ஓ.பன்னீர்செல்வம் டீமிலிருந்து ஜூட் விட்ட ''2 சாமிகள்''! ராமநாதபுரத்தில் அன்வர் ராஜா வீசிய தூண்டில்!
ராமநாதபுரம்: தண்ணீரில் கரையும் உப்பை போல் ஓ.பன்னீர்செல்வம் அணியை வேகமாக கரைக்கும் வேலையை எடப்பாடி பழனிசாமி தரப்பு கணக்கச்சிதமாக செய்யத் தொடங்கிவிட்டது.
அந்த வகையில் ஓ.பன்னீர்செல்வம் சார்ந்த சமுதாயத்தினர் அதிகம் வசிக்கக் கூடிய ராமநாதபுரம் மாவட்டத்திலேயே இரண்டு முக்கிய நிர்வாகிகளை தன் பக்கம் இழுத்து ஓ.பி.எஸ். முகாமிற்கு அதிர்ச்சி கொடுத்திருக்கிறார் எடப்பாடி பழனிசாமி. மற்ற மாவட்டங்களில் இது போல் நிகழ்ந்தால் கூட பரவாயில்லை, ராமநாதபுரம் மாவட்டத்தில் நடந்திருப்பது தான் ஓ.பன்னீர்செல்வத்துக்கு ஜீரணிக்க முடியாத விவகாரமாக தெரிகிறது.
ராமநாதபுரம் மாவட்ட அதிமுக துணைச் செயலாளராக இருந்தவர் அங்குசாமி. அதேபோல் ராமநாதபுரம் வடக்கு ஒன்றிய செயலாளராக இருந்தவர் கோட்டைச்சாமி. மேற்கண்ட இந்த இரண்டு சாமிகளும் ஓ.பன்னீர்செல்வம் பின்னால் அணிவகுத்து ராஜ்யசபா உறுப்பினர் தர்மரோடு சேர்ந்து ராமநாதபுரம் மாவட்டத்தில் அதிமுக நிர்வாகிகளை எதிர்த்து போட்டி அரசியல் செய்து வந்தனர். இந்நிலையில் இவர்கள் இருவரையும் எடப்பாடி பழனிசாமி பக்கம் கொண்டு அழைத்து வந்து கவனம் ஈர்த்திருக்கிறார் மாஜி எம்.பி. அன்வர் ராஜா.
இனியும் ஓ.பன்னீர்செல்வத்தை நம்பிச் சென்றால் உங்களுக்கு எதிர்காலம் இல்லை என்றும் அதிமுக என்றால் அது எடப்பாடி பழனிசாமி தான் எனவும் கூறி தூண்டில் வீசிய நிலையில், அவர்களும் எடப்பாடி பழனிசாமியை நேரில் சந்தித்து அவரது தலைமையை ஏற்றுக் கொண்டனர். அதிமுகவில் அன்வர் ராஜா இரண்டு ஆண்டுகளாக சஸ்பெண்ட் செய்யப்பட்டு டம்மியாக்கப்பட்டு வைக்கப்பட்டிருந்தார். அண்மையில் தான் அவருக்கு அமைப்புச் செயலாளர் பதவி கொடுக்கப்பட்டது.
இதனால் பதவி கிடைத்த உற்சாகத்தில் மீண்டும் ராமநாதபுரத்தில் ஆக்டிவ் பாலிடிக்ஸ் செய்ய ஆரம்பித்துவிட்டார் அன்வர் ராஜா. அங்குச்சாமி, கோட்டைச்சாமி வரிசையில் ராமநாதபுரம் மாவட்டத்தைச் சேர்ந்த இன்னும் பல முக்கிய விக்கெட்கள் தங்கள் அணியில் வீழ்த்தப்படலாம் என்பதால் ஓ.பன்னீர்செல்வம் தரப்பு ஆதரவாளர்களை தீவிரமாக நோட்டமிட ஆரம்பித்துள்ளது.
இதனிடையே வரும் நாடாளுமன்றத் தேர்தலுக்கு முன்னர் ராமநாதபுரம் மாவட்டத்திலிருந்து இன்னும் சில ஓ.பி.எஸ்.ஆதரவாளர்கள் மற்றும் அமமுக நிர்வாகிகள் எடப்பாடி பழனிசாமி பக்கம் தாவுவார்கள் என கண் சிமிட்டுகிறார்கள் லோக்கல் புள்ளிகள்.
Click it and Unblock the Notifications
Sign in with Google