“நான் ரொம்ப நாளா ஒன் சைடு லவ்லயே போயிட்டு இருக்கேன்".. பிரச்சாரத்தில் சீமான் கலகலப்பு!

Updated: Tuesday, April 14, 2026, 19:34 [IST]

Subscribe to Oneindia Tamil

சிவகங்கை: "என் காதல் புரிஞ்சிருச்சுனா நான் ஜெயிச்சிடுவேன்.. நான் ரொம்ப நாளா ஒன் சைடு லவ்லயே போயிட்டு இருக்கேன்" என சிவகங்கை மாவட்டம் திருப்புவனத்தில் நாதக தலைமை ஒருங்கிணாப்பாளர் சீமான் பிரச்சாரத்தில் பேசியுள்ளார்.

தமிழகச் சட்டமன்றத் தேர்தல் வரும் ஏப்ரல் 23 ஆம் தேதி நடைபெறவிருக்கும் நிலையில், தலைவர்களின் பிரசாரம் சூடுபிடித்துள்ளது. திமுக தலைவர் முதல்வர் ஸ்டாலின், அதிமுக பொதுச்செயலாளர் எடப்பாடி பழனிசாமி, நாம் தமிழர் கட்சியின் தலைமை ஒருங்கிணைப்பாளர் சீமான், தவெக தலைவர் விஜய் ஆகியோர் தீவிரப் பிரசாரம் மேற்கொண்டு வருகின்றனர்.

ஒவ்வொரு தலைவர்களின் பிரச்சாரமும் ஒவ்வொரு ஸ்டைலில் இருந்து வருகிறது. அந்தவகையில் சீமான், பாட்டுப் பாடியும், நகைச்சுவையாகப் பேசியும் வாக்கு சேகரித்து வருகிறார். சீமான், காரைக்குடி தொகுதியில் போட்டியிடுகிறார், தமிழத்தின் 234 சட்டசபை தொகுதிகளிலும் தனித்துக் களமிறங்குகிறது. நாம் தமிழர் கட்சி.

சிவகங்கை மாவட்டம், திருப்புவனம் பகுதியில் நாதக தலைமை ஒருங்கிணைப்பாளர் சீமான் இன்று பிரசாரம் மேற்கொண்டார். அப்போது சிறிதுநேரம் கிண்டலாக தனது ஆதங்கத்தை வெளிப்படுத்திய சீமான், "நான் 15 ஆண்டுகளாக காதலித்து கத்திக் கொண்டிருக்கிறேன். என் காதல் புரிந்துவிட்டால் நான் வென்றுவிடுவேன். நான் நீண்ட நாட்களாக ஒருதலை காதலாகவே சென்று கொண்டிருக்கிறேன். இந்த மக்கள் என்னை கண்டுகொள்வதில்லை.

நானும் மற்ற அரசியல் கட்சியினரைப் போலவே ஏமாற்றலாம் என யோசிக்கிறேன். ஆனால் மனம் ஒத்துக்கொள்ள மறுக்கிறது. அவர்கள் ரூ.2,000 தருகிறோம் எனக் கூறுகிறார்கள். நான் வீட்டுக்கு ஒரு ஹெலிகாப்டர் தருகிறேன். அவர்கள் சொன்னால் நம்புகிறார்கள். நான் சொன்னால் சிரிக்கிறார்கள்.

ஒவ்வொரு குடும்பத் தலைவிக்கும் ஒரு கிலோ தங்கம், புதிதாக திருமணமான பெண்களுக்கு ஒரு கிலோ வைரமும், விரும்பிய நாட்டுக்கு தேனிலவு செல்ல ஏற்பாடும் செய்யப்படும். வேறு ஏதேனும் வேண்டுமா?" என சிரித்துக்கொண்டே பேசினார் சீமான்,

தொடர்ந்து பேசிய சீமான், "திருந்துகள். இதுபோன்ற இலவசங்களை நம்பாதீர்கள். வீட்டிற்கு இரண்டு பேருக்கு அரசு வேலை தருகிறேன். ஒரு வட இந்தியர்களும் இங்கு இருக்கமாட்டார்கள். படிப்புக்கேற்ற வேலை, திறன் மேம்பாடு என அனைத்தையும் நான் செய்வேன். மது காய்ச்சப்பட்டாது, விற்கப்படாது. அதற்கு பதில் பனம்பால், தென்னம்பால் போன்றவை விற்கப்படும்" எனக் கூறினார்.