் நடைபெறும் உப்பளம் மைதானம் பகுதிக்குள் செல்ல தொண்டர்களுக்கு அனுமதி அளிக்கப்பட்டுள்ளது.

2 மாதங்களுக்கு பிறகு விஜய் பொதுக்கூட்டத்தில் பங்கேற்கிறார். இந்த கூட்டம் அண்டை மாநிலமான புதுச்சேரியில் நடைபெறுகிறது. புதுச்சேரியில் ரோடு ஷோ சென்று மக்களை சந்திப்பதாக முதலில் திட்டமிடப்பட்டது. ஆனால் பாதுகாப்பு காரணங்களை சுட்டிக்காட்டி புதுச்சேரி போலீசார் ரோடு ஷோவுக்கு அனுமதி அளிக்கவில்லை. ரோடு ஷோவுக்கு பதிலாக பொதுக்கூட்டத்தை நடத்தி கொள்ளுமாறு த.வெ.க நிர்வாகிகளிடம் தெரிவிக்கப்பட்டது.

இதைத் தொடர்ந்து இன்று தவெக பொதுக்கூட்டம் புதுச்சேரி உப்பளம் மைதானத்தில் நடைபெறுகிறது. புதுச்சேரி மக்கள் சந்திப்பு நிகழ்ச்சிக்கு புதுச்சேரி மாநிலத்தைச் சேர்ந்த, கியூ ஆர் குறியீட்டுடன் கூடிய நுழைவுச் சீட்டு வைத்திருக்கும் 5 ஆயிரம் பேர் மட்டுமே அனுமதிக்கப்படுகின்றனர்.

புதுச்சேரியை ஒட்டியுள்ள தமிழக மாவட்டங்கள் உள்பட தமிழகத்தை சேர்ந்த யாருக்கும் கண்டிப்பாக அனுமதி கிடையாது. புதுச்சேரி மக்கள் சந்திப்பு நிகழ்ச்சியின் போது, தொண்டர்களும், பொதுமக்களும் பின்வரும் வழிகாட்டு நெறிமுறைகளை கட்டாயம் கடைப்பிடிக்க வேண்டும் என தவெக சார்பில் அறிவுறுத்தப்பட்டுள்ளது.

இந்நிலையில், புதுச்சேரி எல்லையில் தீவிர கண்காணிப்பில் புதுச்சேரி போலீசார் ஈடுபட்டு வருகின்றனர். இந்நிலையில், தங்களை அனுமதிக்க வேண்டும் என எல்லையில் போலீசார் உடன் தவெகவினர் வாக்குவாதம் செய்ததால் பரபரப்பு ஏற்பட்டுள்ளது.

போலீஸ் தீவிர சோதனை நடத்தி அவர்கள் புதுச்சேரியைச் சேர்ந்தவர்கள் இல்லை என்பதாலும், அவர்களிடம் தவெக பொதுக்கூட்டத்துக்கான பாஸ் இல்லாததாலும் அனுமதி மறுத்துள்ளனர். இதனால் அவர்கள் வாக்குவாதத்தில் ஈடுபட்டுள்ளனர். இதனால் அப்பகுதியில் சலசலப்பு நிலவி வருகிறது.