சஞ்சு சாம்சன் அவுட்.. 3 மாற்றங்களை செய்யும் கம்பீர்.. நாளைய ஆட்டத்தில் இந்திய பிளேயிங் லெவன் என்ன?

விசாகப்பட்டிணம்: நியூசிலாந்து அணிக்கு எதிரான 4வது டி20 போட்டியில் இந்திய அணியின் பிளேயிங் லெவனில் 3 மாற்றங்கள் செய்யப்படலாம் என்று தகவல் வெளியாகி இருக்கிறது. குறிப்பாக நட்சத்திர தொடக்க வீரர் சஞ்சு சாம்சனின் இடத்தில் இஷான் கிஷன் கொண்டு வரப்பட்டு, நம்பர் 3 பேட்டிங் வரிசையில் ஸ்ரேயாஸ் ஐயர் விளையாட வைக்கப்படலாம் என்றும் கூறப்படுகிறது.

இந்தியா - நியூசிலாந்து அணிகளுக்கு இடையிலான 4வது டி20 போட்டி நாளை விசாகப்பட்டினத்தில் நடக்கவுள்ளது. இதற்காக இரு அணிகளும் தீவிர பயிற்சியை மேற்கொண்டு வருகின்றனர். ஏற்கனவே இந்திய அணி 3-0 என்ற கணக்கில் டி20 தொடரை கைப்பற்றிவிட்டது. இதனால் 4வது டி20 போட்டியில் சில வீரர்களுக்கு கேம் டைம் மற்றும் வாய்ப்பு கொடுக்கப்படும் என்று எதிர்பார்க்கப்படுகிறது.

அதேபோல் கடைசி 2 போட்டிகளில் இந்திய அணிக்கு திரும்புவார் என்று எதிர்பார்க்கப்பட்ட திலக் வர்மா, இன்னும் இந்திய அணிக்கு திரும்பவில்லை. இதனால் ஸ்ரேயாஸ் ஐயரை தயார் நிலையில் வைத்திருக்க வேண்டிய பொறுப்பு பயிற்சியாளர் கவுதம் கம்பீருக்கு உள்ளது. ஏற்கனவே வாஷிங்டன் சுந்தர் டி20 உலகக்கோப்பையில் விளையாடுவாரா என்ற கேள்வி உள்ளது.

இதனால் ரவி பிஷ்னாய்யை தயார் செய்யும் வகையில் கடந்த ஆட்டத்தில் வாய்ப்பு வழங்கப்பட்டது. இதனால் நாளைய ஆட்டத்தில் இந்திய அணியின் பிளேயிங் லெவனில் 3 மாற்றங்கள் செய்யப்படலாம் என்று கூறப்படுகிறது. அதன்படி குல்தீப் யாதவிற்கு ஓய்வு அளிக்கப்பட்டு வருண் சக்கரவர்த்தி கொண்டு வரப்படலாம். அதேபோல் ஹர்சித் ராணா இடத்தில் அர்ஷ்தீப் சிங் விளையாடுவார் என்றும் கருதப்படுகிறது.

இன்னொரு பக்கம் சஞ்சு சாம்சன் பெஞ்ச் செய்யப்பட அதிக வாய்ப்புகள் உள்ளது. ஏனென்றால் இஷான் கிஷன் அதிரடியாக ஃபார்மில் உள்ளார். நம்பர் 3 இடத்தில் களமிறங்கிய இஷான் கிஷன், 2வது டி20 போட்டியில் 32 பந்துகளில் 76 ரன்களை விளாசினார். அதேபோல் கடந்த போட்டியில் 13 பந்துகளுக்கு 28 ரன்களை குவித்தார். ஆனால் சஞ்சு சாம்சனோ 3 போட்டிகளிலும் ஒற்றை இலக்கத்தில் அவுட்டாகி ஏமாற்றம் அளித்தார்.

இதனால் இஷான் கிஷனை தொடக்க வீரராக களமிறக்கிவிட்டு, விக்கெட் கீப்பராக கொண்டு வரப்படலாம் என்ற பேச்சுகள் எழுந்துள்ளது. அதேபோல் இஷான் கிஷன் தொடக்க வீரராக ஆடி வந்தவர் தான். சையத் முஷ்டாக் அலி தொடரில் தொடக்க வீரராக களமிறங்கி ஜார்க்கண்ட் அணிக்கு கோப்பையை வென்று கொடுத்தார். இதனால் நம்பர் 3 இடத்தில் ஸ்ரேயாஸ் ஐயர் களமிறங்கலாம் என்ற பேச்சும் எழுந்துள்ளது.

English summary

Sanju Samson: Sanju Samson out, 3 Changes might be possible in the Indian team Playing XI in the 4th T20 Against New Zealand at Visakhapatnam