IND vs NZ: ஐசிசி சாம்பியன்ஸ் டிராபி.. கோப்பையை வெல்லும் அணிக்கு பரிசுத்தொகை எவ்வளவு? நோட் பண்ணுங்க!

துபாய்: ஐசிசி சாம்பியன்ஸ் டிராபி தொடரின் இறுதிப்போட்டியில் வெல்லும் அணிக்கு எவ்வளவு பரிசுத் தொகை அளிக்கப்படும் என்பதை பார்க்கலாம். சாம்பியன்ஸ் டிராபி தொடருக்கான மொத்த பரிசுத் தொகையாக ரூ.60.06 கோடி அறிவிக்கப்பட்டுள்ள நிலையில், முதலிடம் பெறும் அணிக்கு ரூ.21.4 கோடியும், 2வது இடத்தில் நிறைவு செய்யும் அணிக்கு ரூ.11.6 கோடியும் பரிசாக அளிக்கப்படும் என்று தெரிய வந்துள்ளது.

இந்தியா - நியூசிலாந்து அணிகளுக்கு இடையிலான ஐசிசி சாம்பியன்ஸ் டிராபி தொடரின் இறுதிப்போட்டி நாளை துபாய் மைதானத்தில் நடக்கவுள்ளது. இந்த போட்டியில் வெற்றிபெறுவதற்காக இரு அணிகளும் தீவிரமாக பயிற்சியில் ஈடுபட்டு வருகின்றனர். கடந்த ஆண்டு இந்திய அணி டி20 உலகக்கோப்பையை வென்ற நிலையில், இம்முறை சாம்பியன்ஸ் டிராபியை கைப்பற்றும் என்று பார்க்கப்படுகிறது.

அதுமட்டுமல்லாமல் இந்திய அணியின் கேப்டன் ரோஹித் சர்மாவின் கடைசி ஒருநாள் போட்டியாக இது இருக்கும் என்று கருதப்படுகிறது. எப்படி டி20 உலகக்கோப்பையை வென்றுவிட்டு உடனடியாக இளம் தலைமுறைக்கு வழிவிடும் வகையில் கேப்டன் ரோஹித் சர்மா ஓய்வை அறிவித்தாரோ, அதேபோல் சாம்பியன்ஸ் டிராபி தொடரை வென்றால், ஓய்வை அறிவிக்க அதிக வாய்ப்புகள் உள்ளதாக கூறப்படுகிறது.

இந்த நிலையில் நாளை நடக்கவுள்ள இறுதிப்போட்டியில் வெற்றிபெறும் அணிக்கும் தோல்வியடையும் அணிக்கும் கிடைக்கும் பரிசுத் தொகை எவ்வளவு என்ற கேள்வி ரசிகர்களிடையே எழுந்துள்ளது. அதன்படி ஐசிசி சாம்பியன்ஸ் டிராபி தொடரின் மொத்த பரிசுத்தொகை ரூ.60.06 கோடியாகும். 2017 சாம்பியன்ஸ் டிராபியை ஒப்பிடும் போது இந்த பரிசுத்தொகை சுமார் 53 சதவிகிதம் அதிகமாகும்.

இதில் சாம்பியன்ஸ் டிராபி இறுதிப்போட்டியில் வெற்றிபெறும் அணிக்கு சுமார் ரூ.19.49 கோடி பரிசாக அளிக்கப்படும். இந்த போட்டியில் தோல்வியடையும் அணிக்கு சுமார் ரூ.9.74 கோடி பரிசாக கிடைக்கும். ஒருவேளை இந்திய அணி இறுதிப்போட்டியில் வெற்றிபெற்றால் சுமார் ரூ. 21.4 கோடியும், தோல்வியடைந்தால் சுமார் ரூ.11.6 கோடியும் பரிசாக அளிக்கப்படும்.

2023ஆம் ஆண்டு நடைபெற்ற ஐசிசி உலகக்கோப்பை தொடரில் வெற்றிபெற்ற ஆஸ்திரேலியா அணிக்கு ரூ.33 கோடியும், அந்த இறுதிப்போட்டியில் தோல்வியடைந்த இந்திய அணி ரூ.16 கோடியும் பரிசாக அளிக்கப்பட்டது. அதனை ஒப்பிடும் போது இது குறைவாக இருந்தாலும், சாம்பியன்ஸ் டிராபி வரலாற்றில் இது அதிகபட்ச தொகை என்பது குறிப்பிடத்தக்கது.

English summary

Champions Trophy IND vs NZ: How Much Prize Money will the winner and Runner up of the India vs New Zealand Champions Trophy Final will get