W, 0, W, 0, W.. ராஜஸ்தான் அணியை அலறவிட்ட அறிமுக வீரர் பிரஃபுல்.. துள்ளிக் குதித்த காவ்யா மாறன்!

Updated: Monday, April 13, 2026, 22:22 [IST]

Subscribe to Oneindia Tamil

ஐதராபாத்: ராஜஸ்தான் அணிக்கு எதிரான போட்டியில் முதல் ஓவரை வீசிய அறிமுக வீரர் பிரஃபுல் ஹிங்கே 1 ரன்னை மட்டும் விட்டுக் கொடுத்து 3 விக்கெட்டுகளை சாய்த்துள்ளார். நட்சத்திர வீரர் வைபவ் சூர்யவன்ஷி, துருவ் ஜுரெல் மற்றும் ப்ரிடோரியஸ் ஆகியோரை வீழ்த்தி அசத்தினார். இதனால் ஐதராபாத் அணியின் உரிமையாளர் காவ்யா மாறன் இருக்கையில் இருந்து துள்ளிக் குதித்து கொண்டாடினார்.

ஐபிஎல் தொடரில் ராஜஸ்தான் அணிக்கு எதிரான போட்டியில் ஐதராபாத் அணி விளையாடி வருகிறது. இந்தப் போட்டியில் டாஸ் வென்ற ராஜஸ்தான் அணியின் கேப்டன் ரியான் பராக் பவுலிங்கை தேர்வு செய்தார். இதன்பின் களமிறங்கிய ஐதராபாத் அணி கேப்டன் இஷான் கிஷனின் அதிரடியாக ஆட்டத்தால், அந்த அணி 20 ஓவர்களில் 6 விக்கெட்டுகள் இழப்பிற்கு 216 ரன்களை குவித்தது.

சிறப்பாக ஆடிய இஷான் கிஷன் 44 பந்துகளில் 91 ரன்களை விளாசினார். இதன்பின் 217 ரன்கள் என்ற மிகப்பெரிய இலக்கை நோக்கி வைபவ் சூர்யவன்ஷி - ஜெய்ஸ்வால் கூட்டணி தொடக்கம் கொடுத்தது. ஐதராபாத் அணி தரப்பில் அறிமுக வீரர் பிரஃபுல் ஹிங்கே முதல் ஓவரை வீசினார். 2வது பந்திலேயே வைபவ் சூர்யவன்ஷி புல் ஷாட் அடிக்க முயற்சித்து டக் அவுட்டாகி வெளியேறினார்.

வைபவ் சூர்யவன்ஷி அடித்த பந்து மேலே பறந்த போதே இருக்கையில் இருந்து எழுந்த துள்ளிக் குதித்த காவ்யா மாறன், கேட்சை சரியாக பிடித்துவிட வேண்டும் என்று கடவுளிடம் வேண்ட தொடங்கினார். தொடர்ந்து 4வது பந்தில் துருவ் ஜுரெல் இன்சைட் எட்ஜாகி போல்டாகினார். இவரும் டக் அவுட்டாகி வெளியேற, இளம் வீரர் ப்ரிடோரியஸ் களமிறங்கினார்.

அவரும் முதல் ஓவரின் கடைசி பந்தில் தூக்கி அடித்து டக் அவுட்டாகி வெளியேறினார். இதனால் முதல் ஓவரிலேயே ராஜஸ்தான் அணி 1 ரன்னுக்கு 3 விக்கெட்டுகளை பறிகொடுத்தது. அதேபோல் ஐபிஎல் தொடரில் முதல் ஓவரிலேயே 3 விக்கெட்டுகளை வீழ்த்திய முதல் வீரர் என்ற சாதனையை அறிமுக போட்டியிலேயே படைத்துள்ளார் பிரஃபுல் ஹிங்கே.

அதுமட்டுமல்லாமல் அவர் வீசிய 2வது ஓவரின் கடைசி பந்தில் ரியான் பராக்கும் 4 ரன்களில் ஆட்டமிழந்தார். 3 ஓவர்களை வீசிய பிரஃபுல் ஹிங்கே 18 ரன்களை மட்டுமே விட்டுக் கொடுத்து 4 விக்கெட்டுகளை கைப்பற்றி இருக்கிறார். ஐபிஎல் ஏலத்தில் அடிப்படை விலையான ரூ.30 லட்சத்திற்கு வாங்கப்பட்ட வீரர், ஐதராபாத் அணிக்கு மிகப்பெரிய திருப்புமுனையை கொடுத்திருப்பதாக ரசிகர்கள் பாராட்டி வருகின்றனர்.