‘ஸ்கெட்ச்’ போட்டு தூக்கிய கும்பல்.. சிவகங்கை சுள்ளான் மதன் கொலை வழக்கில் மேலும் 4 பேர் கைது!
சிவகங்கை: சுள்ளான் மதன் கொலை வழக்கில் மேலும் 4 பேரை போலீசார் கைது செய்துள்ளனர். சிவகங்கையில் பிரபல ரவுடி சுள்ளான் மதன் கொலை வழக்கில் ஏற்கனவே 3 பேரை போலீசார் கைது செய்த நிலையில் மேலும் 4 பேர் கைதாகியுள்ளனர்.
சிவகங்கை மாவட்டம் மேலமங்கலம் மஞ்சுவிரட்டு நிகழ்ச்சிக்குச் சென்ற சுள்ளான் என்ற மதன் வெட்டிப் படுகொலை செய்யப்பட்டார். இவர் மீது பல்வேறு கொலை, கொலை முயற்சி உள்ளிட்ட வழக்குகள் நிலுவையில் இருந்து வந்தன.
கடந்த 7 ஆம் தேதி ஜாமீனில் வெளியே வந்துள்ளார் சுள்ளான் மதன். இந்நிலையில், பக்கத்து கிராமமான மேலமங்கலத்தில் நடைபெற்ற வடமாடு மஞ்சுவிரட்டு நிகழ்ச்சியை பார்ப்பதற்காக சுள்ளான் மதன் சென்றிருந்தார். அப்போது பைக்கில் ஆயுதங்களுடன் வந்த கும்பல், சுள்ளான் மதனை சுற்றி வளைத்துள்ளது. இதனை பார்த்த சுள்ளான் மதன், அங்கிருந்து தப்பியோடினார்.
விடாமல் விரட்டிச் சென்ற அந்த கும்பல், கரும்பு காட்டுக்குள் வைத்து சுள்ளான் மதனை சரமாரியாக வெட்டியது. இதில் படுகாயமடைந்த அவர், சம்பவ இடத்திலேயே உயிரிழந்தார். சுள்ளான் மதன் கொலை செய்யப்பட்ட சம்பவம் சிவகங்கை சுற்றுப்பகுதிகளில் பெரும் பரபரப்பை ஏற்படுத்தியது.
சுள்ளான் மதன் கொலை வழக்கில் முதலில் 3 பேர் கைது செய்யப்பட்டனர். தொடர்ந்து இவ்வழக்கில் தொடர்புடையவர்களை கைது செய்ய 6 தனிப்படைகள் அமைக்கப்பட்டு தேடுதல் வேட்டை நடந்து வந்தது. இந்நிலையில் மதன் கொலை வழக்கில் மேலும் 4 பேர் கைது செய்யப்பட்டிருப்பதாக சிவகங்கை போலீசார் தெரிவித்துள்ளனர்.
இதுகுறித்து காவல்துறை இன்று வெளியிட்டுள்ள அறிவிப்பில், சிவகங்கை மாவட்டம், சிவகங்கை நகர் காவல் நிலைய எல்லைக்குட்பட்ட மேலமங்கலத்தில், கடந்த 18.10.2026 அன்று மதியம் சரித்திரப் பதிவேடு குற்றவாளியான மதன் என்கிற சுள்ளான் மதன் (26), த/பெ. சக்தி, புதுப்பட்டி, சிவகங்கை என்பவர் கொலை செய்யப்பட்ட சம்பவம் தொடர்பாக, சிவகங்கை நகர் காவல் நிலைய குற்ற எண். 575/2026, பிரிவுகள் 191(2), 191(3), 103(1) BNS-ன் கீழ் வழக்குப் பதிவு செய்யப்பட்டு விசாரணை மேற்கொள்ளப்பட்டு வருகிறது.
இந்த வழக்கில் நேற்று 3 எதிரிகள் கைது செய்யப்பட்டு, நீதிமன்றக் காவலுக்கு உட்படுத்தப்பட்டு சிறையில் அடைக்கப்பட்டனர். இந்நிலையில், இன்று மேலும் 4 எதிரிகள் கைது செய்யப்பட்டுள்ளனர்.
இன்று கைது செய்யப்பட்ட எதிரிகள் விவரம்:
1. சந்தோஷ் (19), த/பெ. குமார், சிவகங்கை.
2. ஜெய மாணிக்கராஜ் (20), த/பெ. கருப்பசாமி, சிவகங்கை.
3. முத்து சூர்யா (20), த/பெ. மாணிக்கம், சிவகங்கை.
4. விக்னேஷ் (23), த/பெ. பெரியசாமி, மதுரை.
கைது செய்யப்பட்ட மேற்கண்ட 4 எதிரிகளும் நீதிமன்றக் காவலுக்கு உட்படுத்தப்பட உள்ளனர்.
மேலும், இவ்வழக்கில் தொடர்புடைய மற்ற எதிரிகளைக் கைது செய்வதற்காக 6 தனிப்படைகள் அமைக்கப்பட்டு தீவிரமாகத் தேடப்பட்டு வருகின்றனர். அவர்களையும் விரைவில் கைது செய்து நீதிமன்றக் காவலுக்கு உட்படுத்த நடவடிக்கை மேற்கொள்ளப்பட்டு வருகிறது.
இந்தக் கொலை வழக்கு தொடர்பாக இளைஞர்கள் சமூக வலைதளங்களில் பதிவிடும் சமூக நல்லிணக்கத்திற்குப் பாதிப்பை ஏற்படுத்தக்கூடிய கருத்துகள் மற்றும் புகைப்படங்கள் தொடர்ந்து கண்காணிக்கப்பட்டு வருகின்றன.
சட்டம் ஒழுங்கைப் பாதிக்கும் வகையில், சமூகப் பதற்றத்தை ஏற்படுத்தும் நோக்கில் பதிவுகள் வெளியிடுவோர் மீது உரிய சட்டப் பிரிவுகளின் கீழ் வழக்குப் பதிவு செய்து கைது செய்வதுடன், கடுமையான சட்ட நடவடிக்கைகளும் மேற்கொள்ளப்படும் எனத் தெரிவிக்கப்பட்டுள்ளது.
Click it and Unblock the Notifications
Sign in with Google
