ஆயுஷ் மாத்ரேவுக்கு 3 வாரங்கள் ரெஸ்ட்.. சிஎஸ்கே அணிக்கு பிரம்மாண்ட சிக்கல்.. தயாராகும் உர்வில் படேல்?

Published: Monday, April 20, 2026, 23:11 [IST]

Subscribe to Oneindia Tamil

மும்பை: ஐபிஎல் தொடரில் சென்னை சூப்பர் கிங்ஸ் அணிக்காக அதிரடியாக விளையாடி வரும் இளம் வீரர் ஆயுஷ் மாத்ரே, காயம் காரணமாக மூன்று வாரங்கள் ஓய்வெடுக்க வேண்டிய சூழல் ஏற்பட்டுள்ளதாக தெரிய வந்துள்ளது. இன்று மும்பை வந்த சிஎஸ்கே அணியுடன் ஆயுஷ் மாத்ரே நடந்து வந்த போதும் கூட, சிறிது வலியுடன் நடந்து வந்தார்.

அண்மையில் சன்ரைசர்ஸ் ஹைதராபாத் அணிக்கு எதிரான போட்டியின் போது, சென்னை சூப்பர் கிங்ஸ் அணியின் இளம் வீரர் ஆயுஷ் மாத்ரேவின் இடது காலில் தசைப்பிடிப்பு (Hamstring tear) காயம் ஏற்பட்டது. வேகமாக ஓடி ரன் எடுக்க முயற்சித்த போது அவருக்கு இந்த காயம் ஏற்பட்டது. சிஎஸ்கே அணியின் டாப் ஆர்டரில் அதிரடியான ஆட்டத்தை விளையாடி சிறந்த ஃபார்மில் இருந்தார் ஆயுஷ் மாத்ரே.

6 போட்டிகளில் விளையாடியுள்ள ஆயுஷ் மாத்ரே, 201 ரன்களை குவித்திருக்கிறார். இப்படியான சூழலில் ஆயுஷ் மாத்ரேவின் காயம் சிஎஸ்கே அணிக்கு மிகப்பெரிய பின்னடைவாக மாறி இருக்கிறது. சிஎஸ்கே அணி அடுத்த போட்டியில் மும்பை அணியை எதிர்த்து வான்கடே மைதானத்தில் விளையாட உள்ளது. மும்பையைச் சேர்ந்த ஆயுஷ் மாத்ரே சொந்த ஊரில் விளையாட முடியாத சூழல் உருவாகி இருக்கிறது.

ஆயுஷ் மத்ரேவின் காயம் எந்த அளவு தீவிரமானது என்பதை உறுதிப்படுத்த, இன்று மருத்துவப் பரிசோதனைகளுக்கு உட்படுத்தப்பட்டுள்ளார். மும்பையில் நடைபெறவுள்ள போட்டியில் அவர் பங்கேற்பது சந்தேகம் என்றாலும், முழுமையான மருத்துவ அறிக்கை வந்த பிறகே அவர் எத்தனை போட்டிகளில் பங்கேற்க முடியாது என்பது அதிகாரப்பூர்வமாகத் தெரியவரும்.

தற்போது வரை ஆயுஷ் மாத்ரே 3 வாரங்கள் ஓய்வில் இருக்க வேண்டிய அவசியம் இருப்பதாக தகவல் கிடைத்துள்ளது. ஏற்கனவே டிவால்ட் பிரெவிஸ் காயம் காரணமாக 3 போட்டிகளை மிஸ் செய்தார். அதேபோல் தோனி இன்னும் காயத்தில் இருந்து குணமடையவில்லை. கலீல் அஹ்மத் காயத்தால் மொத்தமாக வெளியேறி இருக்கிறார். நேதன் எல்லீஸ் காயத்தால் விலகிவிட்டார்.

இதனால் சிஎஸ்கே அணி மாற்று வீரர்களை அடையாளம் காண வேண்டிய தேவை ஏற்பட்டுள்ளது. மும்பை அணிக்கு எதிரான போட்டியில் ஆயுஷ் மாத்ரேவின் இடத்தில் அதிரடி வீரர் உர்வில் படேல் விளையாட வைக்கப்படலாம் என்று தெரிகிறது. கடந்த சீசனில் உர்வில் படேல் நம்பர் 3 பேட்ஸ்மேனாகவே ஆடி இருந்தார். அல்லது இளம் வீரர் கார்த்திக் சர்மாவுக்கு வாய்ப்பு அளிக்கப்படலாம் என்று பேச்சுகள் எழுந்துள்ளன.

Published On April 20, 2026