கலகலப்பான லொள் லொள்.. விதம் விதமான பவ் பவ்.. புதுச்சேரியைக் கலக்கிய நாய்க் கண்காட்சி!

புதுச்சேரி: புதுச்சேரியில் உள்ள நாய்கள் கிளப் சார்பில் நடந்த கண்காட்சியில் விதம் விதமான வீட்டு நாய்கள் கலந்து கொண்டு கலக்கின.

புதுச்சேரி கெனான் கிளப் சார்பில் ஆண்டு தோறும் வீடு மற்றும் கிளப்களில் வளர்க்கப்படும் நாய்களுக்கான போட்டிகள் நடத்தப்படுவது வழக்கம். இந்நிலையில் 5 வது ஆண்டாக மாநில அளவில் நாய்களுக்கான போட்டி தனியார் பள்ளி விளையாட்டு மைதானத்தில் நடைபெற்றது.

இதில் ஜூனியர், இண்டர் மீடியேட், பிரடின், ஓபன் உள்ளிட்ட 6 பிரிவுகளில் போட்டிகள் நடத்தப்பட்டன. டெல்லி, கேரளா, கர்நாடக, மஹாராஷ்டிரா, தமிழ்நாடு உள்ளிட்ட பல்வேறு மாநிலங்களில் இருந்து செல்ல பிராணியாக வளர்க்கப்பட்ட நாய்கள் பங்கேற்றன.

இந்த போட்டியில் ஜெர்மன் ஷெப்பர்ட், பாக்சர், டாபர்மென், ராட்வீலர், பொமரேனியன், பக், ராஜபாளையம் போன்ற பல்வேறு வகையை சேர்ந்த 250க்கும் மேற்பட்ட நாய்கள் கலந்துகொண்டன.

உடல் கட்டமைப்பு, ஆரோக்கியம், கீழ்படிதல் போன்றவற்றில் அதிக மதிப்பெண் எடுத்த நாய்களுக்கு பரிசுகள் வழங்கப்பட்டன. மேலும் நாய்களுக்கான பேக்ஷன் ஷோவும் நடைபெற்றது. இதில் நாய்களுக்கு வண்ண வண்ண ஆடைகளை உடைத்தி நாயின் உரிமையாளர்கள் அசத்தினர்.

English summary

Puducherry Kennel Club conducted a dog show and hundreds of various type of dogs participated the show.