நாடாளுமன்றத் தேர்தலில் புதுச்சேரி வைத்தியலிங்கம் போட்டி.. சபாநாயகர் பதவியை உதறினார்!

புதுச்சேரி: புதுச்சேரி நாடாளுமன்றத் தொகுதியில் காங்கிரஸ் வேட்பாளராக சபாநாயகர் வைத்தியலிங்கம் போட்டியிடுகிறார். இதையடுத்து தனது சபாநாயகர் பதவியை அவர் ராஜினாமா செய்து விட்டார்.

புதுச்சேரி மாநிலத்தில் ஒரே ஒரு மக்களவை தொகுதி உள்ளது. இத்தேர்தலில் காங்கிரஸ் மற்றும் என்.ஆர்.காங்கிரஸிக்கும் இடையேதான் நேரடிப்போட்டி.

புதுச்சேரி மக்களவை தொகுதியில் காங்கிரஸ் கட்சி சார்பில் சபாநாயகர் வைத்தியலிங்கம் போட்டியிட உள்ளதாக அக்கட்சி அதிகாரப்பூர்வமாக அறிவித்துள்ளது. இதையடுத்து வைத்தியலிங்கம் தனது சபாநாயகர் பதவியை ராஜினாமா செய்துள்ளார். இதற்கான கடிதத்தை துணை சபாநாயகர் சிவகொழுந்துவிடம் அவர் கொடுத்துள்ளார்.

முதல் முறையாக

இன்று மதியம் 12.45 மணிக்கு மாவட்ட ஆட்சியரும், தேர்தல் நடத்தும் அதிகாரியுமான அருணிடம் தனது வேட்பு மனுவை வைத்தியலிங்கம் தாக்கல் செய்கிறார். மக்களவை தேர்தலில் போட்டியிடும் வைத்தியலிங்கம் இரண்டு முறை புதுச்சேரி மாநிலத்தின் முதலமைச்சராகவும், 7 முறை சட்டமன்ற உறுப்பினராகவும், அமைச்சராகவும், சட்டமன்ற எதிர்கட்சி தலைவராகவும் பதவி வகித்துள்ளார். நாடாளுமன்றத் தேர்தலில் முதல் முறையாக போட்டியிடுகிறார்.

விவசாயி

புதுச்சேரியை அடுத்த நெட்டப்பாக்கம் கிராமத்தில் விவசாய குடும்பத்தில் அக்டோபர் 5, 1950ல் பிறந்தவர் வைத்திலிங்கம். புதுச்சேரியின் இரண்டாவது முதலமைச்சராக பொறுப்பேற்ற வெங்கடசுப்பா ரெட்டியாரின் மகனாவார். சென்னை லயோலாக் கல்லூரியில் பயின்று பின்னர் தமது குடும்ப விவசாயத்திற்கு திரும்பினார். 1969 ஆம் ஆண்டு புதுவை மருத்துவ சேவை இயக்குனராக இருந்த டா.சாம்பசிவத்தின் மகள் சசிகலாவை மணம் புரிந்தார். புதுவை மாநில நில வளர்ச்சி வங்கியின் தலைவராகப் பணியாற்றியுள்ளார்.

காங்கிரஸ் குடும்பம்

இவருக்கு ஒரு மகன் ஒரு மகள் உள்ளனர். காங்கிரஸ் பாரம்பரியத்தில் வந்த வைத்திலிங்கம், 1971 ல் இருந்து காங்கிரஸ் கட்சியில் தன்னை ஈடுபடுத்திக்கொண்டு வட்டார இளைஞர் காங்கிரஸ் தலைவர் உள்ளிட்ட பதவிகளை வகித்துள்ளார். மேலும் புதுச்சேரி மாநில கூட்டுறவு நிலவல வங்கித் தலைவர், புதுச்சேரி ஒழுங்கு முறை விற்பணை கூட தலைவர், மாநில விவசாயிகள் சங்க துணைத்தலைவர் உள்ளிட்ட பல்வேறு பொறுப்புகளை ஏற்று செயல்பட்டவர்.

2 முறை முதல்வர்

1980 ஆம் முதல் முதலில் நெட்டப்பாகம் தொகுதியில் போட்டியிட்டு தோல்விடைந்தவர், 1985ல் மீண்டும் நெட்டப்பாக்கம் தொகுதியில் போட்டியிட்டு வெற்றி பெற்ற வைத்திலிங்கம் அப்போதைய பாருக் தலைமையிலான காங்கிரஸ் அமைச்சரவையில் பொதுப்பணித்துறை அமைச்சராக பணியாற்றினார், தொடர்ந்து 1991 ஆம் ஆண்டு தேர்தலில் அதே தொகுதியில் போட்டியிட்டு வெற்றி பெற்று 1996 வரை புதுச்சேரி முதலமைச்சராக பதவி வகித்தார்.

ரங்கசாமி அமைச்சரவையில்

1996 ஆம் ஆண்டு தேர்தலிலும் நெட்டப்பாக்கம் தொகுதியிலிருந்து தேர்தெடுக்கப்பட்டு 2000 வரை சட்டமன்ற எதிர்கட்சி தலைவராக பணியாற்றினார். 2001 ஆம் ஆண்டு தேர்தலிலும் நெட்டபாக்கம் தொகுதியில் இருந்து தேர்வான வைத்திலிங்கம் 2006 ஆம் ஆண்டு மீண்டும் அதே தொகுதியிலிருந்து தேர்வு செய்யப்பட்டு ரங்கசாமி அமைச்சரவையில் தொழில் மற்றும் மின் துறை அமைச்சராக பணியாற்றினார். இதே அமைச்சரவையில் முதல்வராக இருந்த ரங்கசாமி நீக்கப்பட்டு 2008 ஆம் ஆண்டு மீண்டு முதலமைச்சராக 2011 வரை இரண்டரை ஆண்டுகள் பணியாற்றினார்.

வகிக்காத பதவியே இல்லை

5 முறை கிராமப்பகுதியான நெட்டப்பாக்கம் தொகுதியில் போட்டியிட்டு தொடர்ந்து வெற்றி பெற்று வந்த வைத்திலிங்கம், தொகுதி மறு சீரமைப்பு காரணமாக 2011ல் புதுச்சேரி நகரில் உள்ள காமராஜர் தொகுதியில் போட்டியிட்டு வெற்றிபெற்று சட்டமன்ற எதிர்கட்சித்தலைவராக பொருப்பு வகித்தார். 2016 மீண்டும் காமராஜர் தொகுதியில் இருந்து தேர்வு செய்யப்பட்ட வைத்திலிங்கம் சபாநாயகராக தொடர்ந்து பணியாற்றி வருகின்றார்.

English summary

Puducherry Speaker Vaithilingam is contesting in the lone lS seat in Congress ticket.