உதயநிதிக்காக மகன் கல்யாணத்தை ஷிப்ட் செய்த திமுக நிர்வாகி! மயிலாடுதுறை டூ சிவகங்கை! ருசிகர பின்னணி!

சிவகங்கை: உதயநிதி ஸ்டாலினுக்காக மயிலாடுதுறையை சேர்ந்த திமுக நிர்வாகி ஒருவர் தனது மகன் கல்யாணத்தை சிவகங்கை மாவட்டத்துக்கு ஷிப்ட் செய்த நிகழ்வு நடந்துள்ளது.

திமுக தலைமை செயற்குழு உறுப்பினர் ராம இளங்கோவன் தனது மகன் திருமணத்தை மயிலாடுதுறையில் நடத்த விரும்புவதாகவும் அதனை நீங்கள் தான் தலைமையேற்று நடத்தி வைக்க வேண்டும் எனவும் உதயநிதி ஸ்டாலினிடம் மே 25 ஆம் தேதியை கேட்டிருக்கிறார்.

மே 25ஆம் தேதியன்று சிவகங்கை மாவட்டத்தில் ஏற்கனவே திருமண விழாவில் பங்கேற்க தாம் தேதி கொடுத்துவிட்டதை ராம இளங்கோவனிடம் உதயநிதி ஸ்டாலின் எடுத்துக் கூறியிருக்கிறார்.

அதனால் என்ன பரவாயில்லை நான் என் மகனுக்கு பெண் எடுக்கும் மாவட்டம் சிவகங்கை என்பதால், கல்யாணத்தை மயிலாடுதுறையிலிருந்து சிவகங்கை மாவட்டம் குன்றக்குடிக்கு ஷிப்ட் செய்திருக்கிறார்.

இதையடுத்து சிவகங்கை மாவட்டத்தில் இன்று ஒரே நாளில் மூன்று திமுக பிரமுகர்கள் இல்ல மண விழாவில் கலந்துகொண்டு திருமணத்தை தலைமை தாங்கி நடத்தி வைத்தார் உதயநிதி ஸ்டாலின்.

அமைச்சராகி 2வது முறையாக சிவகங்கை மாவட்டத்திற்கு விசிட் அடித்த அமைச்சர் உதயநிதி ஸ்டாலினுக்கு திமுக மாவட்டச் செயலாளரும், கூட்டுறவுத்துறை அமைச்சருமான பெரியகருப்பன் உற்சாகமிகு வரவேற்பு கொடுத்து அசத்தினார்.

கடும் வெயிலையும் பொருட்படுத்தாமல் உதயநிதி பயணித்த பாதைகளில் எல்லாம் திமுக தொண்டர்களும், நிர்வாகிகளும் திரண்டு வந்து அவரை வரவேற்றனர்.

English summary

There has been an incident where a DMK official from Mayiladuthurai shifted his son's marriage to Sivaganga district for Udhayanidhi Stalin.