இலங்கைக்கு சுற்றுலா சென்ற 7 இந்தியர்கள் மாயம்.. 7-இல் இருவர் பலியை உறுதி செய்த இந்திய வெளியுறவு துறை

கொழும்பு: இலங்கைக்கு சுற்றுலா சென்ற கர்நாடக மாநிலத்தவர்கள் 7 பேரில் 2 பேர் பலியாகிவிட்டதாக இந்திய வெளியுறவுத் துறை அமைச்சகம் உறுதி செய்தது.

இலங்கையில் ஈஸ்டர் பண்டிகையையொட்டி ஞாயிற்றுக்கிழமையான நேற்று மக்கள் தேவாலயங்களில் வழிபாடு நடத்தினர். அப்போது 3 தேவாலயங்கள், 4 ஹோட்டல்களில் குண்டுவெடிப்பு நிகழ்ந்துள்ளது. இந்த கோர விபத்தில் 200-க்கும் மேற்பட்டோர் பலியாகிவிட்டனர்.

கொழும்புவில் தேவாலயங்கள், ஓட்டல்களில் வைக்க குண்டுகளை வேனில் ஏற்றிச் சென்றது கண்டுபிடிக்கப்பட்டு அந்த வேனின் டிரைவரும் கைது செய்யப்பட்டார்.

பானுதரா பகுதி

இந்த நிலையில் கொழும்பு விமான நிலையத்துக்கு செல்லும் வழியில் 6 அடி நீள வெடிகுண்டு பைப் கண்டெடுக்கப்பட்டது. குண்டு வெடிக்கும் முன்பே கண்டறியப்பட்டதால் பெரும் சேதம் தவிர்க்கப்பட்டது. தீவிரவாதிகள் கொழும்புவின் புறநகர் பகுதியான பானுதரா பகுதியில் தங்கியிருந்ததும் தெரியவந்தது.

தேர்தல் பணி

இதனிடையே மதச்சார்பற்ற ஜனதா தளம் கட்சியைச் சேர்ந்த 7 பேர் தேர்தல் பணிகளை முடித்துக் கொண்டு கடந்த 20-ஆம் தேதி இலங்கைக்கு சுற்றுலா சென்றனர். அவர்கள் 7 பேரும் சாங்கிரி லா ஹோட்டலில் தங்கியிருந்தனர்.

5 பேர் நிலை

இந்த நிலையில் சாங்கிரி லா ஹோட்டலிலும் நேற்று குண்டு வெடிப்பு நிகழ்ந்தது. இதில் 7 பேரில் 2 பேர் உயிரிழந்துவிட்டதாக இந்திய வெளியுறவுத் துறை அமைச்சகம் உறுதி செய்தது. மீதமுள்ள 5 பேரின் நிலை என்னவென தெரியவில்லை.

குமாரசாமி அதிர்ச்சி

தேர்தல் பணிகளை ஆற்றிவிட்டு இலங்கை சென்ற 7 பேரில் இருவர் உயிரிழந்தது குறித்தும் 5 பேரின் நிலை என்னவென தெரியாதது குறித்தும் தகவலறிந்த கர்நாடக முதல்வர் குமாரசாமி அதிர்ச்சி அடைந்துள்ளார். கர்நாடக மஜதவில் பெரும் சோகத்தை ஏற்படுத்தியுள்ளது.

English summary

7 Indians belongs to Karnataka state are missing after Srilanka bomb blast. In the seven, 2 were killed in blast, says MEA.