புதுச்சேரி சட்டசபைத் தேர்தலில் நாராயணசாமி போட்டியில்லை - வேட்பாளர்கள் பட்டியலில் பெயர் இல்லை

புதுச்சேரி சட்டசபைத் தேர்தலில் முன்னாள் முதல்வர் நாராயணசாமி போட்டியிட மாட்டார் என காங்கிரஸ் மேலிட பொறுப்பாளர் தினேஷ் குண்டுராவ் தெரிவித்துள்ளார்.

Updated: Wednesday, March 17, 2021, 20:35 [IST]

Subscribe to Oneindia Tamil

புதுச்சேரி: புதுச்சேரி சட்டசபைத் தேர்தலில் முன்னாள் முதல்வர் நாராயணசாமி போட்டியிட மாட்டார் என காங்கிரஸ் மேலிட பொறுப்பாளர் தினேஷ் குண்டுராவ் தெரிவித்துள்ளார். மாநிலம் முழுவதும் வேட்பாளர்களை ஆதரித்து தேர்தல் பிரச்சாரத்தில் ஈடுபடுவார் என்றும் அவர் கூறியுள்ளார்.

Recommended Video

புதுச்சேரி: அப்பாடா… வெளியானது காங்கிரஸ் வேட்பாளர் பட்டியல்... நாராயணசாமிக்கு சீட் ‘நஹி’ !

கடந்த 2016 ஆம் நடைபெற்ற சட்டசபைத் தேர்தலில் போட்டியிடாத நாராயணசாமியை புதுச்சேரி முதல்வராக தேர்வு செய்தது அகில இந்திய காங்கிரஸ் தலைமை.

அதன் பின்னர் நடைபெற்ற இடைத்தேர்தலில் நாராயணசாமி நெல்லித்தோப்பு தொகுதியில் போட்டியிட்டு வெற்றி பெற்றதன் மூலம் முதல்வராக நீடித்தார். துணைநிலை ஆளுநராக இருந்த கிரண்பேடிக்கும் நாராயணசாமிக்கும் இடையே அடிக்கடி சண்டை சச்சரவு ஏற்பட்டது. துணைநிலை ஆளுநரை சமாளிக்கவே நாராயணசாமிக்கு நேரம் சரியாக இருந்தது.

நாராயணசாமி

ஐந்தாண்டுகள் ஆட்சி முடியும் முன்பே முதல்வர் நாராயணசாமியின் மீதான அதிருப்தியில் காங்கிரஸ் எம்எல்ஏக்கள் பதவியை ராஜினாமா செய்தனர். இதனையடுத்து நாராயணசாமியின் ஆட்சிக்கு பெரும்பான்மை இல்லாமல் போனது.

குடியரசுத்தலைவர் ஆட்சி

சட்டசபையில் நம்பிக்கை வாக்கெடுப்பு நடத்த உத்தரவிட்டார் துணைநிலை ஆளுநர் தமிழிசை சவுந்தராராஜன். சட்டசபையில் பேசிய நாராயணசாமி நம்பிக்கை வாக்கு கோரினார். வாக்கெடுப்பு நடைபெறவில்லை என்றாலும் நாராயணசாமியின் ஆட்சி பெரும்பான்மை இழந்ததாக சபாநாயகர் சிவக்கொழுந்து அறிவித்தார். இதனையடுத்து நாராயணசாமியின் ஆட்சி கவிழ்ந்தது. புதுச்சேரியில் குடியரசுத்தலைவர் ஆட்சி அமல்படுத்தப்பட்டது.

15 தொகுதிகளில் காங்கிரஸ் போட்டி

புதுச்சேரியில் மொத்தம் 30 சட்டப்பேரவைத் தொகுதிகள் உள்ளன. அதில் காங்கிரஸ் 15, திமுக 13, இந்திய கம்யூனிஸ்ட் 1 மற்றும் விடுதலை சிறுத்தைகள் கட்சி 1 என காங்கிரஸ் கூட்டணி அமைத்து இந்த தேர்தலில் போட்டியிடுகிறது.

நாராயணசாமி பெயர் இல்லை

காங்கிரஸ் கட்சியின் வேட்பாளர்கள் பட்டியலை கட்சித்தலைமை அறிவித்தது. அதில் நாராயணசாமி பெயர் இடம்பெறவில்லை.
ஏனாம் தொகுதிக்கு வேட்பாளர் அறிவிக்கப்படாத நிலையில் அங்கு முன்னாள் முதல்வர் நாராயணசாமிக்கு வாய்ப்பு அளிக்கப்படுமா என்ற எதிர்பார்ப்பு எழுந்தது.

நாராயணசாமி போட்டியில்லை

இந்நிலையில், புதுச்சேரி சட்டசபைத் தேர்தலில் முன்னாள் முதல்வர் நாராயணசாமி போட்டியிட மாட்டார் என காங்கிரஸ் மேலிட பொறுப்பாளர் தினேஷ் குண்டுராவ் தெரிவித்துள்ளார். சட்டசபைத் தேர்தலில் போட்டியிடும் வேட்பாளர்களுக்கு ஆதரவாக அவர் பிரச்சாரத்தில் ஈடுபடுவார் எனவும் குண்டுராவ் தெரிவித்துள்ளார்.