பாஜக அண்ணாமலையுடன் விவாதமா? அரசியலில் அவர் ஒரு சப் ஜூனியர்.. தொல் திருமாவளவன் கிண்டல்

Updated: Thursday, April 21, 2022, 0:32 [IST]

Subscribe to Oneindia Tamil

புதுச்சேரி: தமிழக பாஜக தலைவர் அண்ணாமலை அரசியலில் ஒரு சப் ஜூனியர் என விடுதலைச் சிறுத்தைகள் கட்சித் தலைவர் தொல் திருமாவளவன் தெரிவித்துள்ளார்.

புதுவை காரைக்காலை அடுத்த நிரவியில் இயங்கும் எண்ணெய் மற்றும் இயற்கை எரிவாயு கழகத்தில் பணிபுரியும் அதிகாரிகள், ஊழியர்கள் ஒன்றிணைந்து ஏழை, எளிய மக்களுக்கு நலத்திட்ட உதவிகளை வழங்கும் நிகழ்ச்சி நடைபெற்றது.

விடுதலைச் சிறுத்தைகள் கட்சியின் தலைவரும் சிதம்பரம் மக்களவைத் தொகுதி உறுப்பினருமான தொல் திருமாவளவன் சிறப்பு விருந்தினராக பங்கேற்றார்.

அம்பேத்கர், புத்தர் சிலைகள் மரியாதை

அப்போது அம்பேத்கர் , புத்தர் சிலைகளுக்கு மாலை அணிவித்து மரியாதை செலுத்தினார். அப்போது ரூ 52 லட்சம் மதிப்பீட்டில் கல்வி உதவித் தொகை, மாற்றுத்திறனாளிகளுக்கு உதவித் தொகை, மூன்று சக்கர வாகனம் உள்ளிட்ட பல்வேறு நலத்திட்ட உதவிகளை திருமாவளவன் வழங்கினார்.

விசிக தலைவர் தொல் திருமாவளவன்

இதைத் தொடர்ந்து செய்தியாளர்களிடம் விசிக தலைவர் தொல் திருமாவளவன் கூறுகையில், இயக்குநர் பாக்யராஜின் கருத்து அதிர்ச்சி அளிக்கிறது. அவர் எதையும் நிதானமாக பேசக் கூடியவர். சீர் தூக்கி பிரித்து பார்த்து பேசக் கூடியவர். அவரை யார் இப்படி பேச வைத்தார்கள் என தெரியவில்லை என்றார்.

அம்பேத்கர் வழியில் பிரதமர் மோடியா

அம்பேத்கர் வழியில் பிரதமர் மோடி செல்கிறார் என்பதை விவாதிக்க பாஜக தலைவர் அண்ணாமலை அழைப்பு விடுத்தது குறித்து திருமாவளவனிடம் செய்தியாளர்கள் கேள்வி எழுப்பினர். அப்போது அவர் விளையாட்டு போட்டிகளில் Category உள்ளது. அவை சப் ஜூனியர், ஜூனியர், சீனியர் ஆகும்.

அண்ணாமலை சப் ஜூனியர்

அரசியலில் அண்ணாமலை ஒரு சப் ஜூனியர். அவரோடு விவாதிக்க அவரை போல ஒரு சப் ஜூனியரை விடுதலைச் சிறுத்தைகள் கட்சியிலிருந்து அனுப்பி வைக்கிறேன் என திருமாவளவன் கிண்டலாக தெரிவித்தார். "அம்பேத்கர் செய்ததையும் பிரதமர் மோடி செய்ததையும் ஆதாரப்பூர்வமாக எடுத்து வைத்து விவாதிக்க தயார். அண்ணன் திருமாவளவனை அழைக்கிறேன். அவர் சொல்லும் இடத்திற்கு அவர் சொல்லும் நேரத்தில் விவாதிக்கலாம் என பாஜக அண்ணாமலை பேசியிருந்தார்.