வெளிநாட்டில் ஒரு சதமும் அடிக்கவில்லை.. இவரா டெஸ்ட் கேப்டன்.. சுப்மன் கில்லை வெளுக்கும் ரசிகர்கள்
மும்பை: இந்திய அணியின் டெஸ்ட் கேப்டனாக நியமனம் செய்யப்பட்டுள்ள சுப்மன் கில் வெளிநாடுகளில் ஒரு சதம் கூட அடிக்காமல் இருப்பது ரசிகர்களிடையே கடுமையான விமர்சனத்தை பெற்றுள்ளது. இவரால் வெளிநாட்டு மண்ணில் நம்பிக்கையுடன் இந்திய அணியை வழிநடத்த முடியுமா என்ற கேள்வியும் எழுப்பப்பட்டு வருகிறது.
இங்கிலாந்து அணிக்கு எதிரான 5 போட்டிகள் கொண்ட டெஸ்ட் தொடருக்கான இந்திய அணி அறிவிக்கப்பட்டுள்ளது. இந்திய ஜாம்பவான்களான விராட் கோலி, அஸ்வின் இல்லாமல் டெஸ்ட் அணி அறிவிக்கப்பட்டிருப்பது ரசிகர்களிடையே கூடுதல் எதிர்பார்ப்பை ஏற்படுத்தியுள்ளது. அதேபோல் கேப்டன் ரோஹித் சர்மாவும் டெஸ்ட் கிரிக்கெட்டில் இருந்து ஓய்வை அறிவித்திருக்கிறார்.
சுப்மன் கில் கேப்டன்சி அனுபவம்
இந்த நிலையில் இந்திய டெஸ்ட் அணியின் கேப்டனாக சுப்மன் கில் நியமனம் செய்யப்பட்டுள்ளார். இதுவரை இந்திய அணியை 5 போட்டிகள் கொண்ட டி20 தொடரில் சுப்மன் கில் வழிநடத்தி இருக்கிறார். அதேபோல் ரஞ்சி டிராபி தொடர்களில் 3 போட்டிகளில் கேப்டனாக செயல்பட்டு ஒரு வெற்றி, ஒரு டிரா மற்றும் ஒரு தோல்வியை பெற்றுள்ளார்.
கில் தாக்குபிடிப்பாரா?
மற்றபடி சுப்மன் கில்லுக்கு ஐபிஎல் தொடர் மட்டுமே கேப்டன்சியில் அனுபவமாக உள்ளது. அதிலும் கடந்த சீசனில் மிகவும் மோசமாக செயல்பட்டார். ஒவ்வொரு முடிவினையும் பவுண்டரி லைனில் இருந்து ஆஷிஷ் நெஹ்ரா எடுப்பது ஐபிஎல் தொடர் பார்க்கும் ஒவ்வொருவருக்கும் நன்றாகவே தெரியும். இந்த நிலையில் இந்திய டெஸ்ட் அணியை சுப்மன் கில்லால் வழிநடத்த முடியுமா என்ற கேள்வி உள்ளது.
விராட் கோலியின் பலம்
ஏனென்றால் விராட் கோலி கேப்டனாவதற்கு முன்பாக அவரிடம் மிகப்பெரிய டெஸ்ட் அனுபவம் இருந்தது. கேப்டன்சியில் இல்லையென்றால், உலகம் முழுக்க ரன்களை குவித்து வந்தார். இங்கிலாந்து, ஆஸ்திரேலியா, தென்னாப்பிரிக்கா என்று எந்த நாட்டிற்கு சென்றாலும் இந்தியாவின் கொடியை விராட் கோலி உயரப் பறக்கவிட்டார். பேட்ஸ்மேனாக அவரை நினைத்து அஞ்சாத பவுலர்களே இல்லை என்ற நிலை இருந்தது.
ஒரு சதம் கூட இல்லை
ஆனால் சுப்மன் கில் இதுவரை 32 டெஸ்ட் போட்டிகளில் விளையாடி இருந்தாலும், இந்திய மண்ணில் மட்டுமே ரன்களை குவித்திருக்கிறார். ஆஸ்திரேலியா, இங்கிலாந்து, தென்னாப்பிரிக்கா, வெஸ்ட் இண்டீஸ் மண்ணில் சுப்மன் கில் இதுவரை ஒரு சதம் கூட விளாசியது கிடையாது. 32 டெஸ்ட் போட்டிகளில் விளையாடிய போதும், இதுவரை பேட்டிங்கில் ஒரு இன்னிங்ஸை எப்படி கட்டமைப்பது என்று தெரியாமல் இருக்கிறார்.
புலம்பும் ரசிகர்கள்
இங்கிலாந்து, ஆஸ்திரேலியா மைதானங்களில் எதிரணி கேப்டன் தான் முதல் குறியாக இருப்பார். அதற்கு சுப்மன் கில் மனதளவில் தயாராக இருந்தாலும், பேட்டிங்கில் நிரூபிக்க வேண்டிய தேவை உள்ளது. ஏற்கனவே கிடைத்த வாய்ப்புகளை கோட்டைவிட்டுள்ள சுப்மன் கில், இம்முறை என்ன செய்வார் என்று ரசிகர்கள் புலம்பி வருகின்றனர்.
Click it and Unblock the Notifications
Sign in with Google