சிங்கப்பூரில் திரையிடப்படும்.. சுதா கொங்கராவின் திரைப்படம்! கலாச்சார பாலமாக திகழும் சினிமா!

Updated: Thursday, January 22, 2026, 20:01 [IST]

Subscribe to Oneindia Tamil

சிங்கப்பூர்: சிங்கப்பூரில் இந்திய திரைப்பட விழா நடைபெற இருக்கிறது. இதனை சிங்கப்பூருக்கான இந்திய தூதர் டாக்டர் ஷில்பக் அம்புலே தொடங்கி வைத்துள்ளார். இது இரு நாடுகளுக்கு இடையேயான கலாச்சார உறவை பலப்படுத்தும் என்று சொல்லப்படுகிறது. இந்த விழாவில், இயக்குநர் சுதா கொங்கராவின் திரைப்படமும் திரையிடப்பட உள்ளது.

நிகழ்ச்சியை தொடக்கி வைத்த டாக்டர் ஷில்பக் அம்புலே, இந்தியா, சிங்கப்பூர் இடையிலான மக்கள் உறவுகளை வலுப்படுத்தும் முக்கியத் தளமாக இவ்விழா திகழ்கிறது என கூறியுள்ளார். ஜனவரி 23 முதல் மார்ச் 8, வரை இத்திருவிழாவில் 21 திரைப்படங்கள் திரையிடப்படவுள்ளன.

"இந்தியத் திரைப்பட விழா, மக்கள் உறவுகளை வலுப்படுத்தும் முக்கிய நிகழ்வாகும். சிங்கப்பூர் அரசு, திரைப்பட சங்கம், கோல்டன் வில்லேஜ் சினிமா மற்றும் பங்காளர்களுக்கு நான் நன்றி தெரிவித்துக்கொள்கிறேன். கடந்த ஆண்டு வெற்றியைத் தொடர்ந்து, இவ்வாண்டு விழா விரிவாக்கப்பட்ட திட்டமிடலுடன் இந்திய சினிமாவின் பன்முகத்தன்மை, படைப்பாற்றல், ஈர்ப்பைக் கொண்டாடுகிறது.

கடந்த ஆண்டின் அமோக வரவேற்பு, கலாச்சாரப் பரிமாற்றம் மற்றும் இரு நாடுகளின் மக்கள் உறவுக்கு இந்த விழா ஒரு அர்த்தமுள்ள தளம் என்பதை உறுதிப்படுத்தியது" என்று கூறியுள்ளார்.

சிங்கப்பூர் திரைப்பட சங்கத் தலைவர் கென்னத் டான், இது குறித்து கூறுகையில், "இந்தியத் திரைக் கலைஞர்களின் ஆக்கபூர்வமான திறனை வெளிப்படுத்தும் இந்தப் படத் தேர்வுகளுடன், சிங்கப்பூரின் திரைப்பட ஆர்வலர்கள் ஒன்றிணைந்து எழுச்சியடைவார்கள்" என்று கூறினார்.

இந்த விழாவில், எட்டு இந்திய மொழிகளில், பல்வேறு வகை, பிராந்தியம், தலைமுறைகளைச் சேர்ந்த 21 திரைப்படங்கள் திரையிட தேர்வு செய்யப்பட்டுள்ளன. பாலிவுட்டின் மூன்று நட்சத்திரங்களான ஷாருக் கான், அமீர் கான், சல்மான் கான் ஆகியோரின் திரைப்படங்கள் ஓர் சிறப்பம்சம் என சிங்கப்பூரில் கொண்டாடப்படுகிறது. இவர்களின் படைப்புகள் பல தசாப்தங்களாக இந்திய சினிமாவை வடிவமைத்து உலகளவில் பெரும் ரசிகர்களைக் கவர்ந்துள்ளன.

"தில்வாலே துல்ஹனியா லே ஜாயேங்கே", "3 இடியட்ஸ்", "தங்கல்", "பியார் கியா தோ டர்னா க்யா", "ராஜு பன் கயா ஜென்டில்மேன்" போன்ற புகழ்பெற்ற படங்களும், "உரி: தி சர்ஜிக்கல் ஸ்ட்ரைக்", "சாம் பகதூர்" போன்ற போர் நாடகங்களும், "பத்மாவத்", "கிராந்திவீர்", "மங்கல் பாண்டே: தி ரைசிங்" போன்ற வரலாற்று, சமூகப் படங்களும் திரையிடப்படுகின்றன.

தமிழ்ச் சினிமாவின் "ரோஜா", "சூரரைப் போற்று" போன்ற படங்கள் திரையிடப்படுகின்றன. "வில்லேஜ் ராக்ஸ்டார்ஸ்" (அசாம்), "அனந்தா" (ஒடியா), "ஆட்டம்" (மலையாளம்), "ஹெல்லாரோ" (குஜராத்தி), "ஜிப்ஸி" (மராத்தி), "பூங்" (மணிபுரி) போன்ற பல்வேறு மாநிலப் படங்களும் சர்வதேச பார்வையாளர்களுக்கு இந்தியாவின் பன்முகத்தன்மையை எடுத்துரைக்கும் விதமாக திரையிடப்படுகின்றன.